زبانحال جناب رقیه (س) به حضرت علی اکبر(ع)
..
..
مرحوم صافی تبریزی
..
..
على سالدى دور فلک سنی
بولورم کناره رقیّه دن (1)
ولی کسمه لطفوی نیزه ده
گونی بختی قاره رقیّه دن
..
..
منی نعشون اوسته بو قوم دون
على قویمادی ایدم اخذ کام
که اولوم ئولونجه مجاورون
دیوب اوخشیام سنی صبح و شام
گیدرم علاج سیزم نیدیم
قویارام ودیعه على الدّوام
همی روحیمی همی جسموی
بو دیاره یاره رقیّه دن
..
..
قولی باغلى جسمى یارا على
سویولوب ستمله تالانمیشام
دییرم حقیقت مطلبی
نچون اوّلینده اینانمیشام
هامی قدرتیمله مقابلِ
غم و ابتلاده دایانمیشام
یتر امر صبر و تحمّله
دل بیقراره رقیّه دن
..
..
بونی سن بیلورسن اوزون که من
نجه محو حسن شمایلم
که بو بیر نظرله هامی یتن
غم و رنج و غصّیه مایلم
او یارالی باشیوی سینمه
باسوب اوخشیام متمایلم
نه ایدیم میسّر اولور همین
علی بیر نظاره رقیّه دن
..
..
نجه عندلیب خزان قالور
على عارض گله شوقمند
همه وقت گلشنی یاد ایدر
اولی سرو و سنبله شوقمند
منیده محبّت او زلفده
ایلیوبدی بیر تله شوقمند
گِله بُلبلیندن اولان هوس
وار او بیرجه تاره رقیّه دن
..
..
ایلیوبدی منظر چشم و جان
بو اسیرلر هره بیر باشی
عموم اوغلی قاسمی فاطمه
آنا اوغلنی باجی قارداشی
توکوب اوز محبتی قدّیجه
هامی طرف دامنه گوز یاشی
اولارون تمامیجه خون دل
توکولوب عذاره رقیّه دن
..
..
أؤزوم أوچ یاشندا اوشاق سوسوز
علی شرح حالیمه یوخ دلیم
یول اوزاق گون ایسّی نه سایبان
دوه اوستی هودج محملیم
بونیلان بیله گنه بیلمورم
اولاجاق منیم هارا منزلیم
یتیشنده منزله دردسر
یتر هانسی خواره رقیّه دن
..
..
دیمه تک سنیله رقیّه نون
على بیر علاقۀ قلبی وار
ایدر اهل بیت بو غم کشه
هره اؤز محبتین آشکار
منه تازیانه ویراندا شمر
باخان اودلانار ایشیدن یانار
دایانور بابام باشی نیزه ده
اولا بیر اشاره رقیّه دن
..
..
چکورم ز بسکه بو سینه ده
غم و درد و غصّه کشاکشین
یتیشنده شامه خرابه ده
یته جاق منه دم واپسین
اود اولوب نفس ایده جاق یقین
چخان آه نالمی آتشین
یری واردی اودلانا خشک تر
آلا بیر شراره رقیّه دن
..
..
بولورم ازلدن على منه
یتیشور نه رنج خرابه ده
بیزی شام و کوفه جماعتی
بولور اهل رنج خرابه ده
اولو مدفنیم تاپولور اودور
بو جهاندا گنج خرابه ده
او شرافتیله خرابه لر
یتوب اعتباره رقیّه دن
..
..
(1) على سالدى دور فلک سنی بولورم کناره سکینه دن
..
..
#راه_شام #صافی_تبریزی #ترکی #زبدةالاشعار
نظر دهید