دیدار حضرت رقیه (س) با پدر در قتلگاه
.
زبدة الاشعار
.
: @nohe_torki
.
حاج علیرضا امانی اردبیلی
.
تلّیدن سمت قتلگه اَندی
بی قرار اولدی بندیدن بندی
.
بابانون گئتدیگی یولون تاپدی
دلبرین اوچ یاشندا دلبندی
.
نَقَدَر منسجم اولور یارب
گولونن باغبان پیوندی
.
گلشنه باغبان حسینیدی
پس بو باغدا رقیّه سوسندی
.
شوره باخ نصف شب قارانلوقدان
قورخمادی قلب آرزومندی
.
یتیشوب مقتله او شوریله
سولدی گول تَک لَبین شکر خندی
.
ساغ سولوندا گوروبدی اجسادی
تَندی باشسزدی باشدی بی تندی
.
ایاقین قالخزوب اوخ اوستونّن
نیزه اوسته قویوب کَدَرلندی
.
سوئوشوب نعشیلر کنارینّن
حضرتین دختر هنرمندی
.
اوقدر گزدی قتلگاه ایچره
عاقبت اولدی خسته سسلندی
.
ددی بس هاردا قالموسان بابا جان
سنسا قلبیم گناهی سننّدی
.
ناگهان نصف شبده مقتلده
بیر چوخور یرده نور گورسندی
.
گورسنن نوریدن صدا گلدی
بیر صدایی کی لحنی شیوندی
.
بویوروب گل آی اوچ یاشندا ننم
سمت گودال قلبیمین بندی
.
من دورا بیلمورم قیزیم سن گل
طلب چاره ، چاره سیز دندی
.
او بالا قاچدی جانب گودال
کوسدی گئتدی اولونجه لبخندی
.
باباسن گوردی ایله بیر حالدا
نفسی سینه سینده گیزلندی
.
یخلوب قانلی پیکرین اوسته
کسیلن اللر اوندا ترپندی
.
قالخوب اوّل دعایه بازولر
بالانون بوینونا صورا اندی
.
او ایکی قول رقیّه بوینوندا
گل کیمین غنچیه گره لندی
.
کورپه قیز وصلین اشتیاقینده
بابانون یومدی گوز قوجاقینده
.
.
وصلیدن گول رقیّه تا دَردی
اشکی تک سوزدی لبلره دَردی
.
لبلرین قویدی نهر اولان حُلقه
یول یول اولدی یوزونده یول گردی
.
دئدی آی بی کفن سلامون علیک
یورگیم سینه ده مکدّردی
.
تاپمشام گر چه پیکرون امّا
یورگیم عودِ درده مجمردی
.
فکریده یول گَلَنده دِیدیم من
نَلَر ائتسم گوروشده بهتردی
.
.
ددیم اوّلده کی قوجاقلاشدوق
قویارام یوز یوزه رخ زردی
.
ائلرم ناز گویلومی آلسون
چون منه عادت مکرردی
.
لبلرون دیدیم ایلرم بوسه
لبلریم لبلرون چوخ ایستردی
.
ایندی بیلدیم یتیم ناز ائتمز
کیم یتیم اولسا غصه پروردی
.
ائلییم بوسه هانسی لبلردن؟
بو نئجه یئردی بو نه پیکردی؟
.
گلمیشم بوسه آلماغا، آلاّم
قسمتیم گرچه قانلی حنجردی
.
کسیلن حنجری اگر ئوپسم
منه مین قمچیه برابردی
.
سن کیمین یوخ آتا منیم تک قیز
بیزه بو غصّه لر مقدّردی
.
یاتموسان تپراق اوسته کونکسیز
سن کیمین شاهه بو نه بستردی؟
.
بیلمیوردی سویان ، بو پیراهن
یادگار بطول اطهردی؟
.
جسموه باخدوقیجا بیلدیم من
نَقََدَر جنگ نابرابردی
.
دئمورم دوغرانوب نیه جسمون
تانورام دشمن هانسی لشگردی
.
دئمورم یاره دور نیه سینون
بیلورم شمر کینه پروردی
.
دئمورم اوخلانوب نیه قلبون
دئمورم اوخ ندندی اوچ پردی
.
دئیورم دوشموسن یئره عریان
پیکرون گول مثالی پرپردی
.
بابا جان بو اوتوز مین اعدانین
یوخوموش یعنی بیر نفر مردی؟
.
سنی بو چولده قویمیا عریان؟
بو قوشون اُمّت پیمبردی؟
.
نَیینَن نعشووی ائدیم پنهان
اولانم باشدا پاره معجردی
.
سن دئنن باغری قان بالام لای لای
من دئیم بی کفن حسینیم وای
.
نه دئسم دردیدن بابا کم دی
قامتیم بارغصّه دن خم دی
.
چاتماسون کاش بو گجه صبحه
دلربا دلبریله با هم دی
.
گئینوب قاره کربلادشتی
دشتیده غرق حزن و ماتم دی؟
.
داغلان اتّفاقوه قربان
کربلاده بیلور محرّم دی
.
باشووی نیزه اوسته سانجبلار
اوجادورشه یئری مسلّم دی
.
مرتضانن ائوی اولا آباد
ئوزی تک اوغلودا معظّم دی
.
من گرگ شگر ائدم بو اجلاله
گورورم عزّتون فراهم دی
.
کاش اولیدی باشون قوجاقیمده
تا گوریدون یوزوم نه پر غم دی
.
یوزومه سیلی دگدی غارتده
بابانامرد اَلی نه محکمدی؟
.
ایندی بیلدیم نَلَر چکوب زهرا
یخلوب دورماقی مجسّم دی
.
دامنیم دوتموشیدی او قاچدم
شاهدیم بو لباس پارمدی
.
من قاچوردوم چکوردی اود شعله
فقهه اما رقیه اعلمدی
.
یاندیم اما کمک چیدن گئچدیم
چون دئدیم عفّتیم مقدّم دی
.
ولی بیلدیم بو دشتیده دشمن
بیزی ئولدورمه گه مسمّم دی
.
اونداکی اولدی خیمه لر غارت
گوردوم اعدانی غیر محرم دی
.
قورخودان منده چوللره قاچدم
بو سوزون محنتی بیر عالم دی
.
بیر تیکان دالداسندا اگلشدیم
صحنه سی فکریده مجسّم دی
.
یورقونیدوم خیاله گئتمیشدیم
منه بو حادثات مبهم دی
.
فکریده دئیدم اصغره لای لای
دئدیم آیا سو اولدی، سود اَمدی
.
ناگهان بیر ایاق سسی گلدی
منیلن غم همیشه با هم دی
.
دئدیم اعدادی تئز دوروب قاچدم
گورسه آهو خطر ایشی رم دی
.
گلدی بیر سس رقیّه جان قاچما (1)
تانیدوم من سسینّن عمّم دی
.
ایستورم اممیزه گئدم بابا جان
بو چولون سیری نا منظم دی
.
بوردا بیر سود امر ئولور تشنه
چوللره جاری نهر علقمدی
.
اوچ یاشندا بالا بیر عالم غم
بو قضایا امانی مبهم دی
.
(1) گلدی بیر سس رقیه جان قورخما
.
#شام_غریبان_امانی_اردبیلی
#قتلگاه
#تلیدن_سمت_قتلگه_اندی
#ترکی
.
زبدة الاشعار
.
: @nohe_torki
نظر دهید