روضۀ حضرت ابوالفضل (ع)
.
✍️زبدة الاشعار✍️
.
🆔: @nohe_torki
.
مرحوم غمکش
.
تلّین اوستونده ابوالفضل سسینی آلدی حسین
ئوز قویوب علقمه اول فاطمیه نور دو عین
دالیسیجاق ائلدی زینب اونون شیون و شین
گلدی قارداش باشینی قارداشی آلدی دیزینه
توکدی گؤزیاشینی حسرتله ابوالفضل ئوزونه
.
.
سسلدی سوزیله قارداش، دئمه قارداش ئولورم
گلمیشم دادوه بیرباش دئمه قارداش ئولورم
آلوب اطرافیمی اوباش دئمه قارداش ئولورم
بئلی سینسون بئلیمی سیندیرانون قارداش اویان
گؤزی چیخسون گؤزوه اوخ ویرانون قارداش اویان
.
.
زینبیم قالدی یامان گونلره یاتدی عَلَمون
یارالیدی اورگیم قدّیمی بوکدی بو غمون
قدسیانی گتورور نالیه آهی سینمون
دشت محنتده آدامسیزلاری قویما نگران
دور گدک خیمه لره قیزلاری قویما نگران
.
.
گؤزیاشیم درد فراقوندن عذاره دوزولر
آچماسون گؤزلروی دردیمی اشرار بولر
سس منه وئرمسون عبّاس، جفا اهلی گولر
بیلوسن سنسیز اخا یاوریم الان یوخدی
ال چالانلار آلوب اطرافیمی دشمن چوخدی
.
.
سو کیمین یاره لروندن آخوری قان باخورام
جان وئرورسن سو کنارینده لب عطشان باخورام
یانورام اودلانورام حالوه حیران باخورام
آچا بیلسون گؤزوی حالوی بیللم یارالی
منله بیر کلمه دانیش، غصّه دن ئوللم یارالی
.
.
سنسیز عبّاس حسینون گونی الحق قارادی
پیکرون باشدان ایاقه وای ابوالفضل، یارادی
دور گئدک خیمیه آخر بورا قارداش هارادی
عترتین باشینه آخر سنیدون سایه سالان
زینبین عزّتینی ایلمه بو چؤلده یالان
.
.
گئتمه سون خیمیه سن زینب دل خسته گلر
وای ابوالفضل چاغیرار خواهر وارسته گلر
الده سو جامی سوسوزلار باشوین اوسته گلر
قیزلاریم گلسه باشون اوسته قیامت ائلیر
گؤرسه اشرار بو احوالی شماتت ائلیر
.
.
گلمیشم باشوین اوستونده نه تاب و تبه من
یانورام آغلیورام سوزیله بو مطلبه من
گئتمه سون خیمه سرایه نه دئیوم زینبه من
نگراندی بیلورم ناله سی عرشه اوجالوب
مهربان زینبون عبّاس، گؤزی یولدا قالوب
.
.
سینه ده چوخدی ملالیم اورگیم قانه دؤنوب
بوکولوب قامتیم الان داخی چوگانه دؤنوب
بو ایشیقلی گونوزوم لیلۀ ظلمانه دؤنوب
سنسیز عبّاس داخی شمر، شریر اولمالیدی
قیزلاریم لشکر اشراره اسیر اولمالیدی
.
.
«غمکش» ای شیردلیم دائمی آغلار بو غمه
انتقامه چاغیرار قائمی آغلار بو غمه
اوخویار شعرلرین «ناعمی»، آغلار بو غمه
من عزاداریمی هنگام خطر ساخلیارام
حشریده هر ایکیسین مدّ نظر ساخلیارام
.
.
#عباسیه_شهادت
#تلین_اوستونده_ابوالفضل_سسینی_آلدی_حسین
#نوحه_های_محرم_غمکش
#ترکی
.
✍️ #زبدةالاشعار ✍️
.
🆔: @nohe_torki
نظر دهید