تمدن عصری دور فصل ترقی علم دورانی #حسینیه_یحیوی_اردبیلی

چکامه مخمس در علم و اقتدار امامت
ماجرای سلطان قیس
.
✍️ #زبدةالاشعار ✍️
🆔: @nohe_torki
.
مرحوم یحیوی اردبیلی
.
تمدن عصری دور فصل ترقی علم دورانی
ائدر سیر علم و صنعت پرده پرده اوج اعلانی
صنایعده بشر حل ایلیور مشکل معمانی
جماداتون وجودیندن تاپار ذرات رخشانی
نباتاتون بطونیندن چیخاردور آب حیوانی
.
.
فلز آلاتیله تشکیل وئروب بیر هیکل پردار
غذاسی بنز و اکسیژن رطوبت آتشه همکار
بشر علمیله اون تن آهنی یئردن گوگه قوزار
فضای شرق و غربه مختصر وقته اولور سیار
بو طی الارض مادّیلن گزر اطراف دنیانی
.
.
بو بیر مادی عوالمدور بشرده وار بئله صنعت
ولیکن اهل معناده وار اول اندازه ده قدرت
گئدر بیر آز زماندا عرش اعلایه ائدر رجعت
بو علمی چارده معصومینه الله وئروب خلعت
بولار دور معنویّتده جهان پیمای روحانی
.
.
هر اول کس بیلمسه بو قوه نی علم امامتده
عقیده اشتراکی وار طریق اهل بدعتنده
و یا اوز علمنون مثلین بولر نفس ولایتده
گوگی اوز آرشنیله أولچر اول بیچاره حکمتده
مثال چشمه فرض ایلر گوزینده موج دریانی
.
.
ریاضیّون هندی پیشگویان هنر پرور
عجایب سرنوشت مردمی قبلاً بیان ایئر
هواسنجان و کشتیبان و هیئت دان منجّم لر
هوانون یاغماقبین گون چخماقین بشگون قباق سویلر
تعالى الله یتورمش بو مقامه فکر انسانی
.
.
گتوردی آصف ابن برخیا بیر گوز وئروم آندا
سبادن تخت بلقیسی قوروب بزم سلیماندا
حروف علم الاسمادن واریدی بیرجه حرف اوندا
دگل بس اسم اعظم صاحبى عاجز بو جریاندا
عقیدون صاف ایله قویما کئچه مصباح ایمانی
.
.
دیدی اصحابه صادق یتمش اوچ حرف، أسم اعظمدور
بیزه یتمیش ایکی حرفین وئرن خلّاق عالمدور
قالان بیر حرفدور مخصوص أنت حیّ اعلمدور
بیزوک دریای علم ظاهر و باطن مسلّمدور
بیزه بو علم و فضلی حق تعالی ائتمیش ارزانی
.
.
سوروشدیلار امام باقر أول مولای والأدن
سنی حجت ائدوب البت نه مقداره بو دنیادن
بویوردی عرش و فرشه حجّتم کج گئتمه معنادن
تعجّله سوروشدیلار گینه اول شمس کبرادن
گورورسن سن مگر شرقیله غربی پست و بالانی
.
.
بویوردی من بو دنیانون سراسر هر یئرین گورّم
تمامی ماسوانی بیلدیگی دیللرله دیندیرّم
کئچن لردن گلنلردن کما کان من خبر وئرّم
هامینون عمرینی بیلّم امامم واقف سرّم
بیزه حیّ توانا بذل أئدوب بو فضل عظمانی
.
.
امامون حالت موت و حیاتی فرد یکتادور
امام ئولمز نظردن غائب آسا دائم احیادور
امام آئینه ی خلقتده هر موجوده بینادور
امام امر الهی دور بو أمر هر یئرده مجرادور
اوز أمریله منظم ساخلیوب حق کون امکانی
.
.
امام ئولسیدی باشی نیزه باشینده دانیشمازدی
امام ئولسیدی قوشلار نعشی اوسته شهپر آچمازدی
امام ئولسیدی استقبالینه ایرانی قاچمازدی
امام ئولسیدی زیر خیزراندا قانی داشمازدی
امام ئولسیدی مُسلم ایلینمزدی نصارانی
.
.
امام ئولسیدی قانلو گوزلرین طشتده آچانمازدی
کسوک باشی قولى باغلو عیالینه باخانمازدی
امام ئولسیدی راه شامده باشی دایانمازدی
امام ئولسیدی باشسیز پیکری نیم خیز اولانمازدی
دیوب اذان صداسی دولدورانمازدی بیابانی
.
.
بشر شکلینده دنیایه گلوبدور چارده معصوم
نقاب نوع انساندا رخ جانان اولوب مکتوم
نئجه فانوسده مصباحدن انوار اولور معلوم
اگر داش شیشه ی فانوسه دگسه ایله سه مصدوم
او صدمه آرتیرور مصباحه لمعات تجلّانی
.
.
بویوردی حضرت صادق منم سبط رسول الله
منیم سینمده دور جدّیم کیمی علم کتاب الله
کتاب اللهده مکنوندور اسرار خلق الله
بیزی الله ائدوب کان و یکون و کوندن آگاه
کف دستیم کیمی گورّم تمام علیا و سفلانی
.
.
امامون روحی نفسی علمی بیر یئرده اولون ایجاد
امام علم لدّنی لن گلوب دنیایه یا استاد
امامون روحی عالم اولماسیدی تا دم میلاد
آنا بطنینده ائتمزدی عبادت ذکرینی اوراد
تولد اولجاقین ساعت دئمزدی حمد ربّانی
.
.

امامون مایه ی ایجادیدور أوّل ده نور حق
اولوبدور نور پاک ذات حیّ و حقدن مشتق
دم ایجادیده روح امامه علم اولوب ملحق
مجهّز نور علم حقّیلن اولموش امام الحق
داخی لازم دگیل علم امامه بحث طولانی
.
.
بو اخبار و احادیث و تواریخ و روایتلر
امامون علم اعجازین ائدوبدور گون کیمی اظهر
کیمون ایمانی کاملدور نکول ائتمز قبول ایلر
کیمون سست اولسا ایمانی حدیثه ایلمز باور
اینانماز حیّ اموات ایلینده گورسه عیسانی
.
.
بیزه هاردا نماز اون یدّی رکعت دور دیوب قران
و یا قدر زکاتی سویلیوب تفصیلیلین سبحان
بولارون حدّ و میزانین پیمبر ایلیوب اعلان
یازوب تفسیر قرآنی امام صادق البرهان
بلی ساده دگیل علم ایستیور قرآنون عنوانی
.
.
علی ابن ابیطالب سراج مجلس اخیار
اولوب قرخ ائوده بیر ساعتده مهمان یا اولوالابصار
امامی حق بیلن ائتمز بلی بو معجزی انکار
اونون اوغلى حسینده ایلدی اوز قدرتین اظهار
ائدوب لمح البصرده طیّ کوه و بحر و صحرانی
.
.
چنانکه #قیس خوشبخت حکمران کشور هندی
وزیریلی قشوندان آیریلوب بیر جنگله اندی
قباقدان ناگهان بیر شیر وحشتناک گورسندی
تلاطیمه دوشوب سلطان هندون بنددن بندی
او شیرون صولتی تنگ ائتدی شاهه جنگلستانی
.
.
وزیره ائتدی فرمایش ندور تکلیف بو یئرده
که عیناً درک قیلدون قاصد مرگی برابر ده
گرفتار بلادور جانیمیز سر پنجه ی شِرده
مقدس شخصلردن ایستیک بیز چاره بو درده
به غیر از دست غیبی بو بلانون یوخدی درمانی
.
.
وزیر عرض ائتدی شاها نیت پاکیله اول زوار
چاغور عصرون امامین داده سن بو موسم دشوار
حسین ابن علی دلبند زهرا دن قیل استنصار
حسیندور مشکلاتی حل ائدن یوخ بو سؤزه انکار
حسین فی الفوری مشکلدن خلاص ایلر احبانی
.
.
دولاندیردی یوزین سلطان ادبله قبلیه ساری
دیدی ادرکنی یابن المرتضی سال یاده بو زاری
چتین وقتیمدی یا مولا اوزون گل قیل مددکاری
کمک یوخ دادرس یوخ اولمیشام شیرون گرفتاری
رضا اولما که درنده ائده طعمه بو نالانی
.
.
او ساعتدور همان ساعت حسین سلطان مظلومان
یاراللانمیشدی باشیندن جمالیندن آخاردى قان
قره دسمالیله باغلاردی باشین زینب نالان
بویوردی کلمه ی لبیک لبیک اول شه عطشان
نظردن غائب اولدی قویدی آغلار بنت زهرانی
.
.
حسین که غائب اولدی کربلادن آه واویلا
اوشاقلارون الینده قالدی تنها زینب علیا
دیه بیلم که عاشورادن آرتوق اولدی عاشورا
بالا قزلار دیور عمه هارا گئتدی بابام آیا
کیمه تاپشوردی غربت یئرده بیر عده یتیمانی
.
.
سؤالیم واردی یاران اوندا آیا نیله سون زینب
کیمه دلدارلوق وئرسون کیمی رام ایله سون زینب
سلامتدور مگر عباسی دردین سؤیلسون زینب
بو احوالاتی بیماره نئجه کشف ایلسون زینب
پریشان ایله سون بو قصه ده حال پریشانی
.
.
خلاصه قیس خوشبخت انتظار کشتی معنا
نه گوردی بیر سواره سمت جنگلدن اولوب پیدا
اوزی هم مرکبی قانه باتوب چون لاله حمرا
جلالت صاحبی دور صورتی گون تک جهان آرا
تجلّا ایلدوکجه ایلیور آفاقی نورانی
.
.
او دم شاه و وزیر حیرتده قالدی بو حکایتدن
دئدی افسوس هزار افسوس او پیکردن او قامتدن
قوتارمیش جنگدن اما قوتارماز بو هلاکتدن
فراموش اولدی اوز دردیم خداوندا بو حالتدن
الهی بو یارالی نون سن اول ایندی نگهبانی
.
.
گورنده شیر او شاه کاکل و بالین یغیشدیردی
سووردی باشینه تپراق ئوزین یئردن یئره ووردی
سوروندی ذوالجناحون خاک پایندن اوپوب دوردی
کمال عجزیله شه محضرینده بوینینی بوردی
أو حیوانون توکولدی قطره قطره اشگ چشمانی
.
.
نوازش ائتدی حضرت اوز دلیله شیر غرّانه
اذیت وئرمه هئچ یئرده بویوردی سن محبّانه
مواظب اول همیشه شیعیان شیر یزدانه
اشاره قیلدی گئتسون دور دست جنگلستانه
بو نحویله خلاص اولدی خطردن هند سلطانی
.
.
دئدی کیمسن سنه اولسون جلال و شوکتیم قربان
ندور علت یارالیسان یارووا عترتیم قربان
اوزوم اهل عیالیم ملک و مالیم ملتیم قربان
ایاقون تپراقینا جسم و جانیم دولتیم قربان
سنون حکمونده دور بو جنگلون درّنده حیوانی
.
.
بویوردی سن کیمون آدین دیلونده ایلدون اوراد
او آدون صاحبیندن ابتلاده ائتدون استمداد
حسینم کربلادن گلدیم ائتدیم من سنی آزاد
حقیقتله منى کیم سسلسه من ایلرم امداد
کناره چکمیشم چوخ چوخ سنون تک غرق طوفانی
.
.
سرازیر اولدی آتدان دوشدی تپراقه ذلیلانه
یوزی أوسته سوروندی خاک پای پاک سلطانه
دیدی ای شاه شاهان پیکرون باتمیش نیه قانه
بو نه عالمدى غرق اولموش وجودون تیر و پیکانه
منی آگاه ائله بو سرّدن شرح ائت قضایانی
.
.
بویوردی کربلا آدلو مکاندا لشگر اعدا
قلج چکمیش منیم قتلیمه سعد اوغلى ائدور دعوا
ئولوبدور قارداشیم أوغلوم معینیم قالمیشام تنها
اوزوم روز السته بو بلایه وئرمیشم امضا
همان گوندور بوگون أوتدان قوتارّام أهل عصیانی
.
.
دئدی سلطان قیس ای شهریار کشور عزت
قدم رنجه بویور پاتختیمه قوی جانیمه منّت
بیلورسن منده شاهم حکمران رعیت و ملت
اوتور سن تخت سلطانی ده بنده ایلیوم خدمت
صدور حکم ایله منده قویوم اجرایه فرمانی
.
.
هوا ایستی یارون چوخ تشنه سن گورّم یانور لبلر
منیم دربار مخصوصیمده وار حاذق اطبالر
قویوب مرهم سنی بو یاره لردن راحت ائتسونلر
عیالیم قزلاریم دائم پرستار اولسون ای سرور
ساغالسون پیکر پاکونده زخم تیر و پیکانی
.
.
و یا وئر اذن تا لشگر چکوم قانلی بیابانه
ووروم بیر أود بنای ظلم و جور قوم عدوانه
ئولن انصاروین قانین آلوم قان ایلیوم قانه
قویوم یوز تپراقا خیمه قباقینده ذلیلانه
ائدوم آسوده تشویش و بلادن آل طاهانی
.
.
بویوردی شاه لب تشنه منیمده ملک و مالیم وار
ایکی دنیایه سلطانم منیم آیری جلالیم وار
حرمخانم پرستاریم کنیزیم وار عیالیم وار
یولومدا منتظر چوخ دختران خرد سالیم وار
باجیم زینب منی گوزلر چکنمز درد هجرانی
.
.
امامون علمینه راجع یازوبسان «یحیوی» اشعار
مسلّمدور اونا شاهد وار الده معتبر اخبار
امامون علمینه هانسی خبرده داش ترازو وار
طرفداران حق ایستر قالا دنیاده بو آثار
چکر آل محمّد سمتینه بو سؤز مسلمانی

.
.
#حسینیه_یحیوی_اردبیلی
#حسینیه_شهادت #سلطان_قیس
#تمدن_عصری_دور_فصل_ترقی_علم_دورانی
#ترکی
#اسرار_عاشورا
.
✍️ #زبدةالاشعار ✍️
.
🆔: @nohe_torki