ورود کربلا
زبانحال حضرت اباعبدالله الحسین (ع)
.
.
مرحوم حقیر خویی
.
.
توکندی راه منزله یتیشدی کاروان باجی
اولور على عیالینه بو سرزمین مکان باجی
بویردی کربلا باجی
محل ابتلا باجی
اولوب بو یرده انبیا
بلایه متبلا باجی
.
.
بو یرده نوح نوحه گر اولوب دمادم آغلیوب
خلیل کربلایه چوخ خلیل و آدم آغلیوب
نه انبیا نه اولیا تمام عالم آغلیوب
هنوز ناله ایلوری زمین و آسمان باجی
.
.
گلور حواله حقّدن عطیّه دور بلا منه
ایدوبدی صاحب بلا بلانی آشنا منه
گورنده شاهد ازل شهادتی روا منه
مقابلینده گر ویرم روادی باش و جان باجی
.
.
ازل کی گونده باغلانوب شهادته معاهده
شهادت ایلرم اؤزوم نه حاجت اوزگه شاهده
بشرط شاهد ایلیه شهیدینی مشاهده
بسان چشمه سینه دن اولاندا قان روان باجی
.
.
گرک او عهدیمه وفا ایدم که حق گواه دور
بو من بو کربلا یری بو عرصه وعده گاهیدور
بو خاک پاک مدفتیم او حفره قتلگاهدور
باخ ایت درست ایمدیدن همان یری نشان باجی
.
.
گلنده باشیم اوسته گل او گورسنن چوخور یره
یارالی قان ایچینده باخ بو پاره پاره پیکره
چتیندی گر چه قارداشین باجی او حالیله گوره
ولیک گلمسون سنه بو امر چوخ گران باجی
.
.
مقام عشق و صبرده بلادن ایلمه گِله
مقابل بلاده لا گتورمه مطلقا دیله
کمند عشقه شوقیله بویون قویوب بو سلسله
بلى وفالی عاشقی ایدلّه امتحان باجی
.
.
گلور حسینی گورماقا بو کربلایه فاطمه
باخان زمان بو اللره اولان جفایه فاطمه
سالار تزلزل عالمه گلر نوایه فاطمه
ایدر خمیده قامتین جفای ساربان باجی
.
.
قلجلاریلا دوغرانار نئجه جوان برادریم
دوشر بویوم برابری برابریمده اکبریم
الیمده غنچه گول کیمی سولار سوسوزدان اصغریم
وورالا تشنه حلقینه خدنگ خونفشان باجی
.
.
قویاندا شمر چکمه لی قدم یارالی سینه مه
آماندی قویما آغلاسون تسلّی ویر سکینه مه
آنالیق ایت گجه گونوز بو بلبل مدینه مه
یاتاندا سینن أوسته ویر بو طفله آشیان باجی
.
.
کمند ظلمه باغلانور بسان آهوی حرم
مخدّرات حجلۀ حیا حریم محترم
باشی کسیک عیالیمی گیدونجه شامه گوزلرم
اولور کسیک باشیم سیزه جداده پاسبان باجی
.
یزید مجلسینده ده سیزی رعایت ایلرم
کلام حقّی من سیزه باخوب تلاوت ایلرم
گورر کلام حقّیله سیزه محبّت ایلرم
ایدر سوسوز دوداقیمه اشاره خیزران باجی
.
.
یوخوندی تاب ایشیتماقا دیسم جفای شامدن
او ظلملر عیالیمه که اشقیای شامدن
گلور وقوعه شمّه ای او ماجرای شامدن
ایدر اشاره نظمیله «حقیر» یمیز بیان باجی
.
.
.
#ورود_کربلا #حقیر_خویی #ترکی #زبدةالاشعار
نظر دهید