زبانحال حضرت مسلم (ع)
.
✍️ #زبدةالاشعار ✍️
.
🆔: @nohe_torki
.
مرحوم حسینی زنجانی
.
جانه گتوردی مسلمی دور زمانه یا حسین
کوفه ده عمریمون گلی دوندی خزانه یا حسین
.
.
چرخ ولایتون حسین یاره لی شاهبازیم
کوی محبتون بوگون عاشق پاکبازیم
مسلمم عشقوین آقا فدیۀ سرفرازیم
عشقیم عیاندی حاجتی یوخدی بیانه یا حسین
.
.
ای آدی آل هاشمه مایۀ فخر و آبرو
روز ازلده تاپمیشام بیر سنون عشقویله خو
حیف ئورگیمده عاقبت قالدی منیم بو آرزو
چاتمادی اللریم ایله کهف امانه یا حسین
.
.
مندن حسین کسوب قدر قهریله اعتناسینی
سالدى قضا کمندینه درد و غم آشناسینی
زاغ و زغن اسیر ایدوب برج وفا هماسینی
ظلم اوخونا فلک منی ایتدی نشانه یا حسین
.
.
صدق و صفا مسیرینی اهل نفاق ایتوردیلر
بوتۀ جوریده جفا خارین اکوب بتوردیلر
ظلم لرین نهایته کوفه لیلر یتوردیلر
بیع و شراده ساندیلار سودی زیانه یا حسین
.
.
ایتدی یولومدا یا حسین مکریله کوفیان کمین
دام بلایه سالدی بویاره لی شیری مشرکین
دورمی آلدى باغلیوب قولاریمی گروه کین
قتلیمه آختارور زیاد اوغلی بهانه یا حسین
.
.
قویمادی دهردون منی بیرده یتم وصالیوه
اللریوی ئوپوب باخام حسرتیله جمالیوه
صدمه یتشمسون گوروم سلطنت و جلالیوه
سنله ویروب خدا شرف کون و مکانه یا حسین
.
.
.
عشق سفیرم حسین گرچه باشی بلالیام
کوفه ده یالقوزام تکم یوخ کمکیم یارالیام
سندن اوزاق سالوب منی دست ستم آرالیام
آیریلقوندی دوندرن اشگیمی قانه یا حسین
.
.
ماه سپهر عشقوی رؤیت ایدنلر ئولدورور
مسلمی اللرین ئوپوب بیعت ایدنلر ئولدورور
نامه یازوب حضوریوه دعوت ائدنلر ئولدورور
عار اولا بیله میزبان بیله جهانه یا حسین
.
.
دگسه سنین یولوندا مین یاره بو زاره یوخ دیمم
یاره لی جسمیمی اگر چکسله داره یوخ دیمم
دونسه گوزومده گوندوزوم یاشب تاره یوخ دیمم
گیتسه باشیمدا لا دیمم نوک سنانه یا حسین
.
.
.
بسکه گیدوبدی قان سالوب پیکریمی توانیدن
پیک اجل یتوب داخی آیریلورام جهانیدن
دار بقایه عازمم ایندی بو دار فانیدن
ایلوری روحیمون قوشی عزم جنانه یا حسین
.
.
قویمادی کینۀ زمان کامه چاتا بو خونجگر
ایلدی ایکی اوغلومی آخر عم اوغلی دربدر
قالدی خدیجه نین گوزی یولدا ئولونجه دیده تر
بیرده چتین آچوب وورا زلفینه شانه یا حسین
.
.
ئولمگیمی ایشتسه گر قویما خدیجه آغلاسین
وای بابا وای دیوب یانوب قلب جهانی داغلاسین
گل یوزه گوزیاشی توکوب باشینه قاره باغلاسین
هر شب و روز گلمه سین آه و فغانه یا حسین
.
.
مسلمه عزّتیله ای یولدا دوتان عزا حسین
دوت الینی، حسینی نون ، ای شه کربلا حسین
ایله کرم ئورکده کی دردینه قیل دوا حسین
ذکری اولوبدی دیلده هر آن یانایانه یا حسین
.
.
.
.
#مسلمیه_حسینی_زنجانی
#جانه_گتوردی_مسلمی_دور_زمانه_یاحسین
#ترکی
.
✍️ #زبدةالاشعار ✍️
.
🆔: @nohe_torki
نظر دهید