خواب دیدن حضرت زینب(س)
#گریز به #وداع
.
✍️ زبدة الاشعار ✍️
?: @nohe_torki
.
مرحوم انور
.
کیمدی زینب بیر نمونه قدرت قهّاریدن
کیمدی زینب رمز رحمت، رحمتِ داداریدن
.
کیمدی زینب کهکشان عفّتون روشنگری
فرد اعلا خاندان احمد مختاریدن
.
کیمدی زینب جدّی خاتمدور که کوه نوریده
اِقرأ باسمِ درسین آلدی چیخدی فاتح غاریدن
.
کیمدی زینب باب والاسی علی المرتضی
اخذ ائدوب فیض ولادت بیت ذوالاستاریدن
.
کیمدی زینب زادۀ ناموس یکتا فاطمه
روح عصمت یاره گوردی سینه سی مسماریدن
.
کیمدی زینب خواهر سبطین ختم الانبیا
رتبۀ فخر الائمّه اخذ ائدوب اخیاریدن
.
کیمدی زینب کاخ عزّتده فروغ جاودان
صفحۀ تاریخه زینت قویدوقی آثاریدن
.
کیمدی زینب خطبه سی پرشور و احساس آفرین
طرز گفتاری مطابق حیدر کرّاریدن
.
کیمدی زینب قهرمان انقلاب کربلا
اولمادی زانوسی خم تبعیدیدن کشتاریدن
.
کیمدی زینب منطقی دربار شامون فاتحی
ایلدی الغای قدرت مفسده درباریدن
.
قابلیّت منده یوخدور زینبون تعریفینه
فکر محدودون نه ربطی مدح دامن داریدن
.
زینبون تعریفین ایستورسن سوروش سجادیدن
چارمین شخصیت والای هشت و چاریدن
.
گئت زیارت نامه سین ایله قرائت گور نه وار
مدرک ارزنده دور تجلیلینه اعصاریدن
.
وجه اجمالیله شرح اولدی سوزون دیباچه سی
بیر روایت وار یازوم فیض ایستورم حضّاریدن
.
چار ساله یدی او گونلر که بتوله نایبه
واقفیدی مکتب عرفانیده اسراریدن
.
صبح وقتیدی اوجالدی آسمانه ناله سی
آغلادی رام اولمادی بیر لحظه آه و زاریدن
.
فاطمه آغوشینه آلدی دئدی دردون ندور
قلبیمون آرامشی سلب اولدی بو رفتاریدن
.
دردینی گیزلتدی زهرادن او شیرین دیل بالا
برگ سرّین وئرمدی غم بلبلی منقاریدن
.
حضرت طاها ائشیتدی زینبون افغان سسین
همجواره سس چاتار فی الفوری هم دیواریدن
.
سسلدی زهرا گتور وئر زینبی آغوشیمه
حیدرون عطرین آتون آلسون گل بی خاریدن
.
دردمندون نبضینی دوتسون دانیشدیرسون طبیب
نسخۀ حکمتله دردین رفع ائدم بیماریدن
.
فاطمه تسلیم ائدوبدور زینبی پیغمبره
آلدی آغوشه سیلوبدور گوزیاشین رخساریدن
.
قیلدی فرمایش قیزیم درد ضمیروندن دانیش
هر غمون واردی علاجین ایسته بو غمخواریدن
.
ایستورم زهرانی من سنده علی زهراسی سن
رتبه ده زهرای ثانی سن همین اقراریدن
.
مصطفی اظهار درد ائتدی گلوب زینب دیله
جدّینی غمگین ائدوبدور نحوۀ گفتاریدن
.
گورموشم عرض ایلدی بیر خواب وحشت زا بابا
قورخودان دوشموش قوای فکریم استقراریدن
.
صادق اولسا بو یوخی ایوای منیم اقبالیمه
خوش گونوم اولماز بابا ایّام محنت باریدن
.
عالم خوابیمده گوردوم بیر بویوک صحرادیم
سهمگین بیر غملی چولدور خالیدور دیّاریدن
.
قوپدی بیر طوفان وحشتناک او چولده ناگهان
تیره اولدی گوندوزون سیماسی لیل تاریدن
.
ایستدی یللر آپارسون زینبی بیر برگ تک
چوخ هراس ائتدوم او طوفان بلا کرداریدن
.
بیر آغاج گوردوم او صحراده بلند و شاخه دار
پوشش زیباسی وار برگ زمرّد واریدن
.
من او پُر شاخه درخته دالدالاندوم هولناک
روحیم آرامش تاپا صحرای طوفان داریدن
.
شدت طوفان همان زیبا درختی قهریله
ریشه دن ائتدی جدا یخدی یره اجباریدن
.
سرنگون اولدی آقاج دوتدوم بابا بیر شاخه دن
شاخه نی سیندیردی یل ال چکمدی آزاریدن
.
شاخه نی تکراری ناچار ایلدوم دورت یول عوض
دوردیده سیندی نتیجه آلمادوم تکراریدن
.
آخرالامر اسدی بیر یل تار و مار اولدی آقاج
سبز رنگی برگ لر آیریلدی شاخساریدن
.
برگ برگ اولدی او یاپراقلار داغیلدی چوللره
گل نجه سولسا چیخار گردونۀ گلزاریدن
.
برگ تک طوفان منی آلدی بابا آغوشینه
قهریله ائتدی کنار اول وادی همواریدن
.
چکدی آغلار زینبی داغدان داغا چولدن چوله
یوردی چوللرده منی کچدی غمیم معیاریدن
.
جدّی خاتم ائتدی فرمایش قیزیم دوزدور یوخون
استراحت یوخ سنه دنیای افسونکاریدن
.
گوردوگون صحرا بو دنیادن عبارتدور قیزیم
بی محبتدور همیشه زمرۀ اخیاریدن
.
اُول آقاج که ائتموسن رؤیت قیزیم من جدّووم
شاخه و برگیم مصفّادور هامی اشجاریدن
.
دوتدوقون دورت شاخه لر که بیر به بیر سیندیردی یل
آدلارین اعلان ائدوم اول ملتفت آماریدن
.
مرتضی دور فاطمه اوغلوم حسن اوغلوم حسین
هر بیری بیر نحویله ضربت گورر اغیاریدن
.
گوزلرین سن باغلیارسان بیر به بیر غیر از حسین
وار اونوندا علتی معذور دوت اظهاریدن
.
زینبون تعبیر خوابی اولدی سوزان مرثیه
سرنوشتین درک ائدوبدور مُخبرِ اخباریدن
.
رویداد صحنۀ طوفانی گوردی بیر به بیر
استراحت گورمدی ایّام رقّت باریدن
.
کربلایه چکدی طوفان حضرت زهرا قیزین
جوهر دل گوزیاشین توکدی یوزه ابصاریدن
.
آخرین شاخیکه جدّیندن قالوردی یادگار
آخرین سرسلسلیدی زینبه ابراریدن
.
خیمه لردن آیریلور گوردی اودا الدن گئدور
شاه واحد باشلیوب یول مقتله درباریدن
.
پا پیاده قاچدی دالدان سسلدی قارداش دایان
سروریم گئتمه جلو چک مرکب رهواریدن
.
دردمندم مبتلایم بی پناهم چاره سیز
غصه مرگ اولّام اگر منع ایلسون دیداریدن
.
شاهراه عشقیده منلن حسین اول روبرو
هانسی دلدار آیریلوب بو نحویله دلداریدن
.
الله عالمدور حسین سنده بیلورسن دردیمی
دویمیوب زینب باجون اول صورت گُلناریدن
.
آند اولا زهرایه قارداش چوخدا زحمت وئرمرم
مقصدیم آذوقه اخذ ائتمکدی بو اصراریدن
.
بیرده بیر سرّی وصیّت واردی زهرادن منه
خیمه ده شرح ائتمدوم گیزلتمیشم قیزلاریدن
.
امر زهرادور حسین حتماً گرک اجرا اولا
طایر روحی کوسَر یوخسا من بی یاریدن
.
ائتمسم بوسه بوغازون قویمارام الدن سنی
تند گئتسون تند گلّم ساخلارام پیکاریدن
.
عشق زینب سدّ راه ائتدی حسینی ساخلادی
مجلس الفت غرض خلوت اولوب انظاریدن
.
باجی قارداش روبرو اولدی باخوبلار بیربیره
آه حسرت قوزانوب عرشه ایکی ناچاریدن
.
زینبون حالین پریشان گوردی چوخ مظلوم امام
اولما قورخورسان دئدی بو صحنۀ دشواریدن
.
اضطراب ائتسون باجی پیمانیمیز ناقص قالار
عاشقه پروا نباید زحمت بسیاریدن
.
عاشقون غم صحنه سینده تیتره مز زانولری
باوفا عاشق گرک پیگیر اولا ایثاریدن
.
کاروان گئتدی حسینون گئتمه سین بس نیلسون
قالمیوب بیرکس مهاجردن و یا انصاریدن
.
سسلدیم هل من معین بیرکس منه سس وئرمدی
ناامید اولدوم باجی فریاد استنصاریدن
.
هر بلاده سن منه همگام و هم پیمانسن
اولموشوق هم جرعه بیر پیمانۀ سرشاریدن
.
آز قالور طوفان داغیتسون چوللره یاپراقلاری
آز قالور شوریده بلبللر پر آچسون ناریدن
.
من سنون امّیدیوه قویدوم حریم عصمتی
انتظار حرمتیم وار سن کیمی سرداریدن
.
قویما گوزدن گوزله وحشت گورمیَن قیزلاریمی
قمچیلر قالخوب اننده فرقۀ اشراریدن
.
غشّ ائدن اولسا یاناندا خیمه لر بیدار ائله
چونکه بیهوشه کمک مطلوبیدور هشیاریدن
.
ایله فکر ائتمه مصیبت کربلاده ختم اولور
قاره گون یولداشدی سنله قبره تک گهواره دن
.
ایستیور طوفان سنی زینب آپارسون کوفیه
ایلمه پروا باجی بدفطرت استانداریدن
.
باشوی یارسون منه خاطر یاراسین باغلاما
لخته قانون زلفیده گئت مجلسه بازاریدن
.
ویرسا هر تهمت زیاد اوغلی منه تئز ردّ ائله
همّت ایله انتقام آل حاکم جبّاریدن
.
کوفه ده اخلالگر قویموش حسینون آدینی
زایل ایله بو توزی آئینۀ افکاریدن
.
دور ایاق اوسته یورولسوندا یتور بو صحبتی
مست لر قدرت آلانمز مردم بیداریدن
.
رهبر اولماز ملّته سگباز و میمون بازیدن
حاکم اولماز امّته هر مردک میخواریدن
.
قلبوه تیر شماتت ویرسادا محکم دانیش
عیبی یوخ زندانه ده گئتسون اگر تالاریدن
.
#زینبیه_مدح
#وداع
#کیمدی_زینب_بیر_نمونه_قدرت_قهاریدن
#انور_اردبیلی
#قیام_زینب_انور
#ترکی
.
✍️ #زبدةالاشعار ✍️
?: @nohe_torki
نظر دهید