جان رقیه یومولان گوزلره عمون قربان #حضرت_رقیه_انور_اردبیلی

حالات حضرت رقیه علیها سلام
.
.
مرحوم انور اردبیلی
.
.
جان رقیه یومولان گوزلره عمّون قربان
سارالان صورت خوش منظره عمّون قربان
.
.
دینجل ای صورتی غم لاله سی، نیلوفری قول
قسمت اولدی سنه ده غملی آنام گتدیگی یول
اینجدون مندن عزیزه بالا گیت مهمان اول
قول قابورقاسی سنان مادره عمّون قربان
.
.
زینبون اللری افسوس الوندن اوزولوب
آنامون گوزلرینون بنذری گوزلر سوزولوب
آلنووا درّ کیمی گورنه سویوق تر دوزولوب
طاق ابرولرون اوسته تره عمّون قربان
.
.
دل شب لرده شیرین دل بالا هی قالدون اویاق
شهپرون یاندی شرار غمه پروانه سیاق
نه لباسون تزه لندی نه تلون گوردی داراق
بنذرون اولدی گل پرپره عمّون قربان
.
.
خرمن عمروه غم ایلدریمی شاخدوقجا
آخدی اشکیم یوزومه اشک ترون آخدوقجا
دویمادیم باخدیم اوچ ایل صورتوه باخدوقجا
هی دیدیم صورته صورتگره عمّون قربان
.
.
خوشدی تاریخده پربسته هما قالسا آدون
گیجه گوندوز قفس غمده مگر آغلامادون
وردی صیاد بداندیشه گویردی قنادون
قلمچیلر نیلی ایدن شهپره عمّون قربان
.
.
هاردا گنج علوی اولسا بیوک قیمتی وار
نه خوش اقبال یریمش بو اوچوق کهنه حصار
جسموه نرم ترابی اولاجاق بستر وار
سنی آغوشه آلان بستره عمّون قربان
.
.
من دیدیم زینب ئولر دردینه سن آغلارسان
اوخشاموندا وار اثر سینه لری داغلارسان
چکدیگم زحمته خاطر قره می باغلارسان
باغلادیم من قره اوستن قره عمّون قربان
.
.
لکه سالمشدی هوا آق گله بنذر یوزوه
دوشمشیدی لکه آئینه کیمی هر یوزوه
توکلوبدور هوروگون چگنوه تل لر یوزوه
ساچلارا طرۀ بی معجره عمّون قربان
.
.
منه باخما آنووا باغ سخلوب بیر بوجاقا
یوزه چکمش لچگین باشنی سالمش آشاقا
چون مقیّد دی بی بوندن گله بلمور قاباقا
قالدی حسرت سنه هم اصغره عمّون قربان
.
.
گلدی دیدار ایده سندن بو گیجه میر انام
آلدون آغوشوه مست ایتدی سنی عطر امام
قوجاقوندان یره باش دوشدی دیدیم ئولدی بالام
هم سنه هم او سر اطهره عمّون قربان
.
.
عشقوین پایه سینی ایلدون عالملره فاش
خسته جانون سرِ جانانوه اولدی شاباش
بیله ئولمک منه ده قسمت اولیدی ای کاش
جان ایدیدی سر بی پیکره عمّون قربان
.
.
گلسه غساله یووار جسموی ظلمتده نجه
کاش اولیدی چراغیم روشن ایدیدوم بو گیجه
گتوریدوم یوئوجی غسلوى قویمیدی گیجه
دل شب یاخشیدی خیر ایشلره عمّون قربان
.
.
نکته باریکیدی گوندوز سنه غسل اولسا اگر
اوندا کی غسل ویرن کوینگوی خارج ایدر
تازیانیله گویرمش بدنی هامّی گورر
حشر اولار عترت پیغمبره عمّون قربان
.
.
#حضرت_رقیه #انور_اردبیلی
#حضرت_رقیه_شهادت
#جان_رقیه_یومولان_گوزلره_عمون_قربان
#صدای_عاشورا #ترکی
#زبدةالاشعار