اربعین
.
.
سید مسعود نقیب
.
.
جان عالم سنه فدا زینب
ای بتول علی نما زینب
.
ای شجاعتده حیدره بنظر
شیر میدان هر بلا زینب
.
کان صبرو وفا وحجب و حیا
معدن غیرت و حیا زینب
.
سن حسیندن سورا بلا چولونون
اولموسان قهرمانی یا زینب
.
سنیلن اولدی تا بوگون باقی
نهضت سرخ کربلا زینب
.
کوفه ده شام ده او خطبه لرین
ویردی بو نهضته بقا زینب
.
.
اربعین ده او وضع حالتووی
نقل ایدوبله بئله ملالتووی
.
.
گلمیشم کوی یاره دور قارداش
کربلایه دوباره دور قارداش
.
گلمیشم اربعین دی درد دله
محضر با وقاره دور قارداش
.
اوندا که اشقیا بو گل بدنی
ایتدیلر پاره پاره دور قارداش
.
ایستورم خیمه لر یانان وقتدن
ائیلیم بیر اشاره دور قارداش
.
کوفه ده باشیمه گلن آلام
قلبیمی ائتدی یاره دور قارداش
.
شامیده چکدیگیم مصیبت لر
گلمز آخر شماره دور قارداش
.
.
زینبم گلمیشم بلا چولونه
غم قطاریله نینوا چولونه
.
.
ای اولان جسم اطهری پرپر
گلمیشم قبرون اوسته دیده سی تر
.
گلمیشم غملو کاروانیله
هر بیری شرح حالی مین دفتر
.
هاردادی سود امر علی اصغر
آلتی آیلیق او نو گل احمر
.
ماه نیکو خصال آل علی
شبه ختم رسل ، علی اکبر
.
قارداشیم نوردیده سی ، قاسم
خوشدل وخوشبیان و خوش منظر
.
قولسوز عباسیم هاردادی قارداش
شرح حال ائیلیم اونا یکسر
.
.
کوفه ده ، شام ده ، مصیبتیمی
چکدیگیم درد و رنج و محنتیمی
.
.
ظلمی تا اوندا کی فزون گوردوم
کوفه اهلین عجب زبون گوردوم
.
سو کنارینده تشنه لب قارداش
آل طاهانی غرق خون گوردوم
.
خنجرین برقینی چئخور یرده
الده آلمیشدی شمر دون گوردوم
.
آتلاری چاپدراندا اهل جفا
هلهله ایتدیلر قشون گوردوم
.
خیمه لر اودلانان زمان ، قارداش
اوود وورانلاردا بیر جنون گوردوم
.
ائیله بولدوم قیامت اوز ویردی
عرشیلن فرشی واژگون گوردوم
.
.
آل طاها اوگون اسیر اولدی
گوزلریم اشک هجریله دولدی
.
.
اهل کوفه اولوب اوگون آگاه
کوفه یه چون یتیشدی آل الله
.
گلدی لر یکسره تماشایه
ایتدی لر هلهله او قوم تباه
.
بیری وهن ائیلدی بیری تحقیر
بسکه اولموشدولار بولار گمراه
.
اوتوروب تختیده زیاد اوغلی
مجلس آراسته اولوب ، آنگاه
.
آچدی نالایق آغزینی ملعون
دیدی الله یزیده اولدی پناه
.
گوردوم اونداکسیک باشون قارداش
سسله دی ” لا اله الا الله ”
.
.
قوزانوبدور گویه اوگون فریاد
پوزولوبدور بساط ابن زیاد
.
.
توکدولر اهل فتنه برنامه
اسرانی آپاردیلار شامه
.
یولدا منزل به منزل آل رسول
مبتلا اولدی چوخلو آلامه
.
لطف حقدن ،عزیز اولوب راهب
فتنه گر لر ولی دوشوب دامه
.
اوتوروب تخت سلطنتده یزید
گییونوب زرق و برق لی جامه
.
خیزران الده مست و لا یعقل
فخرایدوب دوراوگون یتوب کامه
.
فکرایدوب دورکه فتحه نائل اولوب
آرزوسی چاتوب دی اتمامه
.
.
بیلمیوب دور بوقان کی جوشه گلر
بحر تک دم به دم خروشه گلر
.
.
زینبم دور باجون سنه قربان
وار سوزوم عرض ایدیم سنه ای جان
.
کوفه ده ائیله دیم اوگون محشر
خلق ایچینده حقیقت اولدی عیان
.
شام ده بزم مجلسین پوزدوم
کاخ بیدادی ائیله دیم ویران
.
صبروحجب وعفاف وایثارین
درسین ایتدیم اسارتیمله بیان
.
انقلابین اوزون ،سوزون ،هدفین
اهل دنیایه ائیله دیم اعلان
.
نهضتین آرمانیله ، اثرین
قویمادیم دشمن ائیله سین پنهان
.
.
زینبم گلمیشم زیارتیوه
اربعین دی بوگون عیادتیوه
.
.
.
#اربعین #سیدمسعود_نقیب
#جان_عالم_سنه_فدا_زینب
#ترکی
#زبدةالاشعار
نظر دهید