جان ویرن وقته حسین قاری قرآن یوخودی #حسینیه_مضطر_اردبیلی

شهادت امام حسین (ع)
.
زبدة الاشعار
.
: @nohe_torki
.
مرحوم مضطر اردبیلی
.
جان ویرن وقته حسین قاری قرآن یوخودی
نعشنون اوسته اوزی آیۀ قران اوخودی
.
.
گوردی اول حالیکه کسدی باشینی شمر دنی
ایله خالدا قالاجاقدور یوزی اوسته بدنی
کیمدی قرآن اوخیان قبلیه کیم دوندرنی
نعشنون اوسته اوزی نیزده قرآن اوخودی
.
.
قوجا وقتینده آتاجان ویره گر رسمیدی بو
اوغلی قرآن اوخیوب گاه توکر حلقنه سو
نوجوان اوغلون اوزوندن قاباق اولدوردی عدو
نعشنون اوسته اوزی آیۀ قرآن اوخودی
.
.
گوردی زهرانی او گودالیده غمگین دایانوب
معجرین زلفین ایدوب قانیله رنگین دایانوب
نه دیلیلن گرک آخر ویره تسکین دایانوب
نعشنون اوسته اوزی آیۀ قرآن اوخودی
.
.
جدینی گوردی گلوب ناله و داده باش آچوق
یوخدی نعلینی ایاقینده پیاده باش آچوق
بیر تَنَحنُح ایلدی اوندا جداده باش آچوق
نعشنون اوسته اوزی آیۀ قرآن اوخودی
.
.
گوردی قاتل داخی فارغ اولوب اوز کاریندن
قطره قطره قان آخار خنجر خونخواریندن
دُرّ سپدی یره لعل لب دُرباریندن
نعشنون اوسته اوزی آیۀ قرآن اوخودی
.
.
بسکه قرآن سسینه فوج ملک مایل اولور
هر مکاندا اوخونا دسته ایلن نازل اولور
ولی بو یرده گلن حضرت جبرائیل اولور
نعشنون اوسته اوزی آیۀ قرآن اوخودی
.
.
شرح احوالی مجسم ایله مضطر گوزووه
آل بیاناتیوه تأیید فصاحت سوزووه
بیر یازوب بیر دایان آغلا دئگیلن ئوز ئوزووه
نعشنون اوسته اوزی آیۀ قرآن اوخودی
.
تَنَحنُح = گلو روشن کردن
.
#حسینیه_مضطر_اردبیلی
#حسینیه_شهادت
#جان_ویرن_وقته_حسین_قاری_قرآن_یوخودی
#ترکی
.
#زبدةالاشعار
.
: @nohe_torki