جمال یار کی خالیدی خال خجلتدن #حسینیه_هندی_تبریزی

حالات حضرت سیدالشهدا (ع)
وداع و شهادت
.
.
.
مرحوم هندی تبریزی (1)
.
.
جمال یار کی خالیدی خال خجلتدن
کسوب مشاهده سین چشم بی بصیرتدن

تظلم ایلمه آئینه صاف و روشن دور
سن اوز جمالوی پاک ایت غبار ظلمتدن
.
مگر تجسم اعمالدن یوخوندی خبر
که جبریلن گوروسن حُسن و قُبحی فطرتدن

قبول مسئله سین چون قبول ائتمه میسن
داخی دگل سنه لایق دیم لیاقتدن

ایکی پول اوسته هَدَینائلن یازوب اعلان
اوخور منادی قرآن لسان حکمتدن
.
که شکر و كفره على الاختیار آچوقدور یول
آچوقدی یول سیزه هم کفر و هم هدایتندن

همیشه دایرۀ عشقدن فقیر حقیر
یتوب مراتب علیایه حُسن سیرتدن
.
مقرّبین سنوخ صف فنا فی الله
لباس جسمده عاری دی شکل و صورتدن
.
دگول تمیز ویرن خیر و شرّی مرشد اوزی
مکاشفات اوزینه کشف ایدر کرامتدن
.
اجابت ایتمیه درویش داعی اللهی
نه وار ثمر بو دعادن نه ورد و دعوتدن
.
زلال رحمته یتمز سلوکیله عارف
شریعه شرعده جاریدی گیچ طریقتدن
.
او ال که دست ارادت وروب یداللهه
دگول امید الی نومید بابا رحمتدن
.
گر ایسته سن اولا روشن شروط حب الله
نجه ظهوره گلوب خاندان عصمتدن
.
حسینی گور که او وسعت ویروب بو دایریه
دوروبدی اوج شهامتده فرط همّتدن
.
ازل گوتوردی عیالین ایدوب جلای وطن
اولوب ریاضتنون ابتداسی غربتدن
.
صحابه صاحبی اصحابی وئردی صاحبینه
آیردی دستۀ أحبابی قید أُلفتدن
.
اوخوندی حکم وفا هاشمیلرین آدینا
مخدرات حرم چکدی ناله محنتدن
.
قویوب عروسینی داماد وصلنه حسرت
او داغ و حسرتی چون گوردی چیخدی حسرتدن
.
حناسی قرمزی قان قتلگاهی حجلۀ ناز
او عیشه باشینی شاباش ایتدی عشرتدن
.
گیندیروب بزیوب جان و دلدن ال چکدی
علی اکبر مَه روی و مهر طلعتدن
.
کفن قویاندا یوزینی عسلی ایاقینه
خبر ویروب قد موزونیله قیامتدن
.
آتا باخاباخا گیتدی جوان اوغول ئولومه
سالوب امام حسینون دیزینی قوّتدن
.
گیده گیده دولانوب خیمه گاهه بیر باخدی
بغیشله یعنی قصوریم گر اولسا خدمتدن
.
أو باخماقیله سالوب اضطرابه لیلانی
اوغول دیوب یخیلوب غش ایدوبدی رقتدن
.
گورنده حضرت عباس قتل فرمانین
که قارداشی او نا عنوان یازوب شهادتدن
.
ایکی الیله او فرمانی آلدى قول چکدی
ایکی اوزون قولی عدلین اولوب شهادتدن
.
گوتوردی مشگینی میدانه گیتدی اولدی شهید
شجاعتیله ایدوب استفاده فرصتدن
.
علم یخیلدی دولوب سو یرینه مشگنه قا
قاریشدی قانیله سو سو تک آخدی غیرتدن
.
قلم قولی قلم أولدى مركب أوز قانی
یر اوزره بیر نچه کلمه یازوب وصیّتدن
.
منی آپارما برادر اماندی خیمه لره
خجالتم سو خصوصنده آل و عترتدن
.
چوخ احتمالی وار اولسون گوتورماقون مشگل
که بندبند منی دوغریوبله ضربتدن
.
کؤمكلر ئولدی کسسیلدی علاقه جات حسین
حرم سراسنه تشریف آپاردی رأفتدن
.
یغوب أو السیز ایاقسیز اوشاقلارین باشینا
وداع ایتدی هامی بانوان عفّتدن
.
گلوب یتشدی دوروب دسته لر قباقنده
باخوب گوروب قوشون اهلی دوشوبدی قدرتدن
.
او رحم سیزلره رحم ایلیوب ایدوب مأذون
که اختیاره گلوب دوشمه سونله قوّتدن
.
قووشون او وقتده دریا کیمی گلوب جوشه
حسینون آلدیلار اطرافینی عداوتدن
.
بیری قلج بیری نیزه بیری چکوب خنجر
بیری سنان بیری داش ووردیلار شقاوتدن
.
ایکی ایاقین ایدوبدور رکابدن خالی
دوشوب بو شوقه سالا ذوالجناحی زحمتدن
.
آت اوستن ایستدی دوشسون بویوردی بسم الله
پناه آپاردی خداونده ضعف و شدتدن
.
نه بیرجه آنّین اوغان أولدی نه گلوب گوتورن
ابوتراب عزیزین تراب ذلّبتدن
.
نه متکّا و نه بالین یغوب بیر آز توپراق
باشنا تکیه ویروب کثرت قناعتدن
.
قدم سلوکه قویوب چیخدی قدسیان سیره
گیدوب حقیقتیله مسلک حقیقت دن
.
گزردی دوست یولون سسلنردی حق یادوست
گیچردی نعره سی اوج سحاب وحدتدن
.
ویروب تمامی اقبالی انقطاع تمام
دایاندی رکن حصین وثاقه وصلتدن
.
گلوب طلعلعه نور جمال شمس جلال
تجلیاتی گوروب محو اولوبدی حیرتدن
.
ضمیری صافیدی قویدی هویَّتین گیچدی
رجوع محض، اولوب عین مرجعیتدن
.
فناده عین بلا بولدی چون ولیّ الله
تاپوپ فراغت دل فکر سقم و صحّتدن
.
قیتیدی عالم صورتده باشدان إل چکسون
باشنی باشدان ایدوب باش تاپا فراغتدن
.
گوز آچدی گوردى یتوب آفتابه وقت زوال
نماز وقتی گیچه آز قالور فضیلتدن
.
سو ممكن اولمادی قانیله دستماز آلدی
نمازین ایتدی ادا شیوۀ عبادتدن
.
یوزین قویوب قوری توپراقه سجده حالینده
دیدی گذشت ایله یارب عصاة امّتدن
.
یتشدی مصدر غیب الغیوبدن لبّیک
دایانما جانوی تیز ویر رضا و رغبت دن
.
وفائی عاشقیمیز عهدیوه وفا ایتدون
قبولیمیز دی هامی خواهشون شفاعتدن
.
هنوز ذكرنی ختم ایتمه میشدی شمر لعین
یتشدی قویدی او مجذوبی ذكر خلوتدن
.
الینده خنجر برّان گوزینده قرمزی قان
که چوخ اوزاقدی او حالت أمامه حرمتدن
.
چخوب او وقتده ناگاه خیمه دن زینب
اوزین یتوردی حسینه کمال سرعتدن
.
یتیشدی گوردی او دم شمری اوزگه حالیلن
پوزولدی حالتی فی الفور اونون او حالتدن
.
بویوردی ساخلا الون کسمه رحمه گل ظالم
#دایان_آماندی_دایان گیچمه رسم مهلتدن
.
چکیل کناره گلوم باغلیوم اونون گوزینی
سنون گوزون که بوگون باغلانوبدی غفلتدن
.
او قیل و قالده آچدی گوزینی عین الله
گوروب که باجیسی بی تاب اولوب مصیبتدن
.
بویوردی باجی منیم قاتلیمه یالوارما
قبول ایلمه منت او بی مروّتدن
.
قییت خیامه آنام باجی آغلاما صبرایت
سسون اوجاتماگیلن قورخورام شماتتدن
.
گید وب عیالیمی یغ باشیوه تسلی ویر
بیرینی قویما گوزوندن کناره شفقتدن
.
یتیم اوشاقلاریما من کیمی پرستار اول
یتیم لر آناسی اینجیمز مشقّتدن
.
بویوكلر أوزلری قالماز ایاقلار آلتیندا
کیچیک اوشاقلاری سن ساخلا شرّ غارتدن
.
یاناندا خیمه لریم چوللره قاچان وقته
یغوب قاچانلاری ایتمه قصور دقّتدن
.
کسیک باشیله سیزه منده باجی باش چکرم
سیزی گوزومدن أوزاق سالمارام محبتدن
.
یقین که نصرت ناصر یتوب سنه «هندی»
ایتیرمه حقین اونون گیچمه حق نعمتدن
.
سوزون مُتمّى ولایتده دور طریق نجات
توسل اولسا اولور منفعت ریاضتدن
.
.
(1) در کتاب گنجینه گذشتگان (مرحوم استاد زاد صادق) ج 10 ص 188 این متن به نام و تخلص مرحوم #دخیل مراغه ای آمده است.
.
.
#حسینیه_وداع
#حسینیه_شهادت #وداع #هندی_تبریزی #وداع_هندی_تبریزی
#جمال_یار_کی_خالیدی_خال_خجلتدن
#ترکی
#زبدةالاشعار