حالات قتلگاه و شهادت امام حسین (ع)
..
..
مرحوم جلال الدین مطّلع اردبیلی
..
..
بیله روایت ایدوب عالم حمیده سیر
صحیح اولماقنی ثبت ایدوبله اهل خبر
..
بو نوع شرح ایلیوب ماجرا رویاسین
نجه گوروب یوخوسوندا امام والاسین
..
دیور یوخودا سوروشدوم امام غائبدن
او نور پاکه یتن اعظم مصائبدن
..
ایشیتمشم بو سوزی ایلیوبله چوخ عنوان
دیولّه جدّون حسینه قان آغلوسان هرآن
..
حسینون هانسی غمینده فغان و داد ایدوسن
او بیکسون نه زمانین همیشه یاد ایدوسن
..
منی بو مطلبه ایت یابن العسکری آگاه
بو سوزده آغلادی اول شاه چکدی دلدن آه
..
توکوب سرشگینی گلدی فغان و فریاده
گتوردی عالم معناده عالمی داده
..
بویوردی جدّیمون هر بیر غمینده داد ایدرم
خصوص قتلگهین صبح و شام یاد ایدرم
..
منی همیشه پوزار جدّیمون او احوالی
گلنده قتلگهه نولدی عمّه مون حالی
..
بتوله نایبه زینب او غمکش دوران
گلوبدی قارداشینون باشی اوسته ناله کنان
..
بلالی باشدا ایدوب حسرت اللرین شانه
حسین دیه دیه یوز قویدى قانلو میدانه
..
اگرچه دوره نی دوتموشدی لشکر هر سودن
ولی دایانمادی عمّم گینه تکاپودن
..
گوروب او حال غم افزانی لشکر کفار
او بانوی حرمه تا یول آچدیلار ناچار
..
قلج وران اوخ آتان داش وران چکلدی کنار
یتیشدی قتلگه عشقه پرشکسته هزار
..
گوروب گوزل گلونی خار الینده ایتدی نوا
فغان و آهیله سسلندی آه یا جدّا
..
همان او سینه دی بو سن ئوپردون ای شه دین
ایاقدا چکمه همان سینه اوسته شمر لعین
..
قارشدی خون دلی عارضینده گوز یاشینا
حمایت ایلیه بو فکریلن که قارداشینا
..
یوزینی شمره دوتوب سسلدی اوتان ظالم
باشینی کسمه سوسوز ساخلا ال دایان ظالم
..
منه او قدر ویر امان آلنینون سیلوم ترینی
چکوم کناره سالوم کولگه یرده بسترینی
..
یارالیدور گوروسن قوملار اوسته جان ویروری
یارالاری باش آچوب چشمه چشمه قان ویروری
..
سرشک دیدہ سی آب فرات تک آخوری
اوتان حیا ایله ظالم بالالارى باخوری
..
او کور اولان گوزون آچ عبر تیله ایله نگاه
آچوب باشین باشی اوسته دوروب رسول الله
..
آنام بتولی مگر گورموسن یولار زلفین
آتام على توکوری عارضه سرشک ترین
..
دوتوبدی قان گوزون ای بی حیای کینه سیر
آخوبدی گوزلری جان اوسته دور بو تشنه جگر
..
نه قدری ایلدی اصرار او بانوی عصمت
جفا و ظلمینی آرتوردی شمر بدفطرت
..
آچوب جفا الینی زینبه او کان خطا
گلوبله نالیه سکّان عالم بالا
..
دوراندا سینه سی اوستونده شمر دون ایاقا
بتول نایبه سی ویردی اللرین قاباقا
..
شرار آتش ظلمیله کونی یاندیردی
باجینی قارداشی تک قانینه بویاندیردی
..
آچاندا قانلو گوزین شهریار کون و مکان
گوروب باجیسینی ظلمیله قانینه غلطان
..
دوباره خاطر شه گلدی غصّه دن درده
گورنده زینبینون قانلو معجرین یرده
..
..
بو امر اولدی ز بس سخت غیرت اللهه
بیله بویوردی شهنشاه، عصمت اللهه
..
..
دایانما بوردا آماندور امان باجی زینب
آنام بتوله جهاندا نشان باجی زینب
..
گوزیمی باغلاماقا گلدون ای وفا کانی
بلا خدنگینه اولدون نشان باجی زینب
..
قیت خیامه بو شوم لعینه یالوارما
هامی بلالره من تک دایان باجی زینب
..
باشوی آچما ساچون یولما ویر قضایه رضا
مقام صبریده دور هر زمان باجی زینب
..
گیدوب خیامیده یغ باشیوه بالالاریمی
اولارا من کیمی اول مهربان باجی زینب
..
گوروم نه من سنی باشی آچوخ نه سن منی خوار
آچار شماتته دل کوفیان باجی زینب
..
او ساعتیکه جدادن اوجالدی تکبیریم
دولار فغانیله کون و مکان باجی زینب
..
گلر آنام یارالی باشیم اوسته باشین آچار
ایدر سرشگینی گوزدن روان باجی زینب
..
او تیره منزله سُکّان نه سما گله جک
اولار او یرده منه همزبان باجی زینب
..
تحمّل ایله وراندا یزید بی پروا
سو سوز دوداقلاریما خیزران باجی زینب
..
او کسلریکه اولوب مطلّع همین خبره
سالور معاینه اود ذکر اولان زمان جگره
..
نه حاله قالدی او عالم همین بو رویادن
ئولونجه اولمادی آرام وا حسینادن
..
چکنده نظم و نظامه یازاندا بو خبری
آخاردی «مطّلعون» عارضه سرشک تری
..
حسین حسین دیوب ایلردی دمبدم ناله
یری وار آغلیا قان ماسوا او احواله
..
..
#حسینیه #مطلع_اردبیلی #حسینیه_شهادت #قتلگاه #ترکی #زبدةالاشعار
نظر دهید