جهاندا مرتضی سنسیز اولوب غرق محن زهرا #فاطمیه_غفاری_زنجانی

زبانحال حضرت علی (ع) در مصیبت حضرت زهرا (س)
.
زبدة الاشعار
.
: @nohe_torki
.
#غفاری_زنجانی
.
جهاندا مرتضی سنسیز اولوب غرق محن زهرا
شماره آز قالور دوشسون نفس بو غصه دن زهرا
.
کیمه درد فراقی شرح ایدوم آیا کیمیم واردی
نقدری غصه وار قلبیمده یوخدور بیر بلن زهرا
.
منیم ای یار و غمخواریم هم اسراریم گوزون بیر آچ
گلوب درد دله سنلن سنه دردین دیین زهرا
.
دونوب زندان تاریکه منه دار فنا سنسیز
نه حاله قالموشام بیلمز بو حاله دوشمین زهرا
.
صفای عمرومی گتدیم گجه توپراقه تاپشوردوم
اودور که دویموشام سنسیز بو شیرین عمریدن زهرا
.
بو آز مدّتده گوردوم چوخ محبت چوخ وفاسندن
سزادور یانسا بو هجرانه جان بوالحسن زهرا
.
جهاندا خوش گونون عمری اولارموش آز هزار افسوس
اوگونلر یادی خیر اولسون واریدی پنج تن زهرا
.
ایویمون زینتین گتدیم ئوزوم توپراقه تاپشوردم
اولوب تاریک ایویم ای شمع جمع انجمن زهرا
.
ئوزون زهرا قوتاردون سن جهانون همّ و غمّندن
مناجاتنده ای عجّل وفاتی سسلنن زهرا
.
ئوزون گیتدون دالینجا دورت عزیزون دیده تر قالدی
توکر گوزیاشی رخساره حسینیله حسن زهرا
.
سارالدی فرقتنده گل کیمی کلثومیله زینب
گلون عمرینه ای عمر عزیزی بنزیین زهرا
.
سنان ای شاخه سی جور جفائیله سولان رنگی
بهار عمرونه ای صر صر محنت اسن زهرا
.
سالور رنگ بنفشه نیلی اولموش صورتون یاده
منه محنتلرین گیدیردی قاره پیرهن زهرا
.
نجه نار غمونده یانماسون بو جسم و جان آیا
سنون تک گورمدیم عالمده بیر محنت چکن زهرا
.
وجودونله ایویم دولموشدی نوریله صفائیله
صفا سنلن گیدوب اولدی ایویم بیت الحزن زهرا
.
الیمدن اوندا سن گیتدون گتوردی یوز منه غملر
آنان اولسیدی سسلردی وای اللرده ئولن زهرا
.
جفا اهلی جفا نقشی سنه چکدی اوگوندن که
گوزون یومدی بو دنیادن رسول ممتحن زهرا
.
ریاست حبی قلبینده اولان اشخاص ائدوب شورا
بهانه بیعت امرین ایلدی قوم فتن زهرا
.
گتوردی حمله اوچ یوز بی حیا درگاهیمه بیردن
سلیمان بارگاهین یاندیروبدی اهرمن زهرا
.
قاپو که نیمه سوز اولدی وروبدی بیر لگد ثانی
باشوا نه بلا گلدی ، گلوب اول حمله دن زهرا
.
گلستان پیمبرده اسوبدی صرصر محنت
فغانه گلدی بلبللر خزان اولدی چمن زهرا
.
سنوب شاخه دوشوب گل شاخه سی تپراقه ظلمیله
ئولیدی باغبان باجائیدی بو غصه دن زهرا
.
چاقوردون فضّه نی داده! اوتاندون اولمیا مندن؟
اولوبدی مرتضایه ایندی بو اسرار علن زهرا
.
خانم یا فاطمه ” غفارینون ” ویر شعرینه زینت
بلورسن که او بیچاره دگل اهل سخن زهرا
.
.
#فاطمیه_شهادت
#جهاندا_مرتضی_سنسیز_اولوب_غرق_محن_زهرا
#ترکی
.
#زبدةالاشعار
.
: @nohe_torki