جهانه باغلاما بئل عهدی پایدار اولماز #پندیات_نادری

عبرتنامه-مجلس ختم
.
مرحوم نادری میانجی
.
جهانه باغلاما بئل عهدی پایدار اولماز
دئمه جوانم اوغول عمره اعتبار اولماز
.
.
گئجه گونوز گوروسن یوللانور بقایه قطار
زبانحالیله اونلار أئدور سنه اخطار
بقایه فکرایله چون ایندی اختیارون وار
اجل گلر صورا انساندا اختیار اولماز
.
.
خطرلی یولدی، الون بوشدی، فرصتون کوتاه
نه قوم وار نه قبیله نه مال واردی نه جاه
فقط عملدی او گونده اولار سنه همراه
سوای ئوز عملون کیمسه غمگسار اولماز
.
.
کنار میز عدالتده باشلانار تحقیق
ایکی محافظ اولار بیر حقیقی مستنطیق
او دادگاهده ایستر دلایل و منطق
او وقته جنگ و جدل، رشوت و فرار اولماز
.
.
ساق و سولوندا غضبلن نکیریلن منکر
آچارلا نامۀ اعمالووی اورک تیترر
عمل خوش اولماسا مشگلدی صحنۀ محشر
نه ثروت و نه اوغول نه قبیله یار اولماز
.
.
توجّه ایله اویان بیرجه خواب غفلتدن
بو بش گون عمریووی قیل استفاده فرصتدن
دئمه فلک منی سالماز مدار قدرتدن
فلک مداری کیمی چرخ کجمدار اولماز
.
.
همین بو مجلس عبرتدی، سنده عبرت ایله
سنه وظیفه دی خلق خدایه خدمت ایله
قناعت ایلمه صوم و صلاته دقت ایله
چمنده بیر گل اگر آچسادا بهار اولماز
.
.
بنای خیری همیشه باشارسون ایله بنا
اوزونده گئتسون آدون قوی زماندا زنده قالا
گوزلدی خوش عمل انسانه اولسا راهنما
جهاندا خیّر اولان کس، جزاده خوار اولماز
.
.
کئچن کئچوب گله جک وار قاباقادا فكرینه قال
ائدنده ذکر مصیبت حسینی یادیووه سال
عزیز فاطمه دن التماس ائدوب کمک آل
حسین کیمی ایکی دنیاده تاجدار اولماز
.
.
کئچوبدور أمته خاطر گوزل جوانیندن
نه تک جوانلاری اهل و عیال و جانیندن
تاپولمادی سو، آلوب دستمازی قانیندن
حسینه دشمن اولان کیمسه رستگار اولماز
.
.
توجّه ایله اؤزون مجلسه خانم زهرا
دوشنده یاده بلا دشتی عصر عاشورا
یخوبلا مقتله عطشاندی سیّدالشهدا
یانان اؤرک نئجه ماتمده اشکبار اولماز
.
.
اونون او حالینه واللهی گوگلر آغلاردی
دوران قتالینه میداندا لشگر آغلاردی
دوتاندا شمر لعین الده خنجر آغلاردی
حسین کیمی بئله حق اوسته جان نثار اولماز
.
.
دئدی الهی بو قان دستمازیمه خاطر
یارالی جسمیله راز و نیازیمه خاطر
باغیشلا شیعه لری صون نمازیمه خاطر
بلی، حسین کیمی محبوب کردگار اولماز
.
.
بیزیم که قابل عمل یوخ، گناهیمیز واردور
فقط حسین کیمی بیر تکیه گاهیمیز واردور
باباسی احمد مرسل، پناهیمیز واردور
محمد امّتی عقباده شرمسار اولماز
.
.
الهی ایله اوزون نوگذشتیه رحمت
گلوبدی ختمه جماعت چکوبدولر زحمت
بو جمعه لطف ائله اجر و سعادت و عزّت
کریم اولان کرم و بذلیدن کنار اولماز
.
.
جماعته اولا نوح عمری «نادری» شامل
بو نوع چوخ یاشاماقدان نتیجه الحاصل
گرکدی قویمیاسان حقّى غصب ائده باطل
جهاندا شاعر اولان چوخدی «شهریار» اولماز
.
.
.
#پندیات_نادری #ختم_خوانی #ترکی #زبدةالاشعار