پندیات در احوال قیامت
..
..
منتظری شریف آباد
..
..
جهانه باغلاما دل اهل بو جهان گیده جاق
داریخما غم یمه هم یاخشی هم یامان گیده جاق
..
اجل یتیشدی داخی هیچ کسه امان ویرمز
بو قورخولی یولی اجباراً انس و جان گیده جاق
..
قویوبلا نوبته پرونده وی گلر حتماً
جلال و ثروتیوه اولما خوش گمان گیده جاق
..
بیری ئولنده خیال ایتمه انحصاریدور
سراغینه هامینون قابض روان گیده جاق
..
بشر عیالنه بش گون قوناقدی دنیاده
ضیافتون قوتارار وقتی میهمان گیده جاق
..
توجّه اولسا نچه آیه متن قرآندا
صراحةً دیوب عالمده هر اولان گیده جاق
..
بیری او آیه لرون کُلُّ مَن عَلَیها فان
مکانون اهلی بتقدیر لا مکان گیده جاق
..
تمام ما خَلَقَ اللهیچون نهایت وار
فنایه عاقبت افلاک آسمان گیده جاق
..
ستاره لر توکولر نظم چرخ اولار برهم
سمایه نالۀ الغوث و الامان گیده جاق
..
نهایتون گونی دریالر اود دوتار یکسر
شراره کامینه اجسام کهکشان گیده جاق
..
او گونکی زلزله ده داده یت اوزون الله
دوشر هراسه هامی خلقدن توان گیده جاق
..
او لرزه نون قباقوندا بَنا دوام ایتمز
فنایه قلعه و قصر و آپارتمان گیده جاق
..
ز بس دَگر داشا سیمانه آهنه جسمون
یارالاروندان آخوب چشمه چشمه قان گیده جاق
..
دگوب بیری بیرینه ریز و ریز اولار داغلار
نهان دفینه و اَثقال اولار عیان گیده جاق
..
گلنده صیحۀ واحد ئولر بنی آدم
بساط تپراقا اجسام خاکیان گیده جاق
..
ایکیمجی صوری چالاندا جناب اسرافیل
ازلکی شکله دَم و لحم و استخوان گیده جاق
..
او قدرتی که ازلده دمیده ایتموش روح
ایدر اراده گنه جسم خلقه جان گیده جاق
..
هامی ئولن دیریلر دلده آه و وانفسا
حساب ایاقینه هر قبردن دوران گیده جاق
..
نجات تاپماقا هر سمته بی هدف قاچاجاق
پناه فکرینه هر یانه بی نشان گیده جاق
..
قوجاقدان او بالاسین مهربان آنالار آتار
علاقه لر کسیلر مهرِ مهربان گیده جاق
..
صریح آیه واراُول بیر گون الّی مین ایلدور
اولوبدی سورۀ هفتادیده بیان گیده جاق
..
او گون تمامیِ اعمالیوون سؤالی وار
جهاندا ایتدوقون ایشلر نظرده سان گیده جاق
..
دیلون دانیشمیاجاق نطقلر اولار تعطیل
تکلّم ایلماقا قدرتِ زبان گیده جاق
..
ایکی الون هامی اعمالدن ویرر آمار
قِچون شهادت و تأییده اُول زمان گیده جاق
..
او دادگاهه گلر کلّ جرمون آثاری
یانونجا هر نیه دل ویرموسن همان گیده جاق
..
جسارت ایلمیوم پرده لی گئچوم امّا
محاسبه اولونوب مدرکین آلان گیده جاق
..
صاق الده نامۀ اعمال مؤمن مخلص
بساط جنّته مسرور و شادمان گیده جاق
..
صول الده صورت افعالی آه و زاریله
جهنّمه طرف عیّاش و بد نهان گیده جاق
..
سوزونده دقّت ایله (منتظِر) یالان یازما
که بلکه حشرِده درده دگه یازان گیده جاق
..
#پندیات #منتظری #قیامت_منتظری #قیامت #ترکی #زبدةالاشعار
نظر دهید