غارت خیام
..
..
مرحوم شوری تبریزی
..
..
اود ویروب خیامه دشمن منده یوخدی چاره قارداش
گل بو گیر داریدن سن چک بیزی کناره قارداش
..
..
اهل کوفه یوز قویوبدور خیمه گاهه دسته دسته
گوردوم آل مصطفانی بیر به بیر گلور یوز اوسته
اهل بیتوی داغتدیم چوللره حسین شکسته
طاعت ایلدیم اوزیمده حکم بالفراره قارداش
..
..
محکم ایتدیلر بو چولده کفر بدعتین بناسین
پوزدولار حسین ستملن آل حیدرین اساسین
اوج عرشه اوج ایدوبدور خوردا قزلارین نواسین
دوشموشوخ بویوک کیچیک بیز گور نجه فشاره قارداش
..
..
یتمسن هرایه یوخسا بیزدن اولموسان مکدّر
قالدی دشمنون الینده گورموسن خانم حرملر
یا ایشیتمسن اوشاقلار هی سنی هرایه سسلر
چاره یمز ندور گیداخ بیز هانسی بیر دیاره قارداش
..
..
گه یتیم اوشاقلاروندان بعضسین ویروب یخالّار
گاهی منجنیق غمده بعضسین قویوب سخالّار
بیر به بیر گلولّه حاله خیمه دن دوروب چخالّار
چاره سیز قالوب گلولّر جمله آه و زاره قارداش
..
..
جانیوه قسم باجوندا بیر دقیقه یوخدی غفلت
نیلیوم ولى تکم من دشمنونده واردی کثرت
من بیرین ایدنده ساکت آیریسی گورور اذیّت
دستگیر اولوب عیالون قوم بد شعاره قارداش
..
..
هر قدر بلا یتیشسه نوشیدور بو جسم و جانه
محو اولام سنون یولوندا خوشدی گلمرم امانه
حایل اولموشام ویراندا قزلاریوا تازیانه
دور باجون یارالارینا ایله بیر نظاره قارداش
..
..
گرچه عالم ایچره اولموب سن کیمی باشی بلالی
گلمیوب ولی جهانه من کیمی باجی وفالی
گورنجه وفالیم من سن یارالی من یارالى
بو یارالی جان فدادور بیله زخمداره قارداش
..
..
باغلیام یارالارون من قویموری سپاه مُظلم
جسممه ورولاً قمچی ای وجودی ذبح اعظم
تازیانه یرلرین گور سال یارالاریما ملحم
قویما ویرسون اهل کینه زینبون دوباره قارداش
..
..
خیمه گاهون اود دوتاندا من اودا بوجانی آتدیم
چوخ مشقّتیلن آخر عین مقصدیمه چاتدیم
بیریانان اودون ایچیندن اوغلوی اوزوم چخارتدیم
گورموشم دوشوبدی اوغلون حال احتضاره قارداش
..
..
شوریا سنون باشوندا واردی کربلا هواسی
جانینه قسم حسیندن دردیوون اولور دواسی
گر سنه بو عید قربان قسمت اولسا کربلاسی
اوردا دئ باجی دلینجه منده یوخدی چاره قارداش
..
..
#غارت_خیام #شوری_تبریزی #ترکی #زبدةالاشعار
نظر دهید