مناجات حضرت موسی بن جعفر (ع)
.
.
سید حمید موسوی میانجی
.
.
حالیم پوزولوب یوخ سوروشان حالیم الهی
تأثیر ایلمز سِندَه بو احوالیم الهی
.
.
بو حبسیده یوخ بیر نفر احوالیمی بیلسون
آز قالدی بو غم قلب پریشانیمی دلسون
تقصیری ندور بیر قوجا سیّد بیله اولسون
بیر حبسیدی تاریک اؤزوم زار و غریبم
آرتوب مرضیم من داخی محتاج طبیبم
.
.
یوخدور سوروشان حالیمی ای قادر و قهّار
قویموشلا وطنده منیم اولادیمی آغلار
ئولسم من اگر حبسیده کیم بو گوزی باغلار
بوینومدا که زنجیر منه بسدی خدایا
کونده بو ایاقلاریمی گور کسدی خدایا
.
.
ایکاش اولا بیر شخص ویره هارونه تذّکر
نیلوب سنی موسی ایلوسن ظلم تَجبّر
ایتمور ندن احوالی سنه بیله تأثّر
اللهه گوره رحم ایله بیر پیریدی ناخوش
بو نور الهیدی سن ایتمه بونی خاموش
.
.
هارون ویروب زهر جگردن یارالاندیم
یاندی اورگیم دیل دوداقیمدان یارالاندیم
بو زهریله من دار و جفادن آرالاندیم
قالدیم نئجه آخر من او اولادیمه حسرت
سِندی ویرودی گونده منه آرتیق اذیّت
.
.
بیر عمریدی من گوشۀ زندانیده یاننام
هر سال مه و روز شب و جاندان اوساننام
هر ظلم اولونوبدور گئنه ناچار دایاننام
چاره م کسیلوب قالمیوب الده داخی چاره
ای قادر و قهّار اؤزون ایله منه چاره
.
.
قورتار منی زندانیدان ای قادر و سبحان
سیندین الندن بیلوسن قلبیم اولوب قان
گوز یولدا قالوب معصومه ایندی ایدیر افغان
دوشموش بالالاریم بیله بیر وقتیده یاده
ایکاش گلیدی یانما ایندی رضاده
.
.
بو حالیمی هر کس بوله هر حالیده آغلار
گر اولسا عیالیم باشیم اوسته سینه داغلار
گوز یاشلی قیزیم معصومه بو گوزلری باغلار
اوخشار باشین اوسته هامی بو اهل مدینه
دور بریم ایل طایفه گلر شیون و شینه
.
.
ئوللم بیلورم حبسیده بیر کس بولن اولماز
تشیعیمه اوز دور بریمدن گلن اولماز
اوچ گون قالارام گوشده بیر دفن ایدن اولماز
آخیرده منی حمل ایلیر دورت نفر حمّال
اول وقتیمی ای شیعه داخی یادیوه سن سال
.
.
تابوتیمی چوخ ذلّتیله دفن ایده جاقلار
زنجیر یرین کونده یرین بس ینده جاقلار
ظاهرده گینه عزّتیله دفن ایده جاقلار
امّا که بابام نعشینی قوم اوسته قویوبلار
دورت مین یارالی کوینگی اگننده سویوبلار
.
.
لب تشنه ویروب جان ولی گوز سو سوراقندا
ظلمیله قویوبلار بده نین آت ایاقیندا
اوچ گونده قالوب نعشی اونون گون قباقیندا
تابوتی یر اولدی اونا کافور خس و خاشاک
بیر کهنه حصیره کفن اولدی بدن پاک
.
.
ای «موسوی» جدّوندی سنون موسی و کاظم
دوش درگهینه ایسته گلن هر نه که لازم
دنیانی ایدر بخش سنه گر ایده عازم
بو درگه منسوب اولان آیری دره قاشماز
مأیوس ایلمز باب الحوائج دی یاراشماز
.
.
.
#کاظمیه #سیدحمیدموسوی_میانجی #ترکی #کاظمیه_شهادت #زبدةالاشعار
نظر دهید