شهامت و شهادت حسینیه
..
..
..
مرحوم کریمی مراغه ای
..
..
..
حسینون عاشقی عشاق ایچینده خار اولماز
گلن بو درگه والایه شرمسار اولماز
..
حسینی بنده لریندن خدا چخوب اوزینه
فدا جلالتینه بیله افتخار اولماز
..
حسینه آغلاسا هرگوز خلوص نیّتلن
خدایه آند اولا محشرده اشکبار اولماز
..
حسیندی پرچم اسلامی ایلین برپا
حسیندن صورا اسلامه جان نثار اولماز
..
سوویردی قانیله گلزار دین سولان وقته
اوگل که قانیله سیراب اولا نزار اولماز
..
یزید علیهنه بیر نهضتی ایدوب برپا
بساط سلطنت اوسته دیدی قمار اولماز
..
سریر عدل و قضا جای شرب و خمر دگول
اوزین خلیفه بولن مست و میگسار اولماز
..
محالیدور قویام اسلامی پایمال ایده سن
نقدری ساغدی حسین دینه انکسار اولماز
..
امیر فاسقه باش اگمرم نقدری ساغام
کسیلسه باشیم اگر دین یولوندا عار اولماز
..
بوغازیمون قانی گر آخماسا بو صحرایه
جهاندا پرچم اسلام پایدار اولماز
..
بنی امیه ایوین سیل خونیله یخارام
بنای ظلم داخی بیرده استوار اولماز
..
اجانب ایلیه اسلامی الده بازیچه
حسین دورا باخا – بالله بو اصطبار اولماز
..
منه دیولَّه حسین گل یزیده بیعت ایله
خیال خامیدی مندن بو انتظار اولماز
..
تعلق ایلمرم ظالمه یوخومدی هراس
منیمده شیعه لریم ظلمه بردبار اولماز
..
گرکدی بوتۀ غمده وجودیمی اریدم
فشاره دوزمسه گر – زر تمام عیار اولماز
..
جداده گیتسه باشیم دئیره افتخاریمدور
بو مطلب اولماسا تفکیک نور و نار اولماز
..
اگر باجیم باش آچوخ گزمسه محلاتی
حجاب آیه سینون شرحی آشکار اولماز
..
رقیه مین قولونا ویرمسه طناب فشار
فشار ظلمدن اسلامیان کنار اولماز
..
علی اصغریم اوخلانماسا قوجاقیمده
آدیم صحیفۀ تاریخه افتخار اولماز
شراب مجلیسنه گیتمسه حیالی باجیم
شراب حرمتی دنیایه انتشار اولماز
..
یزید ظلمده طغیان ایدوب ولی قانمور
جهاندا حاکم سفاک رستگار اولماز
..
دولوبدی ظلمت ظلمیله عالم اسلام
بو باش کسیلمسه دین شمعی شعله دار اولماز
..
من آفتاب جهانتاب دین اسلامم
نقدری وار بو گونون نوری لیل و تار اولماز
..
گرکدی پرچم دینی وورام کلیسایه
حسین اولماسا قرآندا اشتهار اولماز
..
سالالّا ظلمله عبّاسیمون ایکی قولونی
هوای عشقیده عنقا مگر شکار اولماز
..
یارالی سینمی اوخ دلمسه آچیلماز اورک
گوگلده گیزلنن اسراریم آشکار اولماز
..
او اوخ نجه اوخیدی آه یا رسول الله
تعجبم ایله بیر تیر زهردار اولماز
..
الین آپاردی اوخی خارج ایلدی دالیدان
آت اوسته دورماقا گوردی داخی قرار اولماز
..
رکابدن یوزی اوسته دوشوب ترابه امام
بیان واقعیه دلده اقتدار اولماز
..
یوزین ترابه قویوب عرض ایدردی معبودا
مقام شکریده یم لیک اختیار اولماز
..
بدن یارالی هوا ایستی تشنه و یورقون
دوزوب جفالره قلبنده انزجار اولماز
..
یازاردی قانی یره زنده باد حرّیّت
مجاهدتده یقین بیله نامدار اولماز
..
سو خواهش ایلدی قاتل دیدی جوابینده
گرک سوسوز ئوله سن آب خوشگوار اولماز
..
کریمیا سنه شهدن توجه اولماسا گر
بوقدری یازدیقون اشعار آبدار اولماز
..
..
..
#حسینیه #کریمی_مراغه_ای #حسینیه_مدح #حسینیه_شجاعت #حسینیه_شهادت #ترکی #زبدةالاشعار
نظر دهید