حسینی یخدی آتدان لشگر ای وای #حسینیه_طوری_تبریزی

شهادت حضرت امام حسین (ع)
..
..
مرحوم طوری تبریزی
..
..
حسینی یخدی آتدان لشگر ای وای
تزلزل ایلدى عالملر ای وای
..
نزول ایتدی زمین کربلایه
جمال کبریایه مظهرای وای
..
دوشنده ذوالجناح أوستن یر أوسته
دیدی یرلر حسین وای گوگلر ای وای
..
گوروب دشمن حسینون طاقتی یوخ
اله آلسون قلج اول سرور ای وای
..
هجوم ایتدی او دلدن دوشمش أوسته
اوتوز مین رحمسیز دشمنلر ای وای
..
الینه داش گلن داش اوخ آتان اوخ
وروبلار خنجر أسته خنجر ای وای
..
قارشدی بیربیره لحم وعظامی
داغیلدی سینه، اعضا، پیکر، ای وای
..
مسلمانلار ایدن ظلمی امامه
یقیناً ایلمز کافرلر ای وای
..
سنانین گوردی چون الده سنانین
باش آچدی عرشده پیغمبر ای وای
..
ایدوب اتمام حجت حجت الله
دیدی شمره منه سو گوستر ای وای
..
حیاسیز شمریله عصمتلی زینب
یتشدی قتلگاهه یکسرای وای
..
بو بی معجر اونون خنجر الینده
بو یالواردی او ووردی خنجر ای وای
..
آچوب قانلو گوزون باخدی او حاله
اورک دن بیر دیدی وای خواهر ای وای
..
دیدی دورما باجی گیت خیمگاهه
قوى ئولدورسون منی بو کافر ای وای
..
اطاعت ایلیوب امر امامه
گیدوب تل أوسته دوردی مضطر ای وای
..
اوزی تشنه گون ایسّی یاره بیحد
دیردی متّصل امّتلرای وای
..
اؤزین اؤز عترتین یاددان چیخاردوب
یادیندان چخمامشدی بیزلر ای وای
..
او بی دین اول امامه ویرمدی سو
شماتتله دیدی چوخ سوزلر ای وای
..
سقای سلسبیلون باندی قلبی
الولاندی او غمدن کوثر ای وای
..
دوتوب مقتول و قاتل گوزلرین قان
او گوزلر کس دیوب ، بو گوزلر ای وای
..
حبیب کبریانون کسدی باشین
دیدی تکبیر او گبر ابتر ای وای
..
کسیک باشی او ملعونین النده
دیدی الله اکبر ،اکبر ای وای
..
داش اوسته ایلدی بیر ظلم او باشه
گلور ایمدیده داشدان سسلر ای وای
–
..
توکولدی اهل غارت خیمگاهه
عیان اولدی او چولده محشر ای وای
..
چادرلار یاندی آل الله ، تالاندى
خانملار قالدیلار بی معجر ای وای
..
داغیلدی چوللره خوردا اوشاقلار
ویروبله سس سسه واحیدر ای وای
..
خطیب آیۀ کهفین باشی ایچون
اولوبدی نیزه باشی منبر ای وای
..
نزول سورۀ والشمسه مظهر
اولان باشه، کول اولدی مصدر ای وای
..
حسین ئولدی عیال مصطفایه
مکان اولدی خرابه یرلر ای وای
..
#حسینیه #طوری_تبریزی #ترکی #حسینیه_شهادت #قتلگاه #زبدةالاشعار