شهادت امام حسین (ع)
..
..
مرحوم سید حسین کهنمویی
..
..
گورن وقته حسین بیکسدی یالقوز دور پناهی یوخ
گلوب ویرسون تسلّی زهرلی اوچ شعبه لی بیر اوخ
اوغول یوخ – قارداشی یوخ – سس ویرن یوخ – بیر پناهی یوخ
..
..
..
کمک سیز بیر غریبه حقدن آماده دور لبّیک
یارالی بیکفن مظلومه هر گوگدن گلور لبّیک
کماندان آیرلاندان اوخ هواده سسلنور لبّیک
گلوب ویرسون تسلّی زهرلی اوچ شعبه لی بیر اوخ
..
..
کماندان که اوخ آیریلدی هواده سسلنرقان قان
بو اوخ اوز امرینه بو باره ده مبهوتیدور حیران
ندای بیکسه لبیک گویان سیر ایدر هر آن
گلوب ویرسون تسلّی زهرلی اوچ شعبه لی بیر اوخ
..
..
اگرچه اوخ آتان دشمن یانیندا سرفراز اولدی
ولی اوخ مقصده چون یتدی صاحب امتیاز اولدی
شکسته قلبه بیر اوچ شعبه لی اوخ دلنواز اولدی
گلوب ویرسون تسلّی زهرلی اوچ شعبه لی بیر اوخ
..
..
بو اوخ گر چه اوزی بیگانه دور ناخوانده مهماندور
قنادسیز قوشدی اما حامل و مجری فرماندور
گلوب یول آچماقا بزم وصاله پیک یزداندور
گلوب ویرسون تسلّی زهرلی اوچ شعبه لی بیر اوخ
..
..
اوخی دست قضا آلدی امامین قلبینه تاخدى
آخان قانی دوتوبدور اؤجونا رخسارینه یاخدی
بوحاله سس چکوب اوخ آغلادی حیران دوروب باخدی
گلوب ویرسون تسلّی زهرلی اوچ شعبه لی بیر اوخ
..
..
بو اوخ دشمن کمانیندن چخوبدور قاصد جان دور
ولی حیرتده دور بیلمور نه وار حالی پریشان دور
یتوب گوردی حسینه هر یارا بیر چشم گریان دور
گلوب ویرسون تسلّی زهرلی اوچ شعبه لی بیر اوخ
..
..
اوزی حیرتده دور هاردان گلوب هاردا مکان ایتدی
گوروب دشمن امامین پیکرین تیره نشان ایتدی
پیمبر امّتی پیغمبر اوغلون باغری قان ایتدی
گلوب ویرسون تسلّی زهرلی اوچ شعبه لی بیر اوخ
..
..
مخاطب ایلور اوخلاری گورن آیا بونه سسدی
دیور اینجیتمیون اوخلار یاراسی چوخدی بیکسدی
ئورک باشیندا کی داغ علی اکبر بونا بسدی
گلوب ویرسون تسلّی زهرلی اوچ شعبه لی بیر اوخ
..
..
اگرچه دشمنی قصد ایلین بیرظلمه مأمورم
مقامیم چرخ بیوک یردور ئورکدن شاد و مسرورم
کمک سیز بیر غریبه تسلیت ویرماقه مأجورم
گلوب ویرسون تسلّی زهرلی اوچ شعبه لی بیر اوخ
..
..
بوسوزلر کهنموئی بیر زبان حالدور اوخدان
اولار ممکن دانشدرسون اونی خلق ایلین یوخدان
دانشدیرماخ جمادی قدرتندن ذرّه دور چوخدان
گلوب ویرسون تسلّی زهرلی اوچ شعبه لی بیر اوخ
..
..
#حسینیه #کهنمویی #حسینیه_شهادت #ترکی #زبدةالاشعار #قتلگاه
نظر دهید