شهادت حضرت امام حسین (ع)
..
..
مرحوم هادی تبریزی
تضمینی از شعر معروف طوری علیه الرحمه
..
..
حسینی یخدی آتدان لشکر ای وای
تَزلزُل ایلدی عالم لر ای وای
..
دگوب اوخ بسکه شاه قُل کَفایه
آچوب پر بارگاه کبریایه
نزول ایتدی زمین کربلایه
جمال کبریایه مظهر ای وای
..
..
اولان نخل جهانِ حقّه هسته
اولان زنجیر عشقه پای بسته
دوشنده ذوالجناح اوستن یر اوسته
دیدی یرلر حسین وای گویلر ای وای
..
..
چاتوبدی سینه سینده باش باشا اوخ
دگوب بسکه یارا گُل جسمینه چوخ
گوروب دشمن حسینین قوّتی یوخ
اله آلسون قلج اول سرور ای وای
..
..
قان ایچره ال ایاق چالدی او خسته
گلوب قوم ستمگر دسته دسته
هجوم ایتدی او دلدن دوشموش اوسته
اوتوز مین رحمسیز دشمنلر ای وای
..
..
او صحراده هواداری اونون یوخ
طرفدار عدو امّا که چوخ چوخ
الینه داش گلن داش، اوخ گلن اوخ
ویروبلا خنجر اوستن خنجر ای وای
..
..
سوسوز ئولدوردی شام اهلی امامی
بهانه اولدی بدرین انتقامی
قاریشدی بیر بیره لحم عظامی
داغیلدی سینه اعضا پیکر ای وای
..
..
گوروب جدّی اونون آخدوقجا قانین
توکوب گوزدن یوزه اشک روانین
سَنانین گوردی الده چون سِنانین
باش آچدی عرشده پیغمبر ای وای
..
..
ایدوب قان ایچره شاه تشنه لب تب
یول آچدی قوم بی آئین و مذهب
حیاسیز شمریله عصمتلی زینب
یتیشدی قتلگاهه یکسر ای وای
..
..
بونون قارداشیم ای وای وار دیلینده
اونون موج ایلوری نفرت دلینده
بو بامعجر ، اونون خنجر الینده
بو یالواردی ، او ووردی خنجر ای وای
..
..
یتور شمس هدا گوردی زواله
آتوب ال تیغ شمر بد سکاله
آچوب قانلی گوزون باخدی او حاله
اورک دن بیر دیدی وای خواهر ایوای
..
..
نلر اوز ویردی اول دم تشنه شاهه
دوتوب یوز زینب بی داد خواهه
دیدی دورما باجی گیت خیمه گاهه
قوی ئولدورسون منی بو کافر ایوای
..
..
دونوب گوندوز گوزونده لیل شامه
یتیشدی کشمکش ناگه تمامه
اطاعت ایلدی امر امامه
گیدوب تل اوسته دوردی مضطر ای وای
..
..
دوتوب دنیانی یکسر نور سَرمَد
نه قدری زخم تیر اولدی مشدّد
اوزی تشنه گون ایسّی یاره بی حد
دیردی متّصل اُمتّلر ای وای
..
..
چکوبدی قلبدن شاه اودلی بیر آه
گوروب اطرافین آلدی قوم گمراه
ایدوب اتمام حجّت حجّة الله
دیدی شمره منه سو گوستر ای وای
..
..
دیردی شه سوسوز قان ایچره یا هو
گولردی شوریله شمر جفا جو
او بیدین اوغلی بیدین ویرمدی سو
شماتتله دیدی چوخ سوزلر ای وای
..
..
ویرن جانان یولوندا شاه دین جان
چخوب شیرازه دن یر اوسته قرآن
دوتوب مقتول و قاتل گوزلرین قان
او گوزلر کس دیَر بو گوزلر ای وای
..
..
ایدوب شمر جفا جو اوز تلاشین
ایشیتموب ناله های جانخراشین
حبیب کبریانین کسدی باشین
دیدی تکبیر او کبر ابتر ای وای
..
..
قالوب عادل، جفا جونین الینده
حقیقت، باطل و دونین الینده
کسوک باشی او ملعونین الینده
دیدی اَللهُ اَکبَر، اکبر ای وای
..
..
دیمه شمرین جفاسی یتدی باشه
یتوب تأثیر مِحنت داغ و داشه
داش اوسته ایلدی بیر ظلم او باشه
گلر ایمدیده داشدان سسلر ای وای
..
..
یتوب فرمان غارت تا سپاهه
دوشوب لرزه عیال پادشاهه
توکولدی اهل غارت خیمه گاهه
عیان اولدی اوچولده محشرای وای
..
..
سپاه کوفیان آللهی داندی
جهان رنگ ملالیله بویاندی
چادرلار یاندی آل الله تالاندی
خانملاردا قالوب بیر معجر ای وای
..
..
سپاه کوفیان اللهی داندی
جهان رنگ ملالیله بویاندی
چادرلار یاندی آل الله تالاندی
خانملاردا قالوب بیر معجر ایوای
..
..
قاچوبلار الامان سسلور قوناقلار
چوخ اطفال اولدی پامال ایاقلار
داغلدی چوللره خردا اوشاقلار
ویره لرسس سسه وا حیدر ای وای
..
..
توکوب گوز یاشی زینب همچو جیحون
ایدوب بیر فکر او دمده شمر ملعون
خطیب آیۀ کهفین باشین چون
اولوندی نیزه باشی منبر ای وای
..
..
اولان نقشی ازل نقاشه منظر
اولان شیرازۀ جان پیمبر
نزول سورۀ والشمس مظهر
اولان باشی کول اوسته مصدر ای وای
..
..
دوشوب عالمده آل الله بلایه
بلا هردم یتر آل ولایه
چتین اولدی عیال مصطفایه
مکان اولدی خرابه یرلر ای وای
..
..
بو گون (هادی) نوا ایلر تمامی
هامی ذی روح و نامی غیر نامی
چکنده نظمه «طوری» بو کلامی
قلم آغلار سیزیلدار دفتر آغلار
..
..
..
#حسینیه #طوری_تبریزی #ترکی #حسینیه_شهادت #قتلگاه #زبدةالاشعار #هادی_تبریزی
نظر دهید