شجاعت حضرت ابوالفضل (ع)
..
..
احمد کاظمی زنجانی
..
..
عباس نامدارم ، سردار کربلایم
شاهنشه اوغلیام من فرزند مرتضایم
..
..
فخریم بودور جهاندا فرزند حیدرم من
اوغلی حسینه نوکر،هم یار و یاورم من
سیزلر شُغال و کَرکَس ، شیر دلاورم من
من سَرسپاه شاهم ، سردار نینوایم
..
..
اِرثیّه دور شجاعت چاتمیش منه اَزَلدن
آلدیم فُنون رزمی استاد بی بَدَلدن
بو افتخاریم اُولموش هر جنگ و هر جَدَلدن
حیدر منیم آتامدی ، بو فخره مَدَّعایم
..
..
ای پستِ رو جماعت چوخ چیخمیشاز اُوزوزدن
یازدوز حسینه نامه ، دوندوز نه تئز سوزوزدن
گر چپ باخاز بو شاهه ، اُوخ سانجیلار گوزوزدن
من حامی و وزیرِ فرزند مصطفایم
..
..
ای لشگر جفاجو حیدر وقاری منده
بیر لحظه غفلت اِئتسوز ، سالّام سیزی کمنده
شاهیم اجازه وئرسه قالماز باشوز بدنده
فرماندهیم حسیندی من یار با وفایم
..
..
سو یوللارین آچون تئز، آز وقت و مُهلتوز وار
تئز تئز قاچون بو یِردن ، هر قدری سرعتوز وار
ترک ایلیون سو نهرین ، تا جان راحتوز وار
گر گئتمسوز کناره ، من جانوزه بلایم
..
..
آلدی غرض فراتی عباس آقام غَضَب لَن
ئولدوردی فوج دشمن نهر اوسته بو سَبَب لَن
تا دُولدورا سو مشگین عطشانلارا طَرَب لَن
بو اَمره وئردی فرمان سسلور حسین اَخایم
..
..
دولدوردی اُوجون ایچسون بیر جرعه سو اُو مولا
سو اوسته گوردی عکسین ، عطشاندی آل طاها
سَپدی خجالتیندن سو نهره ، تشنه سقا
ایچمم دئدی سودان من، آلُ اللهه فدایم
..
..
سو ایچمدی ولیکن دولدوردی مشکی ساقی
اخیامه سو آپارسین چوخ واردی اشتیاقی
دشمن لر ایستیوردی تئز داغلانا تفاقی
هر دم که سسلنوردی قوللاردا وار قُوایم
..
..
دشمن تلاش ائدوردی سالسون قولون بدندن
وحشت ائدوردولر چون اُول جنگ تن به تندن
نیرنگیلن سالوبلار صاق قول دوشوبدی تندن
صاق دوشدی سسلنوبدی صول قول اولار عَصایم
..
..
بیر آز زماندا صول قول پیکردن آیریلوبدی
سو مشکی دیشلرینده شهپر آیریلوبدی
قولسوز قالوبدی سقّا اللردن آیریلوبدی
ئولسمده سسلیّردی بو یولدا من رضایم
..
..
عباسی یاندیران چوخ بیر اُوخ اولوبدی گویا
سو مشگه اوخ دگنده سسلندی یابن زهرا
سو یوخ بو آبرودی اَلدن گئدوبدی مولا
یار اولمادی بو قوللار شرمنده اِی اَخایم
..
دگمیشدی اوخ گوزوندن، یوزدن آخوبدی قانیاش
اُول جسم نازنینه پرتاب اولوندی مین داش
باشدان ویرولدی آهن سسلندی داده قارداش
گل داده قارداشیم گل من درده مبتلایم
..
..
گل داده قارداشیم گل آتدان یخیلدی سقا
باشدان ویروبلا یاره قالدیم بو چولده تنها
سو مشگی گئتدی الدن شرمنده یابن الزهرا
نهر اوسته یالقوزام من بی آه و بینوایم
..
..
شه آلدی بو صدانی تل اوسته دینجَلوبدی
بیلمم نجه خدایا نهر اوستونه گلوبدی
سسلندی وای برادر غم قلبییمی دَلوبدی
هاردا دوشوبسن عباس سردار با وفایم
..
..
اُول پاره پاره نعشی آغوشه آلدی سلطان
قارداش بئلیم سینوبدی سسلندی شاه عطشان
سن تک کیمین وزیره جانیم اُولیدی قربان
سندن صورا دچار حُزن و غم و عزایم
..
..
سندن صورا سولار بو گلشنده غنچه گولّلر
عطشاندی خیردا قیزلار اما سو ایستَمولّلر
یکسر عمو عمو جان دیللرده سَسلِیولّلر
هجرونده زینب آغلار، ای یار مه لقایم
..
..
مین دورت یوز ایلدی آغلار بو غمده دوست و دشمن
وصفونده یازدی چوخلار شعر رسا و روشن
ایله قبول اباالفضل بو شعری «کاظمیدن»
چوخلار قاپوندا سسلر من سائل و گدایم
..
..
#عباسیه #احمد_کاظمی #عباسیه_شهادت #عباسیه_شجاعت #ترکی #زبدةالاشعار
نظر دهید