حسین دادیمه تز گل قوشون حمله ور اولدی #عباسیه_فکری_اردبیلی

استمداد حضرت ابوالفضل(ع)
.
.
#سبک_علی_جان_بالا_لبیک
.
.
فکری اردبیلی
.
.
حسین دادیمه تز گل قوشون حمله ور اولدی
داخی قارداشون عباس الوندن گیدر اولدی
.
.
یوبانما باشیم اوسته سن ای میر امم گل
سو اوسته بدنیمدن قولوم اولدی قلم گل
اماندی دوشه قویما یره قانلی علم گل
نه مشگیمده سو قالدی نه الده کَسَر اولدی
.
.
هجوم ایلدی لشگر سپهداروی یخدی
بو صحرای بلاده مدد کاروی یخدی
آت اوستن یره قولسوز علمداروی یخدی
دگوب مشگیمه بیر اوخ سو آخدی هدر اولدی
.
.
دوشن وقتیده آتدان یخلدیم یوزوم اوسته
نقدری یارا دگدی دایاندیم سوزوم اوسته
قدم لطف ایله بیر قوی بو قانلی گوزوم اوسته
سنون وصلوه مایل بو شوریده سر اولدی
.
.
گوره وقتیده قولسو ز منی دشمن قرآن
بیری گلدی دایاندی قباقیمده شتابان
سنیلن دیدی جنگه ئوزوم حاضرم الآن
او ظالم منی قولسوز گوروب خیره سر اولدی
.
.
دیدی شیر تک آدون شجاعتده مثلدی
علی اوغلی بیان ایت او قوللاره نه گلدی
شمادتلری اوخ تک منیم قلبیم دلدی
اونون زخم زبانی قلیجدان بتر اولدی
.
.
الین آتدی عموده اونا مرد بد اختر
بیر ایش گوردی او کافر گلوب لرزیه گویلر
عمود آهن آچیق باش ئوزون فکر ایله نیلر
باشیم آهن عموده او حالدا سپر اولدی
.
.
کیمیون جنگیده دوشسه بدندن قولی قارداش
عمودیله ویرلسا منیم تک اولی قارداش
گوزوم قانیله دولدی ایتردیم یولی قارداش
گوزومده علی اصغر او دم جلوه گر اولدی
.
.
یقین بَلیّدی سوز نهان اودلی سوزومدن
نه رد ایلیه بیلدیم گلن تیری ئوزومدن
الیم اولمادی قارداش سیلم قانی گوزومدن
بو احوالیمه زهرا آنون دیده تر اولدی
.
.
حسین خیمه ده ناگه او شیرین سسین آلدی
دیزی دوشدی قوادن گوزل رنگی سارالدی
دنوب قدّی کمانه بلینده الی قالدی
گیدوب الدن علاجی او شه خونجگر اولدی
.
.
دیدی گل باجی زینب توان قالمادی منده
اول آماده بو گونن اسیر اولماقا سنده
سالوب دشمن قرآن ابوالفضلی کمنده
شجاعتده نظیری یوخیدی نظر اولدی
.
.