در شأن مقام امام حسین(ع)
.
✍️ زبدة الاشعار ✍️
?: @nohe_torki
.
مرحوم حاج عبداله رضایی (غمکش)
.
حسین کیمون گوزل آقا،نه خلق اولوب نه خلق اولار
جهانه بیله رهنما،نه خلق اولوب نه خلق اولار
.
.
وجودینه جانیم فدا،نه خلق اولوب نه خلق اولار
امیر دشت کربلا،نه خلق اولوب نه خلق اولار
.
.
حسینه اَنبیا گرک جهاندا افتخار ایده
گلوبدی عالمه حسین بو عشقی آشکار ایده
بالاسینون گوزل قانی جهانی لاله زار ایده
باجیسی ظلم کاخینی اوچوردا تار و مار ایده
حسین کیمون گوزل آقا، نه خلق اولوب نه خلق اولار
.
.
حسین قنداقی گزوب گلوبدی عرش اَعظمی
مین عیسوینی مات ایدر اوجالسا گویلره دَمی
دگر تمام عالمه هر ایل بیر آی محرّمی
بیری سورشسا سویلرم حسینچینون ندور غمی
بیله امیر اولیا،نه خلق اولوب نه خلق اولار
.
.
اَیاقینون توزون سیلر اجازه ویرسه گر ملک
باش اگدی گُل وجودینه اونون همیشه نُه فلک
دینده کیم حسین آدین حسین ویربدی مین اورک
هایاندا نصب اولوب علم ایدوب حسینچلر کمک
حسیندی دردلره دوا، نه خلق اولوب نه خلق اولار
.
.
حسینون عشقیدی سالوب کمنده نوحه خوانلاری
چکوب گتیردی هیئته بو باصفا جوانلاری
آدین نگین تک آلوب اَرایه قهرمانلاری
دینده یاحسین جوشور گورون بوباش یارانلاری
حسین کیمون خدا آقا،نه خلق اولوب نه خلق اولار
.
.
حسینه گوزلریم فدا حسینه ائللریم فدا
حسینه شوکتیم فدا حسینه شهپریم فدا
کسیلموش اللره منیم دیون سیز اللریم فدا
او قتلگهده ذبح اولان سره منیم سریم فدا
اونون مثالی سر جدا،نه خلق اولوب نه خلق اولار
.
.
سالاندا اکبرین یولا قیامت اولدی برمَلا
دالیجا باخدی ناگران اگرچه شاه کربلا
دیدی بو قربانی ئوزون قبول ایله ای خدا
بونون کیمون گوزل بالا کیمون وار ایلسون جدا
جهاندا بیله مه لقا،نه خلق اولوب نه خلق اولار
.
.
دویونجا باخدی قاسمه ئوپوبدی مه جمالینی
گلوبدی زینب عمّه سی گوره او خط و خالینی
سالوبدی بی زره یولا حسین حسن مارالینی
جهاندا حیّ لامکان یاراتمیوب مثالینی
گییبدی قانلی بیر قبا،نه خلق اولوب نه خلق اولار
.
.
گیدنده جنگه قارداشی دویونجا رهبر آغلادی
باخاندا نهره بیلمورم ندندی اصغر آغلادی
رقیه باشدا گوردولر او قاره معجر آغلادی
باجیلاری سو ایچمدی اودور کی یکسر آغلادی
اودی یقین گره گشا،نه خلق اولوب نه خلق اولار
.
.
قلم گریزه مایل اُول قیت او قانلی مقتله
آلوبدی غملی خیمده رقیه زلفلرین اله
ووربدی قلبینه بیر اوخ الی شل اولموش حرمله
باخوبدی نهر علقمه گلوبدی عاقبت دیله
بیله شهید نینوا،نه خلق اولوب نه خلق اولار
.
.
قانی او شوره تپراقی بویاندربدی آلقانا
گلوبدی زینب حزین الی باشیندا میدانا
باخوبدی بیلمورم نجه او قربانا او قرآنا
دیدی روادی ای خدا بو نوعی سینه اودلانا
بونون کیمون دل آشنا،نه خلق اولوب نه خلق اولار
.
.
فقط سنه گوره خدا اَل ئوزدی گُل وجودیدن
نه واردی بو رکوعیدن نه واردی بو سجودیدن
سپر اولوبدی اوخلارا سنه گوره بو گل بدن
دیدی باجون ئوله حسین یوخومدی ایندی بیر کفن
آتام آنام سنه فدا،نه خلق اولوب نه خلق اولار
.
.
بو «غمکشین» نواسینی او کربلادن آختارون
یاسیندا قاره پوش اولوب، نه نُه سمادن آختارون؟
دواسی دور بو گوزیاشی دَمی دعادن آختارون
رضای حق حسینده دی نه آشنادن آختارون
یانان اورک یانوب یانا،نه خلق اولوب نه خلق اولار
.
.
#ورود_محرم
#حسینیه_مدح
#حسینیه_شهادت
#حسین_کیمون_گوزل_آقا
#غمکش
#زمزمه_های_محرم_غمکش
#ترکی
✍️ #زبدةالاشعار✍️
?: @nohe_torki
نظر دهید