جریان گریه کردن حضرت آدم و نوح و آمدن آهو به مدینه با صیّاد و گرگ در زمان پیغمبر
.
#گریز به اول محرّم و عبدالله بن حسن(ع)
.
✍️ زبدة الاشعار ✍️
?: @nohe_torki
.
حاج غلامرضا عینی فرد زنجانی
.
عالم لره سالوبدور طوفان حسینون عشقی
اؤز شیعه سین ائدوبدور سلطان حسینون عشقی
.
.
هر کیمسه نون باشیندا بو عشق ایلمز جوش
بو مشعل هدایت اولماز جهاندا خاموش
ذرّ عالمی بو مِی دن عاشقلر ایلیوب نوش
غفلتده یاتما عاقل عاشقلره ئوزون قوش
عاشق اودور که اولسون میزان حسینون عشقی
.
.
سردوش معرفتدور بو قاره پیرهنلر
گیمز لباس ذلّت رخت عزا گینلر
عشّاقه قاره کوینک محسوب اولوب کفنلر
سینه وران جوانلار قاره گئین بدنلر
هر دردون اولسا ایلر درمان حسینون عشقی
.
.
نام حسینده واردور الحق بیر آیری لذّت
هرکس ائده حسینه گر صادقانه خدمت
دنیاده، آخرتده گئیدی لباس عزّت
محشر گونی آناسی ایلر اونا شفاعت
بُغضی اولوب جهنّم ،رضوان حسینون عشقی
.
.
قویدی قدم او گونکه فانی جهانه آدم
دنیاده آختاراردی اظهار درده همدم
بیر یرده گوردی ناگه قلبی سخیلدی محکم
روح القدس یتیشدی فریادینه همان دم
سسلندی بوردان ایلر طوفان حسینون عشقی
.
.
کرب و بلا بو یرده وار آدی کربلادور
نی تک نوایه گلدون بیر آدی نینوادور
بوردا شهید اولانون آدی حسین آقادور
ششگوشه عرشه بنذر قبری اولار بورادور
گون تک طلوع ائدر بیل بوردان حسینون عشقی
.
.
جریانی تا ائشیتدی آدم نواسین آرتدی
قتل حسین ئورکده بیر فاجعه یاراتدی
اشکی عذاره آخدی غم رنگینی ساراتدی
آدم اولوب حسینی فوراً مرامه چاتدی
انسانی ائتدی انسان،این سان حسینون عشقی
.
.
نوح النبی او چولده گلمیشدی شور و شینه
دریا تلاطم ائتدی گوردی باتور سفینه
روح القدس یتیشدی یالوار دئدی حسینه
دریانی ایلر آرام قورخما شه مدینه
وئردی نجات نوحه رجحان حسینون عشقی
.
.
موساده آغلیوبدی یحیاده آغلیوبدی
داوود و نوح و یعقوب عیساده آغلیوبدی
حیدرده آغلیوبدی طاهاده آغلیوبدی
زهرا دیوبدی نوحه ساراده آغلیوبدی
عالملری ائدوبدور حیران حسینون عشقی
.
.
کیمدور حسین عزیز اولاد مصطفادور
نور دوعین زهرا دلبند مصطفادور
بیر داستان واریمدور نقل ایلسم بجادور
ناسخ یازان یازوبدور چوخ معتبر آقادور
یثربده گورسنوبدور یاران حسینون عشقی(۱)
.
.
مسجدده اگلشوبدور بیرگون رسول اکرم
ذکر خدا دیلینده دورینده یار و همدم
اوغلی حسن یانیندا مسرور و شاد و خرّم
ناگه عیان اولوب بیر صیّاد و صید باهم
آهو گلور ئورکده پنهان حسینون عشقی
.
.
آهونی هدیه وئردی صیّاد مصطفایه
ئوپدی نبی اوزوندن تز وئردی مجتبایه
آلدی حسن غزالی شکر ایلدی خدایه
قاچدی خبر وئروبدی مظلوم کربلایه
تحریک اولوب گورنده جیران حسینون عشقی
.
.
آهونی قارداشیندا گوردی تاپوب علاقه
عشق غزال باشدا تأثیر ائدوب اوشاقه
اوز مسجده قویوبدی دوردی نبی ایاقه
پوزقون گلور حسینی گوردی آلوب قوجاقه
پیغمبری ائدوبدور لرزان حسینون عشقی
.
.
لبلر که غنچه لندی آهو دئدی دوداقلار(۲)
محزون اولوب ائشیتجاق وجدانلاری اویاقلار
آهو گتورسون هاردان فکر ایلدی قوناقلار
گلشنده قاچسا آهو چاتماز اونا ایاقلار
اصحابی ایلیوبدی بی جان حسینون عشقی
.
.
ئوپدی نبی دوداقین جان جان دئدی حسینه
جانیم اولیدی قربان الان دئدی حسینه
لطف ایله ای خدای منّان دئدی حسینه
ئوز قدرتونله گوندر جیران دئدی حسینه
ایلر منی پریشان جانان حسینون عشقی
.
.
گه یولّارا باخاردی گاهی دعا ائدوردی
ناگه حسین گوزونده گوزیاشی حلقه ووردی
زهرا ئوپن ئورکده غم غصه خیمه قوردی
اصحابی هم رسولی بو اضطراب یوردی
هاردان تاپا دیوللر سامان حسینون عشقی
.
.
سس دوشدی شهره گلدی بیر گرگ و ایکی آهو
ضدّ و نقیض جمعین مردم گوروبدی یاهو
بیر یرده باهم اولماز جیران و گرگ بدخو
یارب نه سرّدور بو مردم ائدوب هیاهو
جمع تضادّه وئرمیش امکان حسینون عشقی
.
.
آهوئیلان بالاسی تا مسجده چاتوبلار
آغوشینه حسینون تز ئوزلرین آتوبلار
مظلوم حسین ایاقین ئوپجاق غمه باتوبلار
گوزیاشی گردپای اول حضرته قاتوبلار
حضّاری ایلیوبدی گریان حسینون عشقی
.
.
مُهر سکوت سیندی نطقه گلوبدی آهو
عرض ایلدی سلام ای پیغمبر نکو خو
فرمایش ائت حسینه اوزدن کدر توزون یو
گتدیم بالامی شاها ناچیز تحفه دور بو
گلدوخ بو شهره وئردی فرمان حسینون عشقی
.
.
بیر آز زمان قاباق بیز صحن و گل و چمنده
باهم چرا ائدیردوخ آغوش یاسمنده
داغ کولگه سینده یاتدوخ تا دوشمیک کمنده
آهو بره دوشومدن آسوده صود امنده
ناگه عیان اولوبدی بیر آن حسینون عشقی
.
.
سس گلدی آسماندان صود وئرمه بو بالایه
تعجیل ائله حسینون قلبی گلوب نوایه
آهو آپار بالاوی وئر شاه کربلایه
غم نازنین ئورکده سالمیش خطرلی سایه
ارزشلیدور بویوردی رحمان حسینون عشقی
.
.
بو یدّی سقف آبی حق خیمه تک قوروبدی
زینت وئروب سمانی اولدوزلا دولدوروبدی
بو آسمان حسینه خاطر بئله دوروبدی
آهو غمی حسینی بی صبر ائدوب یوروبدی
اولموش بو کهکشاندا ارکان حسینون عشقی
.
.
شهره قاچون بیلورسن قاچماقدا یوخ نظیرون
صیّادلر یول اوسته اولماز سنون خبیرون
دور گئت غزال زهرا اولموش سنون اسیرون
قوردی سنه نگهبان وئرمیش حق قدیرون
طعمه وحوشه ایلر قالسان حسینون عشقی
.
.
دور آغلوری حسینیم آغلور ملک لر آهو
بو آسمان گوزوندن اولدوز الک لر آهو
عرشیم تزلزل ایلر آغلار فلک لر آهو
دریالر آغلار آهو آغلار سمک لر آهو
گتدی منی حضوره الان حسینون عشقی
.
.
زهرا بالاسی آلدی آغوشینه مارالی
ئوپدی گوزل گوزوندن گتدی ائوه غزالی
بیر لحظه زایل اولدی دلدن غم و ملالی
گوردی دوشور آنادان آهو بره آرالی
چون هئچ کسه یتیرمز خسران حسینون عشقی
.
.
آزاد ائدوب یتیشسون بیرده بالا آنایه
قلب حسینده باخ بیر انصافیلن وفایه
گلدی بو یرده مرغ طبعیم گینه نوایه
گئتدی حسینی تاپسون صحرای کربلایه
مقتلده گوردی ایلور طوفان حسینون عشقی
.
.
یالقوزلیوب او شاهی هی کوفیان وروللار
هرچند جان وئروردی شاه جهان وروللار
گودالی دولدوروبدور بیرپارچا قان وروللار
دورت مین نفر الینده تیر و کمان وروللار
دگدوقجا یاره تاپماز نقصان حسینون عشقی
.
.
گوداله گلدی گوردی آهوی مجتبانی
آز قالدی طعمه ائتسون دشمن گوزل بالانی
سایمور قاچور او چولده گرگان شامیانی
قاچدوقجا گتدی دلدن تاب دل و توانی
گودالی گلدی ائتدی گلدان حسینون عشقی
.
.
عبدالله عاشقانه قربانگهه یول آچدی
حیدر باخیشلی گوزلر شمشیرلره ساتاشدی
آغ کوینگی قاچاندا ساقینینه دولاشدی
بارماقلارین ئوپن لر خنجردی،اوخدی،داشدی
باخ گور هارا گتوردی هاردان حسینون عشقی
.
.
شمشیرلر اَننده شاهه دیوردی کرّات
بیر سؤز دئسم سرشک چشمه ئورک قانین قات
سسلندی گل سینمده قارداش بالاسی تز یات
ایش گچدی ایشدن اوغلوم گوزدن آناوی سن آت
آز قالدی بوردا تاپسون پایان حسینون عشقی
.
.
بیر ظالمون اَننده شمشیری اولدی لرزان
بو مهربان عمومی سسلندی سن ورورسان؟
عشقی چوخیدی اما الده یوخیدی قالخان
وئردی قولون قباقه ای شیعه آغلیون قان
بیر قوللی قالدی اولدی گریان حسینون عشقی
.
.
اوندا خجل اولوبدی شه سنّی آز اوشاقدان
بیردن گلوبدی بیر اوخ سالدی اونی ایاقدان
سسلندی گل آناجان اولدوم خجل قوناقدان
اصغرکیمی وئروب جان دوشدی یره قوجاقدان
عباسه گئتدی قولسوز مهمان حسینون عشقی
.
.
لایلای دئدی گلوم یات ایستکلی سویگلوم یات
ای حلقینی بیچن اوخ سینمده بلبلوم یات
لایلای دئسم آنان تک یوخدور بئله دیلیم یات
عباسی یاده سالدون سیندی منیم بئلیم یات
لایلای حسینون عشقی جان جان حسینون عشقی
.
.
گلدی محرم آیی اولدی عزا مرتّب
باخ«عینی فرد»الوندن، زنجاندا دوتدی زینب
بو زینبیه دن سن ال چکمه گل مرتّب
باخما بیر عده ایلور افکاروی معذّب
دیوان حقده ایلر دیوان حسینون عشقی
.
.
گلشنده گللر آچسا حتماً یانیندا وار خار
گلزاری خوار ائدنمز خاریله دولسا گلزار
گُل گُلدی، بوستاندا خار ایلیوب ئوزون خوار
خار ایلسه اذیّت سن گل خدایه یالوار
بسدور سنه اولوبدور احسان حسینون عشقی
.
.
(۱)نقل از ناسخ التّواریخ جلد امام حسین«ع»
(۲)یعنی:حرف زد
(سال ۱۳۷۰ شمسی، شب عاشورا)
.
.
.
#پیامبراسلام
#ورود_محرم
#عبداله_الحسن
#عالم_لره_سالوبدور_طوفان_حسینون_عشقی
#عینی_فرد
#ترکی
✍️ #زبدةالاشعار ✍️
?: @nohe_torki
نظر دهید