در حالات ابوالائمه مولای متقیان حضرت علی (ع)
✔️ ماجرای وفات پیرمرد خرابه نشین در خبر شهادت حضرت علی (ع)
.
✍️ زبدة الاشعار ✍️
.
🆔: @nohe_torki
.
مرحوم انور اردبیلی
.
حصار محکم احکامدور وجود علی
ستون خیمۀ اسلامدور وجود علی
.
بدون حبّ علی طاعتون ثمر یوخودی
محبّی اولسون اگر سجده ون خطر یوخودی
.
بودور چکیدۀ سوز مطلبون بودور لُبّی
قبول شرط عبادتدی مرتضی حُبّی
.
ولیّ اعظم علیدور وصیّ مطلق علی
علیدی بندۀ ممتاز خالق ازلی
.
علیدی جملۀ گفتاری ایلین اعجاز
علیدی صدره نشین و امین مجلس راز
.
مدرّس بشریّتدی بی مدرّسدی
شئون و مدحینه نهج البلاغه سی بسدی
.
علی مجاهد بی مثل دین و قرآندور
علی چراغ ضیاء بخش بزم ایماندور
.
علیدی حافظ شایان گنج بیت المال
علیدی دولت اسلامه ویردی استقلال
.
علیدی زمرۀ افتاده نون هواداری
علیدی عدل و مساوات و حق طرفداری
.
علی صفای گل و گلشن شریعتدور
علی نسیم صفا بخش باغ جنتدور
.
نماز ائدنده اقامه ئوزینی بیلمزدی
گورردی ذات حقی ماسوانی گورمزدی
.
حقوق مردمی ئوز اهل بیتی تک وئردی
عقیل قارداشینی ئوز گه سیله بیر بیلدی
.
گجه لرون چوخی اول شهریار زیبنده
گزردی برقع جمالینده کوی و برزنده
.
آلاردی حال ضعیفانی کوفه ده نظره
غذا ویرردی ئوزی بیر به بیر یتیم لره
.
ییون طعاموزی رغبتله خواهش ایلردی
صغیره قزلارا چوخ چوخ نوازش ایلردی
.
انیس درد و غمم فکروزیله گوندوزدن
دعا ایدون منی شرمنده اولمیام سیزدن
.
سیزه غذا گتوروم هر گئجه نوازش ایدوم
یوخوز گلنده یاتوردوم دیزیمی بالش ایدوم
.
نه فکر ایدون نه چکون غم نه اضطراب ائلیون
آتوز ئولوب منی نیلک آتا حساب ائلیون
.
ئورگوزون سوزونی دلخوشام منه دیه سوز
لباس تازه آلوب کهنه قویمارام گیه سوز
.
دوزنمرم آتاسیزلار حزین و زار اوتورا
تلوزی شانه لیون قویمیون غبار اوتورا
.
سخلمیون غمیله، روحوزی ایدون زنده
اوتورمیون اوتوران وقتده بوینی چگنینده
.
دیون گولون ئوزوزی دلشکسته ساخلامیون
نقدری دیزلروزی من وارام قوجاخلامیون
.
یاناندا سیز یانارام سوز و التهابوزده
خوشام دانیشدیراسوز جان دیم جوابوزده
.
فضای درد و غمون غصّه لی پرنده سی سوز
یتیمه سوز ولی حقّون عزیز بنده سی سوز
.
دیردیلر سنه قربان نه پاک طینت سن
کریمسن گوروروک منشاء کرامتسن
.
ایدوبدی چوخ بیزی شرمنده لطفوون اثری
پناهوه سیخلوب کوفه نون یتیملری
.
یتیم اوشاقلاریلان بیر مکاندا اگلشوسن
آلوب قوجاقوه سن باشیمیزه ال چکوسن
.
همیشه چوخ گوروسن ملک و مالوی واروی
فلک بیزیم کیمی آغلاتماسون بالالاروی
.
شکسته دللره سن مهربانلوق ایلورسن
مبارک آدوی ایله بیان گورک کیمسن
.
دیردی بیر عربم شهر کوفه ده ساکن
دیمرم آدیمی مندن سوروشمیون لاکن
.
غریب شهرم ئوزوم عبد حیّ لم یزلم
خوشوم گلور یانوزا ناشناس حالندا گلم
.
سوزه مقدمه یازدوم ولّی اعظمدن
امان الهی امان ظلم ابن ملجمدن
.
جری او ظالمی ایتمیشدی عشق قطّامه
ایشقلی گوندوزی دوندردی زینبه شامه
.
مطیغ شهوت اولوب ظلم قیلدی اطیابه
یتیملر آتاسین یخدی قلب محرابه
.
امین وحی خدا آسماندا سسلندی
زمین تزلزله دوشدی زماندا سسلندی
.
پیمبرین ایلدی روحینی بلا غمگین
عم اوغلی وای دیدی قصر جناندا سسلندی
.
مؤثر اولدی بلا دلشکسته زهرایه
چکوبدی ضجّه او قدّی کماندا سسلندی
.
سولار تموّج ایدوب گلدی بحرلر موجه
پرنده لر دیل آچوب آشیاندا سسلندی
.
امام قتله یتیشدی وورولدی زنگ خطر
یریمه دی دَوَه لر کارواندا سسلندی
.
قرا یل اسدی یاغوب کوفیه بلا گردی
بلنمورم ولی زینب هایاندا سسلندی
.
آخوبدی قانی دوشوب تنگه مرتضی نفسی
محاسنه توکولن لخته قاندا سسلندی
.
علی یخلدی، یخلدی عدالتون علمی
علی یخلدی، قرا گیدی کبریا حرمی
.
علی یخلدی، زماندا گوروندی عکس العمل
علی یخلدی، قضاوتلره یتشدی خلل
.
علی یخلدی، خطر یتدی طاق تقوایه
یتیملر باشینا قالمادی سالان سایه
.
همان گجیکه شهادت مقامینه چاتدی
خبرده وار نچه یوز خانواده آج یاتدی
.
ایدوبدی اهل حجابات ناله و شیون
آتا جنازه سینه مجتبی قیلوبدی کفن
.
ولیّ حقّی حسن کردگاره تاپشوردی
حسینیله آپاروبدی نگاره تاپشوردی
.
قویوبلا زینبی گوزیاشلی بوینی چگننده
آتاسینی ایکی قارداش مزاره تاپشوردی
.
آتا یوزونی قرا تپراقا قویوبدی حسن
توکوبدی گوزیاشینی یاری یاره تاپشوردی
.
نجفده ایلدی مدفون شحنۀ نجفی
یتیم پروری پروردگاره تاپشوردی
.
قرانلوق ایوده ایدوب نور کبریا منزل
حسینه دوتدی یوزون مجتبا آچوبدور دیل
.
گرک بو مرقدی ناچار ترک ایدک قارداش
یوبانما زینب ئوزون ئولدورر گیدک قارداش
.
آتا فراقنه هر چند طاقتون یوخدور
سن آغلاما آتام اوغلی سنون غمون چوخدور
.
ملالیله دل شبده بحال شیون و شین
مزار شیر خدادن جدا اولوب حسنین
.
کمال حسرتیله باشلیوبلا منزله راه
چکردی هر ایکیسی هر قدمده دلدن آه
.
گیدوردی منزله ساری او عاشقان بلا
قولاقینه اولارون یتدی صوت آه و نوا
.
قولاق ویروبله نه سسدور طنین شهره سالور
ایشیتدیلر او صدا بیر خرابه دن اوجالور
.
همان خرابیه یوز دوندروب حسین و حسن
ایدور نه گوردولر بیر پیرمردیدور شیون
.
شکست دور ایکی گوزدن او مرد بیچاره
گئجه کیمی گونوزون روزگار ایدوب قاره
.
دیور بو سوزلری یا رب پناهیم هاردا قالوب
منیم او گونده گلن دادخواهیم هاردا قالوب
.
حضورینه یتیشه بیلمورم نچه گئجه دور
گلوب سوروشمیور احوالیمی منیم نجه دور
.
نه حادثه گوره سن یوز ویروب او خوش صفته
بیله گمان ائدورم من گئدوب مسافرته
.
و یا مریضیدی حتماً یاتوبدی بسترده
گلردی یوخسا منه باش چکردی بو یرده
.
گلوب خرابه یره فکریمه قالیدی منیم
سیلیدی گوز یاشیمی گوگلومی آلیدی منیم
.
ئوزون او خوش روشون ای خدا جزاسون وئر
اگر مریضدی لطف ایله تئز شفاسین وئر
.
کریم شخصیدی حقّینده چوخ کرامت ایله
اگر مسافرت ائتسه اونی سلامت ائله
.
بو سوزلری ایشیدوب آچدی دل امام حسن
نیه بویوردی بئله آه و ناله ایلورسن
.
یتشمیوبدی الون مونسوه همدمووه
بیزه دئ دردوی نیلک شریک اولاق غمووه
.
سنون کیمی بیزیده غم اسیر ائدوب بو گئجه
قیتمین یره امیدیمیز گیدوب بو گئجه
.
ئورکده کی سوزوی واضح و عیان ایله
او هر گئجه گلنون آدینی بیان ایله
.
دیدی آدون منه آندیرمیوب او مرد خدا
دیردیم ایله بیان آدوی ایدردی ابا
.
دیردی سن کیمی اللهه بندیم منده
دئسم آدیمی تانورسان دگل خوش آینده
.
گوزوم یوخیدی اونون حیف اولا گورم گوزونی
گلوب نقدری تانتدیرمادی منه ئوزینی
.
اینانمورام تاپولا بیر اونون کیمی دلسوز
دیوم سلیقه سینی بلکه سیز اونی تانودوز
.
گلنده منزل ویرانیه او پاک سرشت
دولاردی عطری خرابه ایویم اولاردی بهشت
.
منه اولاردی جلال و ابهّتی محسوس
خلیل تک دیلینون ازبریدی یا قدّوس
.
ولی نچه گئجه دور بیقراریم گلمور
کرم و بخششنون انتظاریم گلمور
.
سوزون تمامه یتوردی او مرد نابینا
حسن حسین گوره سن نیلدی خداوندا
.
چکوبدی ضجّه فغان ایلدی ایکی قارداش
خرابه سمتینه دوشمیدی یوللاری ای کاش
.
حسن او کوره سوزی فاش قیلدی بی پرده
گلن دگول دئدیگون گوزلمه یولون بیرده
.
خبر یوخوندی سنون کوفه اهلی قاره گیوب
مرادی اوغلی تمام عالمی یتیم ایلیوب
.
او کس که سن دیوسن مرتضادی میر هدا
محاسنه نچه گوندور یاخوبدی قاندان حنا
.
نجفده گوهر تقوانی ائتمیشم پنهان
گوزل یوزون قره تپراقه قویموشام الان
.
آدیم حسن منه اوندان یتیشدی ارث کرم
عیادته داخی بوندان صورا ئوزوم گلرم
.
او پیرمردی بو غملی خبر ائدوب نگران
قرا گونه دئدی قالدوم فلک الوندن امان
.
ترحّم ایلمدون ای فلک بو گوز یاشیما
هارا گیدوم ندی چارم نه کول توکوم باشیما
.
صورا یوزونی دوتوب مجتبایه قیلدی بیان
باشون صاق اولسون آقا آغلاما سنه قربان
.
نولور شکسته دلم من عنایت ایلیه سن
دوتوب بو پیرون الیندن حمایت ایلیه سن
.
خرابه ده اوتورا بولمورم یوخومدی قرار
کمک ایله آتوون قبرینه اولوم زوّار
.
بویوردی آغلاما ناراحت ایلمه ئوزوی
ایاقه دور آپاروم سالمارام یره سوزوی
.
عنایت ایلدی قویدی سوزونی اجرایه
الون یتوردی مزار شریف مولایه
.
بیوردی ایستدیگون قبردور زیارت ایله
باباما چاتمور الون عطرینه کفایت ایله
.
یوزونی قویدی مزاره او غصّه لی زوّار
گلوب بیانه دئدی یا رحیم و یا غفّار
.
رسول اکرمه گوندردیگون کلامه گوره
بو قبر پاکیده مدفون اولان امامه گوره
.
کس عمریمی من علیسیز بو جانی نیلیورم
صفاسی قالمادی ذرّه جهانی نیلیورم
.
دیدی ئورک سوزونی ایتدی بسکه راز و نیاز
آقاسینن یاننا روحی ایلدی پرواز
.
.
#حیدریه_مدح
#حیدریه_شهادت
#حصار_محکم_احکامدور_وجود_علی
#یادگار_انور
#ترکی
.
✍️ #زبدةالاشعار ✍️
.
🆔: @nohe_torki
نظر دهید