زبانحال علیا مخدره در روز اربعین
..
..
مرحوم ذهنی تبریزی
..
..
ای قبر پاکی مطلع نور خدا حسین
ای تربت مقدسی خاک شفا حسین
..
موسایه عشقه جلوه لنن نوریوه فدا
مبهوت ایدوب کلیموی ضوء ضیا حسین
..
یالقوز بو یرده زینبون حیرتده قالمیوب
چوخ یرده تابش ایتدی بو نور هدا حسین
..
گاهی تنوری نورون ایدوب جلوه گاه طور
سینایه دوندی گوشۀ مطبخ سرا حسین
..
گه دیری روشن ایلدی نور مقدّسون
ظلمتدن اولدی راهبه بیر رهنما حسین
..
گاهی یزید عمارتینه اولدی جلوه گر
آفاقی دوتدی شامده نور ولا حسین
..
گه ظلمت فراقده بی کس رقیّه وه
اولدی باشون خرابه ده بَدرالدُّجی حسین
..
زینب گلوب زیارتیوه دلده دردی وار
ای درد عالمینه طبیب و دوا حسین
..
گتدوم دیار شامه گیدن کاروانووی
دور ایله اهل بیتووه بیر خوش صفا حسین
..
بیر باش گوتور مزاردن ایت حالیوی بیان
جانیم بو آلتی گوشه لى قبره فدا حسین
..
ویر زینبه آنامون عزیز اوغلی بیر خبر
سینه نده که ساغالدی او دورت مین یارا حسین
..
توپراقلار اوسته نعشوی قویدوم بو چولده من
شمر ایلینده باشوی زیب جدا حسین
..
دفن ایلینمدیم سنی شامه گیدنده من
قالدى جنازه ن عرصه ده بی اقربا حسین
..
کیم غسل ویردی کیم سنی یردن گوتوردی بس
کیم قبره قویدی کیم سنی دفن ایتدی یا حسین
..
قارداش بویور گوروم که سنه ایتدیلر کفن
یا کفنون اولدی خار و خسِ کربلا حسین
..
سن حالیوی دیماقلیقا معذورسن اگر
قوی من دیوم گلوب باشیما هر قضا حسین
..
آگاهسن مصائبیمه گرچه بیر به بیر
الّا دیر مسافر اولان ماجرا حسین
..
نه ماجرا نه بیر ایشیدن وار نه بیر گورن
چکدیم نقدر دشمن الینده جفا حسین
..
گه بزم خاص و عامه گیدوب کوفه ده باجون
ابن زیادیدن ایشیدوب ناسزا حسین
..
آل پیمبرون آدینی قویدی خارجی
روم و فرنگ اسیری دیدی برملا حسین
..
اولاد مصطفانی برابرده ساخلادی
هر جور و ظلمی ایتماقا گوردی روا حسین
..
آلدى گوله گوله یارالی باشیوی اله
چون واریدی باشیندا بیر اوزگه هوا حسین
..
بیر باخمادی پیمبر اؤپَردی دوداقیوی
نه مندن ایتدی شرم نه سندن حیا حسین
..
ووردی آغاج دوداقلاریوا من باخاباخا
بیر کیمسه اولمادی که الیندن دوتا حسین
..
یا بیر دیسون کسوک باشا وورمازلا خیزران
کسدوز جدایه ووردوز ایدر اکتفا حسین
..
ایتدی یزیدده بیله بیر ظلمی شامده
من باخدیم آخدی گوز یاشیم ایتدیم نوا حسین
..
قول باغلو ساخلادی ایاق اوستونده بیزلری
بیر نچّه ساعت ایلمدى اعتنا حسین
..
گاهی باخوب حقارتیله قانلو باشیوه
گه اوینادی قماری او شوم دغا حسین
..
ایچدی شرابی آچدی شماتت دلین منه
گور مجلس شراب هارا زینب هارا حسین
..
شامی کنیز ایستدی قاسم عروسینی
جنّتده درده گلدی دل کدخدا حسین
..
نه دویدی نه اوساندی جفاسیندن اهل شام
آرتوردی دمبدم ستمین اشقیا حسین
..
کوچه بکوچه شامی دولاندی قطاریمیز
من گورمدیم او یرده بیر اهل وفا حسین
..
عورت کیشی دوزولدی تماشایه صف بصف
جشن و سرور ایدردیله شاه و گدا حسین
..
نوک جداده قانلو گوروب زلف اکبری
شامون جوانلاری اَله یاخدى حنا حسین
..
طعن ایلین شماتت ایدن دف چالوب گولن
گلدی بلالی باشیما هر بیر بلا حسین
..
امر اولدی انتقام آلالار ملّت یهود
تا ایلدی بو امره منادی ندا حسین
..
قوم یهود عترتیوی ایتدی سنگسار
هر قدر قلبده واریدی مدّعا حسین
..
آل پیمبرین باشینا اود توکردیلر
یاندی شرار ظلمیله زین العبا حسین
..
آخر خرابه گوشه سی اولاد حیدره
منزل ویریلدی شامده صبح و مسا حسین
..
ایتسن اگر رقیّه وین احوالینی سؤال
شرمنده ام جوابه منِ بینوا حسین
..
از بس بابا بابا دیدی تا نقد جانینی
ایتدی نثار باشیوه اولدی رها حسین
..
توپراقلار اوسته ویردی قیزون جان خرابه ده
باتدی دوباره ماتمه آل عبا حسین
..
دردانه وی خرابه ده حسرتله دفن ایدوب
ایتدیم خرابه کُنجینی گنج خفا حسین
..
دشمن ولایتینده غریبه مزار اولوب
قالدى وحید و بیکس و بی آشنا حسین
..
«ذهنی» اگرچه چوخدی گناهون غم ایلمه
قورخما شفیع دور سنه روز جزا حسین
..
..
#اربعین #ذهنی_تبریزی #ترکی #زبدةالاشعار
نظر دهید