حکم اولوب شمر شریره نچه مین لشکریلن #اکبریه_راجی_تبریزی

شهادت حضرت علی اکبر علیه السلام
.
✍️ #زبدةالاشعار ✍️
.
🆔: @nohe_torki
.
مرحوم راجی تبریزی
.
حکم اولوب شمر شریره نچه مین لشکریلن
ایلسون جنگ بو شهزاده علی اکبریلن
.
.
بیری شمشیر گوتوردی بیریسی تیر و کمان
بیری خنجر الینه آلدی بیری نوک سِنان
حمله ایلردیله هر یانه دونردی او جوان
تیغۀ تیریله هم نیزه و هم خنجریلن
.
.
بسکه اوخ ویردیلا بال و پرآچوب مثل عقاب
گتورنموب او عقاب اوسته داخی طاقت و تاب
قوللارین آچدی سالوب بوینونا سویلردی عقاب
منی لیلایه یتور بیرجه بو زخم سریلن
.
.
دوندروب خیمه لره اشبهین اول شبه نبی
گتدی بیر طایفه نین ایچره او کان ادبی
سالدیلار زین عقاب اوستن او عالی نسبی
واریدی چونکه عداوتلری پیغمبریلن
.
.
دوتدولار دوره سین اول ماه وشین هاله کیمی
ایتدیلر قاننه غلطان او شهی لاله کیمی
واریدی چون بدنینده رمق اول حاله کیمی
سسلدی یا ابتا تاپ منی چشم تریلن
.
.
ایشیدوب خیمه ده چون شاه شهیدان او سسی
یوز قویوب قتلگهه تا اولا فریاد رسی
یتیشوب گوردی گیدوب هوشه وار اما نفسی
باشنی آلدی دیز اوسته یارالی پیکریلن
.
.
دیدی یخدی بیلمی بوکدی بو هجرانون اوغول
اولا کول باشنه سندنصورا دنیانون اوغول
گوزی یوللردا قالوب خیمه ده لیلانون اوغول
انتظارون چکر اول زینب غم پروریلن
.
.
قان دوتان گوزلرینی آچدی او دم جان اوسته
باباسین گوردی گلوب ناله و افغان اوسته
ایستدی دورسون ایاقه یخلوب قان اوسته
باشنی قویدی ایاقینه سوسوز لبلریلن
.
.
عرض قیلدی سنه قربان اولا جان یا ابتا
بیر سوزوم وار سنه تاپشور اونی بیماره بابا
خاکپایوندا منیم نعشیمی دفن ایلیه تا
قویا زوّارون ایاق سینمه چشم تریلن
.
.
آلدی آغوشه حسین اکبری با دیدۀ تر
قتلگهدن گوتوروب خیمه لره ایتدی گذر
آه اوساعت که اولوب خیمه ده لیلایه خبر
که حسین ابن علی گلدی علی اکبریلن
.
.
یتیشوب خیمه لره سسلدی بیچاره باجی
دیشرهگل گتدوم علی اکبریصد پاره باجی
سویله لیلایه که سالسون باشنا قاره باجی
چخدیلار اهل حرم جمله قرا معجریلن
.
.
گوردو لیلی توکولور طرۀ اکبر قانی
عارضین لاله صفت ایلیوب احمر قانی
غش ایدوب هوشه گلوب قینَدی مادر قانی
دیدی گل نطقه اوغول بیرجه دانش مادریلن
.
.
توز قونا قویمازدیم زلف پریشانوا من
ایمدی نه نوعی گوروم بس بلشوب قانوا من
بیرجه ساعت دوزه بولمزدیم او هجرانوا من
ایمدی نه نوعی اوغول تاب ایلییم ایللریلن
.
.
هاجر اسماعیلی گوندردی منایه قربان
زنده گوردی اونی ایلردی گینه آه و فغان
ایلدیم من سنی باش ویرماقا میدانه روان
واردی یردن گویه تک فرقیم اوغول هاجریلن
.
.
( راجی) بو قصّه یتیشمز بولورم اتمامه
حشره تک شرحنی تحریر ایلیه گر خامه
یازما بو نوعیله نوحه داخی اول ناکامه
قورخورام اود دوتا بوخامه یانا دفتریلن
.
.
.
#اکبریه_راجی_تبریزی
#اکبریه_شهادت
#حکم_اولوب_شمر_شریره_نچه_مین_لشکریلن
#ترکی
.
.
✍️ #زبدةالاشعار ✍️
.
🆔: @nohe_torki
.