تنور خولی ( لعنة الله علیه )
.
✍️ زبدة الاشعار ✍️
?: @nohe_torki
.
مرحوم میرزا عبدالوهاب حقیر خوئی
.
✔️ مقدمه
.
خبرلرین بودی موضوع غصّه محمولی
غروب وقتی یتوب کوفه شهرینه خولی
.
بیر عورتی واریدی دوستدار آل علی
عفیفه صالحه میزان علمیجه عملی
.
بولوردی عورتی آل علینی دوست دوتار
ائوینده ائتمدی سرّین عیالینه اظهار
.
دوروب دولاندی ائوی اولدی مطبخه داخل
او نازنین باشا وئردی تنوریده منزل
.
قوناقین ایلدی راحت خیالین آسوده
خبیث چشمی اولوب خواب نحسه آلوده
.
قرار عادت معهودیله زن دیندار
آچیلدی دیدهٔ دل اولدی نصف شب بیدار
.
قویاندا صحنه قدم گوردی نور باراندور
ایشیقلانوب دیه سن شش جهت چراغاندور
.
مگر نه مطبخ خولی فضای ساحت طور
تنوریدن اوجالور لمعه لمعه گویلره نور
.
بسان سینه ی سینا و وادی ایمن
درون مطبخ تاریک نوریله روشن
.
داغیلدی هوشی دوتوب پیچ و تابدن وحشت
اؤزون ایتوردی اولوب قلبی مضطرب عورت
.
دوشوبدی مطبخه آتش مگر تنور یانور
عمود نوریدی یا سقفدن گوگه دایانور
.
که ناگهان ائشیدوب طرّقوا صداسی گلور
دیولله گورماقا اوغلون اوغول آناسی گلور
.
یاننجا مریم و حوّا خدیجه و سارا
سریر ایچینده جلالیله حضرت زهرا
.
دالینجا دسته ایله حوریان باغ جنان
هامی دیولله ولی واشهید و واعطشان
.
قاباقدا زهرهٔ زهرای آسمان عفاف
ائدوب یانینجا گلنلر دالیندا قصد طواف
.
احاطه ائتدیله دور تنوری چون پرگار
چو فارغ اولدولا سعی طوافدن زوار
.
او بیتی بیت حرم تک بولوب زیارتگاه
الین آپاردی تنوره چکوب جگردن آه
.
تنوریدن چخادوب بیرجه رأس نورانی
محاسنین ائدوب الوان بوغازینون قانی
.
یارالی باشی باسوب سینه یه آچوب آغوش
ائدوب آنا اورگینده اوغول محبتی جوش
.
بوغازینین قانینی دوتدی باشینه یاخدی
گوزیندن اوز باشینا خون دل یوزه آخدی
.
قویوب دوداقلارین اوّل او قانلی لبلرینه
دولاندیریب یوزینی انبیا حرملرینه
.
گلون گورون اولا بیر باشدا اون ایکی یاره
بدن نه حاله قالور وای زینب زاره
.
ئولنده قویمادیلار اهل بیتین آغلاماقا
گلنمدی باجی لار گوزلرینی باغلاماقا
.
اوزوم دیوب بالا وای آغلارام اوزوم بو سبب
دویونجا آغلامادی اوغلوما قیزیم زینب
.
اگر گوزومده کی سو قان اولا اورک سووماز
حسینیم ایچمدی سو او سودان گوزوم دویماز
.
وئرنده حضرت زهرا اجازه گوز یاشینا
ووروب خدیجه ی کبرا ایکی الین باشینا
.
خروش و غلغله فریاد وا حسینادن
دایاندی قبّه ی افلاکه فرش غبرادن
.
قورولدی مطبخ خولیده محفل ماتم
بتول و ساره و حوّا خدیجه و مریم
.
دیردی هر بیریسی وای نور عینیم وای
علیّ اکبری ناکام ئولن حسینیم وای
.
باش آچدیلار هامی باشدان گوتوردولر معجر
اوغول دیوب دوشوب آز قالدی ضعفدن مادر
.
باشین آلوب دیزینه دورت معظّم بانو
توکوبله زلف سمن بو داغیتدیلار گیسو
.
ز بسکه اوخشادیلار دوتدی آغلاماقدان شور
قیامت عالمی بر پا قیام شور و نشور
.
گوروب بتول خواتینیدن اوجالدی صدا
حسینینی بو مقالاتیله ائدوبدی ندا
.
.
✔️ زبانحال حضرت زهرا سلام الله علیها
.
اولور بالا آنا قوینوندا گرچه راحت اوغول
یازیلمیوب سنه امّا بیر استراحت اوغول
.
گوز آچ قوناقلاریوا بیرجه خوش صفا ایله
قوناقه لازمه دور احترام و حرمت اوغول
.
بهشت خانملاری گویدن یره نزول ایلیوب
بو قصدیله سنی تا ایلسون زیارت اوغول
.
قوری دلیله اوزوندن قوناقلاری ممنون
نوازش ایت یولا سال جانه وار بو منت اوغول
.
بو صاق یانیمداکی جدّه ندی حالینی خبر آل
اماندی ایتمه آنامدان منی خجالت اوغول
.
جواب ورماقا یوخ سنده حال حقون وار
یورولموسان ویریلوب چوخ سنه اذیت اوغول
.
اگرچه زحمتوه راضی اولمارام بیرده
قبول ایله منیم خاطریمه زحمت اوغول
.
باشی بلالی بیر آز گوگلوم ایستوری دانیشاق
گجه گیچر گیده فوته مباد فرصت اوغول
.
فداک یا ولدی یا غریب و یا مظلوم
منه بو امت الیندن ایله شکایت اوغول
.
باشنداکی یارالاردان خبر ویرور اورگیم
گرک نقدر بدنده اولا جراحت اوغول
.
نه گونده دور بدنون احتیاجی گورماقا یوخ
ایدر باشون بدنون حالینی حکایت اوغول
.
اوغول کول اوستی هارا , سن هارا , تنور هارا
گتورمه میش باشیوا قالدی بیر مصیبت اوغول
.
مگر بو قالدی جدایه ووروب دولاندیرالار
کسیک باشون ایده تا شهرلرده شهرت اوغول
.
بو ظلملر , بو بلالر اوساندیلار یا نه
گتوردولر باشوا بو وفاسیز امت اوغول
.
نقدر دیندیرورم دینمومسن بو دفعه ده گر
جواب ویرمیه سن ایلرم قیامت اوغول
.
.
دوشنده فاطمه دلدن گلوب مقاله امام
ایدوب سوالینه ردّ جواب ویردی سلام
.
.
✔️ جواب حضرت امام حسین علیه السلام
.
حسینوین طرفیندن باشون سلامت آنا
الیندن آلدیلا اوغلون ستمله امت انا
.
اوزوم الوم خبریمی گتورموشم ایده سن
جفای امتینی جدّیمه شکایت آنا
.
باشیمدا وار اون ایکی معتبر شهود و عدول
ویرور شهادتیمه هر بیری شهادت آنا
.
یانیمدا دورت مینه دین شاهدیم صغیر و کبیر
گور هر بیرینده ثبوته یتوب عدالت آنا
.
ایدر ادای شهادت حضور داورده
اولا ضرورت داعی مقام حاجت آنا
.
علاوه یتمیش ایکی تن شهید ایچون تعدیل
همین بو اکبر و اصغر ایدر کفایت آنا
.
منیم قانیمدا محققدی سرّ ثارالله
زیارتین فقراتی ایدر دلالت آنا
.
قانیمدی خون خدا , خونبها خدای شهید
شهید شاهدی جدیم ایدن زیارت آنا
.
مصیبتمده جزای جزیل و صبر جمیل
سنه خدای جلیل ایلسون کرامت آنا
.
نه احتیاج تسلی سنه اوزون بولوسن
بیز اهلبیته اولوب قتل ازلدن عادت آنا
.
چوخ آختاروردی گوزوم یاخشی وقتده گلدون
چکردیم ایمدیه دین انتظار فرصت انا
.
نه دیندیرن نه دینن وار یورولموشام گجه نی
ایدیم بو سینه ده تا صبح استراحت آنا
.
بو حالیله منی قویمازلا راضیم قویالار
تنور ایچینده اولام بیر دقیقه راحت آنا
.
صباح اولاندا قوراللار بیر اوزگه هنگامه
که وار بلالی باشیمدا بویوک مصیبت آنا
.
وراللا سنگ جفا شامده کسیک باشیما
ایدنده نیزه ده کهف آیه سین تلاوت آنا
.
سکوت ایتماقمی کم محلّوق ایتمه حساب
سوروشما سرّینی وار دینمه ماقدا حکمت آنا
.
سنون یانیندا اوزوم زینبون یانیندا خیال
قویار خیالی مگر منده نطقه طاقت آنا
.
قالوب نه حالته اوچ گوندی گورمیوب یوزیمی
گورنده نیزه باشیندا ایدر قیامت آنا
.
باخوب جدایه وورار چوب محمله باشینی
زبس سینان باشینی گرم ایدر محبت آنا
.
گتورسه لر نه بلا نوشدور کسیک باشیما
ولیک زینب و کلثومه دور اذیت آنا
.
بو امر خیلی گراندور سنه عیاندی منه
ایدلله اهل عناد آشکار عداوت آنا
.
خانم باجیلاریما , محترم حرملریمه
ایده لله اهل جفا کوفه ده شماتت آنا
.
قوناقلاروندا اوزونده مشرف ایلموسن
بو گلماقوز سیزه زحمت منه خجالت آنا
.
بغشلیون منی سیز بانوی معظمه سیز
گرک وظیفه شانوز اولیدی حرمت آنا
.
نچون قوناقه گوره احترام لازمدور
ولی نه فایده یوخ منده استطاعت آنا
.
خجالتم الی بوش منزلیم محقردور
بو منزلیمده سیزه بولمورم لیاقت آنا
.
باشیم بدنده دگل تا دورام ایاق اوسته
ویرم ظهوره حضورنده حسن خدمت آنا
.
اماندی قوی یوزومی تپراقا ایاقوندان
اپوم خیالیده مدتدی وار بو حسرت آنا
.
غریبم آغلا منه کربلاده قویمادیلار
دویونجا آغلیالار اهل بیت عصمت آنا
.
جزا مصیبتیمه یا عوض شهادتیمه
اقلّ مرتبه دور پایه شفاعت آنا
.
(حقیر ) نوکریمون نسبتی سنه منه وار
ولی سنوندی شفاعتده حق سبقت آنا
.
#تنور_خولی
#شام_غریبان
#خبرلرین_بودی_موضوع_غصه_محمولی
#اولور_بالا_آنا_قوینوندا_گر_چه_راحت_اوغول
#حسینوین_طرفیندن_باشون_سلامت_آنا
#حقیر_خویی
#ترکی
.
✍️ #زبدةالاشعار ✍️
?: @nohe_torki
نظر دهید