ذکر ولادت و مصائب حضرت زینب کبری(س)
.
.
.
.
مرحوم تائب تبریزی
.
دنیایه قویاندان قدمین حضرت زینب
آز گولدی ولیکن چوخ اولوب محنت زینب
.
.
جبریل اولوب محضر پیغمبره نازل
عرض ائتدی که ای علم لره واقف و کامل
زینب قوی آدین بو قیزیوین خالق عادل
ایستور اولا ظاهر شرف و عزّت زینب
.
.
زین اب اولوب زینب آدی وار بونا علت
دین اوسته دوزوب یتدی نئجه رنج و ریاضت
قویموب هدر اولسون آتاسی چکدوقی زحمت
واقعده اولوب دینینه چوخ خدمت زینب
.
.
یثرب شعف و شور و سروریله دولان گون
گل لر او گله رشگ آپاروب جمله سولان گون
یعنی آناسی فاطمه دن زینب اولان گون
گوستردی بیوک رمز طفولیت زینب
.
.
آغوشینه آلدی باباسی شاه ولایت
آلدى یوزونی اؤپدی حسن ائتدی محبت
گوردی قاپویه چوخ باخوری گوزلری حسرت
قالدی هامو حیران که ندور نیت زینب
.
.
ناگاه حسین گلدی باجی مقصده چاتدی
آلسون باجیسین اللرینی قارداش اوزاتدی
زینب ئوزونی قارداشین آغوشینه آتدی
ایسلاندی گلابیله گل صورت زینب
.
.
جوش ائتدی وفا گوزلری خونابیله دولدی
هر کیم بو یولی گئتمه سه بولمز که نه یولدی
قارداش باجی آغلار گوزیله قول بویون اولدی
به به نه گوزل وقتیدی بو ساعت زینب
.
.
وئردی آناسی سود اونا پستان وفادن
آیریلمادی بیر عمر اودور درد و بلادن
هر تیر بلا اولدی رها شست قضادن
اوز سینه سینی ائتدی سپر حضرت زینب
.
.
بش ایل یاشادی خرّم و خندان گل زهرا
اوندان صورا مفتوح اولونوب باب بلایا
گوردی آناسی فاطمه نی دوگدوله اعدا
بولدی بو دوگولماق اولاجاق قسمت زینب
.
.
اوّل آناسی ئولدی قرار دلین آلدی
گل عارضی باد غمیله سولدی سارالدی
یاندی آنا تابوتینی آغلار یولا سالدى
دنیا بویی حسرتدی بو بیر حسرت زینب
.
.
باشدان یارالی گوردی خانم گه ئوز آتاسین
شوریله اوجالدوب گویه فریاد و نواسین
آغلار گوزیله باغلادی شمشیر یاراسین
مشق ایلدی اولدی بو عمل عادت زینب
.
.
گه تعزیه دار شه خیبر شکن اولدی
گه گئتدی حسن تعزیه دار حسن اولدی
دنیا اونا زهرا کیمی بیت الحزن اولدی
اولدی غم ایّامیله انسیّت زینب
.
.
هر لحظه خُمِ غصّه ده بیر رنگه بویاندی
اود دوتدی یانان قلبی شرار غمه یاندی
پرگار صفت دایرۀ عشقی دولاندی
تخمیریدی گویا غمیله طینت زینب
.
.
قارداش لب لعلین گوروب آلقانیله الوان
غمدن صدف چشمینه دولدوردی قیزیل قان
قارداش لبی تک دوزدی یوزه دانۀ مرجان
یاقوت جگر یوزده اولوب زینت زینب
.
.
بیر آز دایانوب سایۀ سرو و سمنینده
قویموبلا ولی قالسون او بلبل چمنینده
ایش بیر یره یتدی قالا بولموب وطنینده
یثربدن اولوب ئوزگه یره هجرت زینب
.
.
وئرمیشدی بلی روز ازل لفظ بلایه
باغلیدی اودور تار دلی تار وفایه
گوردی که بلا شاهی گیدور کرب و بلایه
بولدی گرک اولسون او شهه شرکت زینب
.
.
پای دلینی بستۀ تار محن ائتدی
قارداش دالیجا دوشدی وفاسین علن ائتدی
صدیقۀ کبری قیزی ترک وطن ائتدی
باشلاندی بیوک بیر الم و محنت زینب
.
.
بیر یر که او یر مأمن اولا خلقه جهاندا
زینب او یری مسکن ائدوب سخت زماندا
صد حیف که قویموبلا قالا دار اماندا
اول دار اماندا چوخالوب وحشت زینب
.
.
وحشتلی گوروب بسکه خانم دار امانی
اوردان چیخوب ئوز قویدی چوله دلده فغانی
گلدی یتیشوب ائتدی مکان کرب و بلانی
اولموشدی بلا دشتینه چون دعوت زینب
.
.
تا قانه دونن نهر فراتین سویون ایچدی
وار کرب وبلاده نه بلا رمزیله سچدی
اوغلانلارینا اوتدی کفن شوقیله بیچدی
تا قارداشا نهضتده اولا شرکت زینب
.
.
اوغلانلارینی ائتدی ئوزی عازم میدان
تا جان به کف ایتسونله اولار خدمت قرآن
قرآنه گوزل جانلارینی ائتدیله قربان
گلگون کفن اولدی ایکی گل صورت زینب
.
.
گوتدی قدم مثبت او قول ازلیله
ائتدی نچه قارداشی کفن پوش ئوز الیله
جنگاهه روان ایلدی مین شور دلیله
روحیه سین ئولدورمدی هیچ حضرت زینب
.
.
دین اوسته باتوب تشنه قیزیل قانه حسینی
دوشدی یارالی صفحۀ میدانه حسینی
باش وئردی وئروب عهدینی پایانه حسینی
دین اوسته یتوب خدمت ایچون نوبت زینب
.
.
باغلاندى قولی دوشمه دی اما هیجاندان
دین اوسته گئچوب قارداشی تک باشیله جاندان
قارداش قانینی قویمادی دوشسون جریاندان
افراشته اولدی علم نهضت زینب
.
.
باشه بالا قیزلاری یغوب دختر زهرا
هر شهره یتوب سالدی اورا شوریله غوغا
هند اوغلونی یخدی ایلدی دهرده رسوا
چوخ قابل تقدیردی بو همّت زینب
.
.
هر سیل قباقینده خانم داغ کیمی دوردی
شاماتی آلوب شأن و شرف مجلسی قوردی
ویرانۀ شاماته حسین پرچمی ووردی
اوردا اسوری پرچم حرّیّت زینب
.
.
ایستوب که وئره عترت پاینده حسینه
هم مسلک اولا ملّت آینده حسینه
قویدی بالاسین اوردا نماینده حسینه
بولسونله حسین دولتیدور دولت زینب
.
.
خواهش ایلدی بیر نچه ارباب محبت
استاد حسینی ایده بو شرحی کتابت
بو «تائب» شاگرد ائدوب استادیله شرکت
اولدی بو کتابنده بیر آز صحبت زینب
.
.
نظر دهید