حالات حضرت رقیه (س)
.
.
مرحوم حاج صدیف بختیاری
.
.
دوتوبدی آینۀ قلبیمی غبار ئولورم
اجل گلوب ایدورم حقه جان نثار ئولورم
خرابه ده قوری یرده علیل و خوار ئولورم
اسیر و خسته قولوم بسته دلفکار ئولورم
گوزوم قالوب قاپیدا عمّه داغدار ئولورم
.
.
ندن یوباندی بابام بس هاچان گلر شامه
نه وار سفارشی نه یوللیور بیزه نامه
کمند چرخ سالوب اولمیا اونی دامه
اذیتیم بی بی زینب یتیشدی اتمامه
حلال ایله منی گلدی احتضار ئولورم
.
.
مدلل اولدی منه هانسی جرم و تقصیریم
قره یازیلدی ازل گونده لوح تقدیریم
منیم که یوخدی گناهیم ندور بو زنجیریم
فهیمه سن ندور آیا علاج و تدبیریم
خرابه اولدی منه حبس جانشکار ئولورم
.
.
او وقتیدن که خرابه اولوب منیم وطنیم
طراوتین ویروب الدن سولوبدی یاسمنیم
خرابه ده قوری یرده ضعیف اولوب بدنیم
لباسلر سوکولوب کهنه لیبدی پیرهنیم
بو یاره قلبیم اولوبدور جریحه دار ئولورم
.
.
بی بی دولاندیر اوزون قبلیه منیم یوزومی
گیدنده اکبریمون یانینه یتیر سوزومی
ئولونجه قویدون على یولدا منتظر گوزومی
قرا ایدیبدی فراقون ایشقلی گوندوزومی
آدون دیلیمده گوزوم یولدا اشکبار ئولورم
.
.
علی گوزوندن ایراق دوشموشم یامان درده
محیط اولوب منه غم فوجی پرده به پرده
بو شهرون اهلی یاتالار حریر بسترده
بو آج قارینلا نجه من یاتیم قوری یرده
علاوہ قولدا واریم بند استوار ئولورم
.
.
اؤزون بیلورسن على من نقدری خوش سیرم
دیدیم گلرسن اوزون دردیمی سنه دییرم
بو پاره معجره باخ کهنه پیرهن گییرم
بو قرص نان جوینه قناعت ایلیرم
بو پاره کرپیجی بالش ویروب قرار ئولورم
.
.
بی بی سن الله الون قوى اورگیمین باشینا
اورگیمون قانی ممزوج اولوب گوزوم یاشینا
منی که دفن ایلدون یاز مزاریمون داشینا
ئولونجه منتظر اولدى رقیّه قارداشینا
بودور وصیتیم ای غملره دچار ئولورم
.
.
تمام ایله سوزون «بختیاری» ایتمه رقم
مصیبت ایلر اثر اود دوتار الونده قلم
عموسی حضرت عباس او بحر جود و کرم
ممات وقتی گلر باشون اوسته الده علم
حیات وقتی ویرر طبع شاهوار ئولورم
.
.
#حضرت_رقیه #صدیف_بختیاری #حضرت_رقیه_شهادت #ترکی #زبدةالاشعار
نظر دهید