دور ای سوسوز ،رسول گرامین سلاله سی #اربعین_حسین_ساکت

اربعین
.
#زبدةالاشعار
.
: @nohe_torki
.
حسین ساکت خسروشاهی
.
دور ای سوسوز ،رسول گرامین سلاله سی
گلدیم گتوردوم الده دولی سو پیاله سی
.
باشمدا چتر شعلۀ لرزان دلیمده آه
گلدیم بو قبر پاکین اولام شمع و لاله سی
.
گر ممکن اولسا زینبوی پیشواز ائله
یورقوندی وار دلینده غم چند ساله سی
.
ساینده ایلوری دلیم احساس راحتی
بو سایه ده نه جنّت و ظلّ نهاله سی
.
وصلونده آرزوی بهشت ایلسم اگر
اولسون منه حرام بهشتین حواله سی
.
قبروندی بو گوزومده منیم جلوه گر و یا
عرش خدادی چولقیوب آفاقی هاله سی
.
تپراقلار آلتدا اولسادا پنهان گنه گلور
پائین پادن اکبرین عطر کُلاله سی
.
بیر خط وار رقیه نی بوردا نشان وئرور
بوخطّ ده گزوبدی محبت غزاله سی
.
گر بیر زمان آمان وئره بو قانلی گوز یاشیم
وار باجوین حضوریوه اودلی مقاله سی
.
ای آفتاب، حسرت وصلونده شامده
یاندی مدینه گللرینون جان ژاله سی
.
عزت سراسی زینب زارین سنونکیدور
ای قبلۀ امید یانا قوی قباله سی
.
هشتادہ دین اسیر محبت گتورمشم
عرشه چیخودی هر بیرینون بانگ ناله سی
.
بو عابدون بو نازلى سکینه بو فاطمه
بو نازنین سریه که یوخدور مُحاله سی
.
ال سینه ده طواف ائدوری قبریوی رباب
یوزده یازور سرشکی مصیبت رساله سی
.
قلبیم یانوبدی آتش غمده گذشت ائله
طومار درد و غصه مین اولسا اِطاله سی
.
بیر قدّی خمدی بیر تن مجروح بیرده اشک
قوم ستمگرین منه بذل و نواله سی
.
.
دور ، ای سالان نظام جفانی نظامدن
مندن سوروش حکایت جانسوز شامدن
.
.
قوی چکدیقیم شکنجه و آلامدن دیوم
بیر شمّه ده اشاره ئیله شامدن دیوم
.
غم مکتبنده درس غمی ایلدیم تمام
ای پیر سن سوروش غم ایّامدن دیوم
.
زینب چکن مصیبتی ایوب چکمدی
هانسی جفای فرقۀ ظلامدن دیوم
.
گون گورمه دی اسیره باجین شهر شامده
تا صبح محنتین دئمیوم شامدن دیوم
.
شامین یهود کوچه سینون داستانی وار
من غصه لی نجه شعف عامدن دیوم
.
قورخوم بودور که غم یته عباسه قبریده
کول توکدولر نجه باشیما بامدن دیوم
.
قانیله دولدوروبدولا گویلوم پیاله سین
تا چوب خیزران بوشادان جامدن دیوم
.
آغاز شهر شامده روحوم سیخلدی چوخ
پایانه وئردیم امریمی انجامدن دیوم
.
سندیردیم هفت خوان جفانین طلسمینی
سالدیم یزیدی دامه که اسلامدن دیوم
.
جرأتله مجلسینده آپاردیم على آدین
فرصت تاپولدى قاتل اصنامدن دیوم
.
هنداوغلونون دئدیم که دوشوب طشتی بامدن
رسوای خلقه حرمت ارحامدن دیوم
.
کُفاریدی اولار که ملاک اولدی بدریده
شایسته دور آتام گوتورن گامدن دیوم
.
قرآن بیزیمدی تاج شهادت بیزیمکیدور
عزت بیزیمدی اب ، جد و اقوامدن دیوم
.
زمزم بیزیمدی کعبه بیزیمدی صفا بیزیم
آزدور نه قدر حق ائدن اکرامدن دیوم
.
القصه وئردیم آخره سیر و سلوکیمی
گلدیم یانوندا ائتدیقیم اقدامدن دیوم
.
علت ندور رقیه نی مندن سوروشموسان
تا من حضوریوه او گل اندامیدن دیوم
.
بیر نامه گوندروبدی بالان شامدن سنه
وئرسن اجازه من ائله پیغامدن دیوم
.
.
بو نامه نی یازوبدی دل زینبه حسین
بیر گوش وئر بو نامه ده کی مطلبه حسین
.
.
بیر خامه ده چتین بئله طرح پیام اولا
بیر نامه ده چتین بئله اودلی کلام اولا
.
سرلوحۀ دلیمده یازوبدی بو نوعیله
مندن بابام حسین شهیدہ سلام اولا
.
دوشدوم یولوندا چوللره دوزدوم جفالره
تا دفتر وفاده غمیم ثبت نام اولا
.
آرزوم بو دور که اولمیا سلطان دین ملول
فکریم بودور که دولت شهده دوام اولا
.
گر ایسته سن منیم بوله سن روزگاریمی
حق ایسته دی که گنجه خرابه مقام اولا
.
گورمز ائله ادبلی بالا بیرده چشم چرخ
تا گردش نظام فلکده نظام اولا
.
مظلومدی آنام کیمی مظلومه وئردی جان
اولدی مگر او غمزدیه احترام اولا
.
جان وئرماقی شبیهدی بیر عندلیبه کی
بال و پری سنا ایاقی بند دام اولا
.
قالمشدی درد الینده سیزیلدردی زار زار
آلدیم کناره باشینی شاید که رام اولا
.
آخر نفسلرینده منه باخدی آغلادی
گوردوم که شمع محفلیم ایستور تمام اولا
.
جوشه گلوب محبتیم ئوپدوم دوداقینی
تا اودلی قلبینه نفسیم التیام اولا
.
آز قالدى یاندیرا منی ده آه آتشی
گوردوم که حقلیدی ایشی ناله مدام اولا
.
افسوس گلمدى اجلیم ایسته دی قضا
من نایب الزیاره او قز تلخکام اولا
.
دنیا سزادی آغلاسا قان بو مصیبته
اعلام ائدنمدیم بالاما ختم عام اولا
.
شمع وجودی سؤندی منی قویدی شامیده
شأمین گوروم ایشیق گونوزی تیره شام اولا
.
من ایندی ده او نازلی قزین سوگواریم
زیبنده دور بو غمده شریکیم آنام اولا
.
سلطان بارگاه محبت حسیندور
«ساکت» گلوب بو درگه عشقه غلام اولا
.
.
#اربعین_حسین_ساکت
#دور_ای_سوسوز_رسول_گرامین_سلاله_سی
#ترکی
.
#زبدةالاشعار
.
: @nohe_torki