دور شامدن پوزقون گلن زواره باخ قارداش #اربعین_خادم_تبریزی

اربعین
.
.
مرحوم احمد پورعطا ( خادم تبریزی )
.
.
دور شامدن پوزقون گلن زواره باخ قارداش
دلده حسین وای دیدۀ خونباره باخ قارداش
.
.
دور ای یارالار یورقونی پوزقون باجون گلدی
ای قلبی اوخلی جان ویرن دلخون باجون گلدی
ای غصه لی محزون ئولن محزون باجون گلدی
باشدا قرا دلده نوا افکاره باخ قارداش
.
.
دور گور پریشان قافله اولاد زهرادور
زلفون یولانلار قیزلاروندی آل طاهادور
اوغلی ئولن قلبی یانان بیچاره لیلادور
خاک شفاده عابد بیماره باخ قارداش
.
.
ویران اولیدی کوفه نی یاندیم بلاسیندن
ابن زیادین بزمینین جور و جفاسیندن
مرجانه نین اوغلی دیین بول ناسزاسیندن
سالدی شراره قلبیمه کفّاره باخ قارداش
.
.
هانسی طریقتده بو وار مهمانی خوار اولسون
زهرا عیالی وارد بزم قمار اولسون
زینب ،شراب مجلسی ، اسلامه عار اولسون
گوز یاشلارین توکدی حرم عذاره باخ قارداش
.
.
خلوت اولیدی قبرون ای شاه جهان قارداش
زینب ویرییدی قولّارین بیرجه نشان قارداش
گور نه ویروبلار تازیانه کوفیان قارداش
شامون یولوندا لشگر کفاره باخ قارداش
.
.
قارداش عجبدور زینبون ئولمز سلامتدور
سنسیز جهاندا بیزلره هر گون قیامتدور
لیکن آغاردان زلفیمی طعن و شماتتدور
دروازۀ ساعاتی گور اغیاره باخ قارداش
.
.
هر نه بلا گوردوم دایاندیم شامیده سنسیز
بیلدون اوزون جاندان اوساندیم شامیده سنسیز
شامی دولاندیم سهل ساندیم شامیده سنسیز
ایوای یهودی کوچه سی کفاره باخ قارداش
.
.
#اربعین #خادم_تبریزی #ترکی #زبدةالاشعار