زبدةالاشعار

دوشنده یادیمه شخصیت امام جواد #جوادیه_سعدی_زمان

حالات شهادت حضرت جواد الائمه (ع)
#گریز به #مسلمیه (ع)
.
.
.
مرحوم سید رضا حسینی سعدی زمان
.
دوشنده یادیمه شخصیّت امام جواد
چکر یانان جگریم اُمّ فضل اَلیندن داد
.
اولار که شیعۀ اثنی عشردی شهرتی وار
ائمّیه اولارین عشقی وار، ارادتی وار
.
مدام ایده لّه توسّل بو اون ایکی نوره
دیمز بو آدلاری هر کیمسده دلده ظلمتی وار
.
اولوب ائمّه اوز عصرینده تک به تک مظلوم
هامی سنین دله تاثیر ایدن کدورتی وار
.
بو سهلیدور که اولوب آل مصطفی مقهور
ئولونجه شیعه لرین سینه ده جراحتی وار
.
اولونمیوب اولارا لامَحاله بیر مجمع
بیری بیریله قبورین اوزاق مسافتی وار
.
بیری نجفده یاتوب باشدا وار قلج یاراسی
اودور سبب نجفین عرشه اشرفیّتی وار
.
اونون ولایتیدور روح مذهب و ایمان
اونیله نعمت اسلامین اکملیّتی وار
.
یاتوب بقیعیده دوردی، بیری خراساندا
بیر آتا بیر بالا سامرّه ده اقامتی وار
.
بیرین فرات کنارینده کربلاده سوسوز
شهید ایدوبله، اونون بیر اوزون حکایتی وار
.
بیرینی گوشۀ زنداندا حبس ایدوب هارون
بیر عمر کُنده و زنجیریله رفاقتی وار
.
باخور ئورک گوزی بغداده، دل گَلور داده
او شهریده بیر امامین جوار رحمتی وار
.
آدی امام محمّد تقی، آتاسی رضا
هامی غمه ئوزینون صبری وار، رضایتی وار
.
جواد دور لقبی، منبع سخاوت دور
خدا بُلور نجه بیر جوری وار، سخاوتی وار
.
ایگیرمی بِش ایل ایدوب عمر او سرور مظلوم (1)
جوان ئولوبدی، آز عمرینده چوخ مصیبتی وار
.
اگر گوزوم یاشی قویسا گرک یازام باشدان
بیان ایدم نه قَدَر قصّۀ شهادتی وار
.
او گون که ایلدی یحیی بن اَکثَمی مغلوب
مُبرهَن اولدی نه اندازه اعلمیّتی وار
.
امام قتلینه اقدام ایدوب او بی ایمان
گَتوردی ظاهره هر مکره ماهریّتی وار
.
سِعایت ایلدی مامون یانیندا بیر نچه یول
دیدی بونون سنه چوخ رخنۀ ریاستی وار
.
دیولّه خلق بودور حجّت خدا خَلقه
بو حقّی غصب ایده مامون مگر لیاقتی وار؟
.
بو بیر طرفدن، اویانداندا گَلدی اُمُّ الفضل
یتوردی محضر مامونه هر سِعایتی وار
.
دیدی بابا منی ویردون بو هاشمی نسبه
بونون سنیله بُلورسن اوزون عداوتی وار
.
مدام او بیرسی عیالین منه ویرور ترجیح
دیور بونون سنه بی منتها فضیلتی وار
.
علاوه سَبّ ایدوری هم سنی هم آتاوی
دیور نه قدر مزخرف کلامه فرصتی وار
.
بو سوزلری ایشیدن وقت مستیدی مامون
اودور که مُذمِن خَمرین مدام عقوبتی وار
.
اَیاقه غیظیله دوردی او بی حیا فوراً
دیدی تقی منی سَبّ ایلسون نه قدرتی وار
.
چاقوردی بیر نچه بی رحم محرم اسرار
دیدی سیزون بُلورم قلبیزون قساوتی وار
.
گَلون منیله نه حکم ایتسم ایلیون اجرا
بو امره ایلسه هر کیمسه سبقت عزّتی وار
.
خلیفه حاجِبی یاسردی راوی مطلب
دیر خلیفه نی گوردوم کمال وحشتی وار
.
تمام غیظیله شمشیرین ایلیوب عریان
امام منزلینی قصد ایدوبدی سرعتی وار
.
گَلوب نه گوردی یاتوب حجره ده امام جواد
همان او حجره ده سجّادۀ عبادتی وار
.
ایدوب عبادت اولوب خسته، یوخلیوب راحت
بیر آز زمان بیله معلوم خواب راحتی وار
.
جمالی مَضجَعینی گون کیمی منوّر ایدوب
ایشیقلانور دیه سن آفتاب طلعتی وار
.
یوزین دوتوب دیدی محرملرینه اول بی دین
بونون منه بُلوسوز متّصل خیانتی وار
.
چَکون قلجلاروزی دوغریون بو گُل بدنی
دایانماقین بیله بیر وقتیده نه علّتی وار
.
چَکوب قلجلاری بی رحم لر غلافیندن
یوزینده باخمادیلار نور حقّ علامتی وار
.
امامی دوغرادیلار قطعه قطعه، بند به بند
امامه باخ نجه اعجازی وار، کرامتی وار
.
آچلدی صبح گَلوب هوشه بی حیا مامون
ز بسکه مستیدی بُلموردی نه جنایتی وار
.
گَلوب حضورینه یاسر دیدی گئچن گئجه نین
خلیفه هیچ بُلوسن نه بیوک سیاستی وار؟
.
گئجه تقیّ جوادی یتورموسن قتله
جزاده سندن اونون جدّینه شکایتی وار
.
ایشیتدی بو سوزی مامون پوزولدی احوالی
دیدی بو سوز ندور؟ عرض ایتدی عین صحّتی وار
.
جواب ویردی دایانما، خبر گَتور فوراً
حیات مژده سی هر کیم ویره بشارتی وار
.
گَلوبدی یاسر امام جواد محضرینه
گوروب گَلور سسی، خوش لحنیله قرائتی وار
.
نماز صبحی قیلوب باشلیوبدی تعقیبات
خدای لَم یَزَل و لا شَریکه طاعتی وار
.
ویروب سلام دیدی سیّدی سنه قربان
خلیفه نین سنه بی منتها مودّتی وار
.
حضوریزه منی گوندردی حالیزی سوروشام
وجودیزون ایشیدوب مختصر نقاهتی وار
.
آچوبدی نطق گهربارینی بویوردی امام
خلیفه نین عملیندن یقین ندامتی وار
.
گئجه گَلوب منی تیغیله بند بند ایلدی
او امره ایمدی پشیمان اولوب، نه حکمتی وار؟
.
دعای حفظ اوخوموشدوم یاتاندا من یاسر
همان دعاده خدا حفظی وار، حراستی وار
.
دیوب بو سوزلری پیراهنین کنار ایلدی
بویوردی باخ گور او ضربتلرین سرایتی وار؟
.
باخاندا گوردوم امامین وجودی سالمدور
قلج نشانه سی یوخ، گُل کیمی لطافتی وار
.
کمال وجدیله گَلدیم حضور مأمونه
دیدیم خلیفه امامین عجب جلالتی وار
.
نه دوغرانوبدی، نه جسمینده بیر قلج یری وار
نه انکسار مزاجی، نه ضعف حالتی وار
.
ایشیتدی بو سوزی شاد اولدی، سویلدی بُلدوم
شراب اُمّ خبائثدی، جرم و حرمتی وار
.
شراب ایچن ئوزی ئوز عقلینی ایدر زائل
محمّد عربینون گوزل شریعتی وار
.
او گونکه گوندن او ملعون شرابی ترک ایلدی
دیدی بو جرم دگل، کفریله شراکتی وار
.
قیزین چاغوردی، دانیشدیردی، ایلدی تهدید
دیدی سنه آتاوون عمده بیر وصیّتی وار
.
گَلوب دیه سن منه بیر سوز تقیّ هادیدن
یقینون اولسون او دم نفسیوون هلاکتی وار
.
سِعایت ایتمدی اوندان صورا او ملعونه
ئورکده ساخلادی هر کینه و خصومتی وار
.
او ساعت اولدی که مأمون جحیمه واصل اولوب
یرین گویون اونا تا روز حشر لعنتی وار
.
ایدوبدی غصب خلافت برادر مامون
او ظالمین دیمه مأمون کیمی شقاوتی وار
.
آدی صحیفه ی تاریخه معتصم یازیلوب
جفا و جوریده مأمونیدن زیادتی وار
.
او بی حیا اوزینه اُمّ فضلی راغب ایدوب
امام قتلینه بُلدی اونون غریمتی وار
.
امام قتلینه مأمور ایتدی محرمینی
دله موثّر اولان قصّۀ شهادتی وار
.
دیسم نه نوعیله مسموم اولوب دلیم یانسون
کیمون ایشیتماقا بو ماجرانی طاقتی وار
.
یازوب صریح مناقبده ابن شهر آشوب
اونون بو مطلبه بیر معتبر روایتی وار
.
ئورکده قبره آپارّام آناسنا دیرم
علوم صاحبینون هاردا بیر روایتی وار
.
بو قدر عرض ایده بُلّم که زهرلی دسمال
اولا وفاتینه علّت، خدا مشیّتی وار
.
یازار ولیک بو طرزیله مجلسی مرحوم
اونون روایتینون عیبی یوخدی، نسبتی وار
.
امامه ویردیله مسموم رازقی انگور
امام گوردی وجودینده زهر شدّتی وار
.
اَلی اورکده ایدوب راست قبلیه قدّین
دیدی یانور جگریم، قلبیمون حرارتی وار
.
من ایمدی که ئولورم بیر ایچیم گَلون سو ویرون
سو ویرماقین سوسوزا حق یانندا اُجرتی وار
.
بابام دیوب سو ویرون جان ویرنده مُحتَضِره
شرارۀ عطشین میّته صعوبتی وار
.
بیری کنیزلریندن سو دولدوروب بیر جام
که ظاهر ایتسون امام زمانه خدمتی وار
.
کنیزین آلدی اَلیندن او جامی اُمُّ الفضل
کیمون جهاندا بیله بیر وفاسیز عورتی وار؟
.
چالوب یره دیدی سو ویرمیون سوسوز ئولسون
حسینه بو سوسوز ئولماقلیقون اشارتی وار
.
گَلوب امام علیّ النّقی گوروب آتاسین
گوگُلده سوز عطش، گوزده اشک حسرتی وار
.
دیدی بابا گوزون آچ سو گَتورموشم سنه من
سو ایستمه، گوروسن دشمنین شمادتی وار
.
آلوب ایچوب سویی، سیراب اولدی، جان ویردی
حسینه ایمدی ده امّا عطش اذیّتی وار
.
ئولنده چوخ سو دیدی کربلا غریبی حسین
سوسوز کَسیلدی باشی، تشنه کام شهرتی وار
.
جواد رحلت ایدوب، معتصم اولوب مسبوق
دیدی منیم بو گون اقبالیمون سعادتی وار
.
جنازه سین چخادون بامه، قویمیون اولا دفن
گوره مُحبّلری جسمینون حقارتی وار
.
دَیَر گون ایستیسی بد بو ایدر جنازه سینی
قاچار خلایق اگر گورسه لر عفونتی وار
.
چخاتدیلار او مبارک جنازه نی بامه
امامه معتصمین گور نجه اهانتی وار
.
قویوبلا گون قاباقیندا جنازه سین اوچ گون
بو غمده شاه شهیدانه تابعیّتی وار
.
دگنده گون بدنیندن گَلوردی عطر عبیر
اونون یانیندا عبیرین نه قدر و قیمتی وار
.
دَیوب نسیم صبا عطری شهری دولدوردی
هامی دیدی بو اِیوون مشکیدن مزیّتی وار
.
بو ماجرادن اولوب معتصم ز بس رسوا
گَتوردی ظاهره گیزلینده هر خباثتی وار
.
اوتانمادی او زنا زاده، ویردی بیر فرمان
دلیم بیان ایده مضمون حکمی لکنتی وار
.
ووروب سالوبلا یره بامیدن جنازه سینی
عزیز فاطمه نین گور نه قَدر ذلّتی وار
.
سالور قضیّۀ بغداد کوفه نی یاده
بونون مصیبتینون مسلمه شباهتی وار
.
#گریز به #مسلمیه (ع)
ـــ
#او_گون_که_کوفه_ده_تک_قالدی_مسلم_بن_عقیل
شهادت حضرت مسلم ابن عقیل (ع))
ـــ
او گون که کوفه ده تک قالدی مسلم بن عقیل
هجوم ایدوب نه قَدَر کوفه نین جماعتی وار
.
گوروبله شیر خدا یادگاری غیظه گَلوب
اَلینده ساغر تیغینده مرگ شربتی وار
.
اجل پیاله سی نوش ایلوری مبارز اولان
عموسی حیدر کرّار تک شجاعتی وار
.
خیال ایدوبله او شیری کمندیله دوتالار
کمندیسیز دوتا بُلمولّه چوخ رشادتی وار
.
قازوبلا حیله و مکریله بیر بیوک گودال
ترحّم ایتمه دیلر دلده درد غربتی وار
.
او شیر صولتی مکریله سالدیلار او یره
عیاندی حیله ده کوفی لرین مهارتی وار
.
قاچان قِییتدی هجوم ایتدی، هر گَلن ووردی
بیری بیرینه ولی وورماق اوسته سبقتی وار
.
قلج ووران، داش آتان، خنجره گمانی گَلَن
ووراردی وورماقا گویا ثواب نیّتی وار
.
او قدر ووردولا دلدن دوشوب، باتوب نفسی
گوروبله کوفه لیلر انتقام فرصتی وار
.
قلجین آلدیلار اَلدن، قولونی باغلادیلار
ایدوب هامی او که دلخواه هتک حرمتی وار
.
آپاردیلار نجه ابن زیاد مجلسینه
دیمم، بُلر او که اخباره خبریّتی وار
.
یِتیشدی بیر یره دوردی، دایاندی دیواره
دیدی منه گوره سن بیر کسین حمایتی وار؟
.
تَرَحماً من مظلومه بیر ایچیم سو ویره
یارالیه عطشین فوق العاده زحمتی وار
.
سو ویرمیوبله، ووروبلار علاوه دل یاراسی
گور اهل کوفه نین انصافی وار، مروّتی وار؟
.
یانیقلی سوزلری تاثیر ایدوبدی بیر نفره
دیدی پیمبریله مسلمین قرابتی وار
.
سو ایچسه ده ئوله جاق بو غریب، ایچمَسه ده
سو ویردی، مسلم آلوب گوردی میل و رغبتی وار
.
جگر حرارتینی ایسته دی ایده خاموش
آلار حرارت قلبی، سویون برودتی وار
.
سو کاسه سین یتوروب تا او قانلی لبلرینه
ایچَمندی، گوروب افعالین عکس صورتی وار
.
توکولدی دیشلری، قانیله دولدی سو جامی
دیمه سرین سودان عالمده بیرده قسمتی وار
.
حضور ابن زیاده نجه گَلوب دیمَرَم
مگر بیان ایده بیر کس او حالی جرأتی وار
.
او مجلسین گِچورم ماجرای صحبتینی
آچوخ مصیبتی ذکر ایتماقین مذمّتی وار
.
صاقا صولا دولانوب باخدی ابن سعده دیدی
بو گون سنه بو غریبون نچه وصیّتی وار
.
منیم جنازه می دفن ایله، قویما یرده قالا
جنازه قالسا سنه خلق ایچینده خفّتی وار
.
ایکیمجیسی بودور اصنافِ شهره بُورجوم وار
او قرضه بو زِرِه و تیغیمون کفایتی وار
.
اوچومجیسی بودی من نامه یازمیشام آقاما
بو شهره گَلماقا اول نامه نین کنایتی وار
.
اماندی یاز اونا بو شهره یا حسین گَلمه
بو شهریده سنه اعدانون اکثریّتی وار
.
سوزین قوتاردی نماینده ی امام مبین
سفیره باخ، نجه سلطانه قصد قربتی وار
.
ویریلدی مسلمه دارُالعماره بامی مقام
دیمه کی کوفه نین اوندان اوجا عمارتی وار
.
او بامیدن دولانوب باخدی بیر حجازه طرف
صبا یِلیندن او باخماقدا بیر سفارتی وار
.
دیدی اماندی حسین گَلمه کوفیه بولارین
اورکده کینه سی وار، دللرینده نصرتی وار
.
سوزین دیوب او یانان سینه دن چکوب بیر آه
اجل پیاله سینین گوردی خوش سِقایتی وار
.
بدن یارالی، اوجا بام، بی حیا جلّاد
یخلدی بُلمورم الله بُلر نه حالتی وار
.
باشی کَسیلدی، بدن بامیدن یره دوشدی
سبب او زحمتی دور چوخ جلال و رفعتی وار
.
عدو اَیاقینه ایپ سالدی، کوچه ده سورودی (2)
دیموبله بَسدی، بونون بیر بیله جراحتی وار
.
وصیّت ایتمیشیدی ابن سعد دفن ایلسون
وصیّتین نجه گور بیر نقیض آیتی وار
.
یارالی پیکرینه اولدی بیر بیوک توهین
نه قدر مُنتَقمین صبری وار عطوفتی وار
.
او شهری ایتدی حق لوط شهری تک بر باد
بو علّته که علینون او یرده تربتی وار
.
ووروبلا مسلمی قصّابیلر قَناره سینه
او شهرین اهلینون افعال بَربَریّتی وار
.
قَناره لردن آسولّار گهی جفائیله
وجود مسلمی بُلموبله چوخ شهامتی وار
.
آسولّا گاه حسینون باشین باسولّا داشه
دیولّه بو باشا ظلم اولسا حق رضایتی وار
.
آچوب آغاشدان او باشی ایدوبله زیبِ جدا
دوروب جدا بویی گون زینبون قیامتی وار
.
« حسینی » کوفه نی باغ بهشته ایتمز عوض
چون اوردا سوگُلوسی مسلمین زیارتی وار
ــــــــــ
(1) ارشاد مفید ص 299
(2) جلد 10 بحار ص 205
ــــــــــــ
.
#جوادیه_شهادت
#مسلمیه
#سعدی_زمان
#دوشنده_یادیمه_شخصیت_امام_جواد
#چهارده_معصوم_حسینی ص 354
#ترکی
#زبدةالاشعار

متن پیشنهادی:  باشه قرآنی توتوب ایلروخ افغان العفو #شب_قدر #عباسعلی_دهقان

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی