دوشوبدی قلبیمه عشق و محبت حمزه #حضرت_حمزه_غفاری_زنجانی

حالات حضرت حمزه سلام الله علیه
..
..
..
..
غفاری زنجانی
..
..
..
..
دوشوبدی قلبیمه عشق و محبت حمزه
چوخ ایسترم اولا هر یرده صحبت حمزه
..
فدا اولوم او شهیدین مقام رفعتنه
سمایه اوج ایلیوب شأن و شوکت حمزه
..
لقب ویروبله او سرداره سید الشهدا
اولوب بو نحویله محرز فضیلت حمزه
..
او گوندنیکه گتوردی پیمبره ایمان
چوخالدی هر گونی گوندن شرافت حمزه
..
شکاره گیتموشیدی بیر گون اول قوی پنجه
کمنده شیری سالاردی صلابت حمزه
..
شکاریدن قیدوب غملی منظره گوردی
او غملی منظره دن آرتدی محنت حمزه
..
گوروبدی دشمن الینده پیمبری رنجور
گلوبدی بحر کیمی موجه غیرت حمزه
..
ویروب بو نوعله گویا او کسلره اخطار
هامیا روشن اولوب اوج همت حمزه
..
بویوردی اینجده کیم یادگار قارداشیمی
اونی بلایه سالار تیغ و ضربت حمزه
..
دونردی باشینه پروانه تک رسول حقین
او حضرته یتشوب چوخ محبت حمزه
..
ایدوبدی راضی ئوزوندن خدای لم یزلی
خدا پسندیدی خوش خلق و سیرت حمزه
..
رسول ممتحنین جنگلرده شیریدی
زبان زدیدی همیشه شجاعت حمزه
..
یتشدی فیض عظیمه احدده اول سردار
چاتوب او غزوه ده وقت شهادت حمزه
..
وجود پاکنی مثله ایدوبدی اهل عناد
اولوب کمر شکن الحق مصیبت حمزه
..
صفیّه باجیسی عزم ایتدی قارداشین گورسون
چو سرو دوشموشیدی یرده قامت حمزه
..
باجیا مشکل اولار قارداشین اوحالدا گوره
توان آلاردی اورکدن او حالت حمزه
..
او پیکر اوستونه ای عاشقان عبا چکلوب
نهان اولا او غم بی نهایت حمزه
..
قطار فکروزی بو سوزده کربلایه چکون
سیزیله همسفر اولسون رضایت حمزه
..
دویونجا زینبه بیر آغلیاخ بو مجلسده
اولا بو محفل غمده شراکت حمزه
..
نه حالدا قارداشینی تاپدی زینب نالان
قان آغلیار اونا جسم و جراحت حمزه
..
غرض احد شهداسینه بزم غم قورولوب
رسول اکرمی چوخ پوزدی غربت حمزه
..
عزالیلر هاموسی ئوز شهیدنه آغلور
گوروبدی کم اولونور ذکر صحبت حمزه
..
یتشدی امر او گون بانوان اسلامه
قورالا مجلس ماتم به حرمت حمزه
..
خانملار اوخشادولار اول جنابه آغلادولار
عیان اولوب هامیا قدر و قیمت حمزه
..
بو یرده خاطریمه غملی ماجرا دوشدی
بو ماجرایه ئوزی آ غلار حضرت حمزه
..
عزیز فاطمیه یاس دوتولدی چوللرده
حسینه آغلیار اول روح راحت حمزه
..
جناب حمزه نون عطشان کسلمدی باشی
بویانمادی کوله مطبخده صورت حمزه
..
آناسی گلمدی مطبخ سراده افغانه
تنور اولمادی جای اقامت حمزه
..
دالیجا دوشمدی چولدن چوله عیالاتی
اسیر اولمادی اعدایه عترت حمزه
..
دوداقلارینا اونون دگمیوبدی چوب ستم
حسینه یاندی دل پر عطوفت حمزه
..
گناهون اولماسا «غفاری» قابل اغماض
جزا گونی سنه چاتماز شفاعت حمزه
..
..