ضامن شدن حضرت امام رضا
.
✍️ #زبدةالاشعار ✍️
.
🆔: @nohe_torki
.
.
مرحوم مشهدی ستار ذاکر اردبیلی
.
دوشوبدی یادیمه بیر ماجرای غم افزا
امام ثامن و ضامن غریب امام رضا
.
كنار شهریده اول سبط باعث ایجاد
نه گوردی آهو قوجاقینده بیر نفر صیاد
.
گلوب کچنده او آهو امامه قیلدی نظر
توكولدی روینه بی اختیار اشگ بصر
.
دولاندی گردنی کچ، نالۀ نهان ایلدی
امام محضرینه دردینی عیان ایلدی
.
باخوب او سرّدن آگاه اولان امام زمان
خطاب ایلدی ای نوجوان خوش الحان
.
بو آهو که سنه صید اولوب او ماراده
ایکی بالاسى قالوبدور گرسنه صحراده
.
بوراخ بو آهونی قلبی بیر آزجا دینجلسون
گیدوب بالالارینا صود ویروب گنه گلسون
.
دیدی عرب بو نجه ادعادی ایلورسن
نه ذلتیله بو آهونی سالمشام اله من
.
محالیدور قویام الدن نچون تلاشیم دور
على الخصوص منیم مایۀ معاشیم دور
.
بویوردی گل سنی بی چاره مطمئن قیلوم
بوراخ بو آهونی من گلمگینه ضامن ایدوم
.
تعجبیله او صیّاد باخدی مولایه
دیدی عرب باشووى سالما بیله غوغایه
.
نچونکه آهو بیر حیواندی وحش لایعقل
منیم اونا اورگیم ذرّه مطمئن دگل
.
گر ایستوسن اونا سن ضامن ای عرب اولاسان
گرک ایاقلاروی اوندا باغلیام قالاسان
.
بویوردی مانعی یوخ بو سوزه رضا اولّام
ایاقی باغلا بو آهو گلینجه من قالّام
.
طنابی آچدی بئلیندن قیلوب الینده کمند
ایکی مبارک ایاقین او شاهون ایلدی بند
.
او آهونون ایاقیندان طنابی ایلدی باز
باخوب امامه او حیوان گوتوردی تا انداز
.
گزوب دولاندى یتشدی بالالارین گوردی
اولوب بالالاری مسرور، آنالارین گوردی
.
دیدی گلون صود امون قالمیوم ملامتده
امام ثامنی چوخ قویمیاخ ضمانتده
.
منی کمندیله صیاد دامه سالمشدی
گوزوم سیزه بالالار انتظار قالمشدی
.
او آهو بچه لر اولدی بو سوزده بی ارام
دیدیله صود یمک اولدی داخی بیز ایچون حرام
.
بو استراحت و بو صود دگل بیزه لازم
امام محضرینه قیل شتاب اولاق عازم
.
دایانمشیدی او صیّاد مثل غمدیده
نه گوردی آهو گلور چون خدنگ پیچیده
.
ایکی بالاسی یانیندا گلوب ذلیلانه
دولاندیلار او شهون باشینه چو پروانه
.
گوتوردی واهمه صیّادی بو نه حکمتدی
نه سرّیدور بو الهی بو هانسی حجّت دی
.
ادبله عرض ایدوب ای سیّدالوری کیمسن
بیان قیل سنه جانیم اولا فدا کیمسن
.
خطاب قیلدی که ای نوجوان اهل وفا
منم امام زمانه غریب امام رضا
.
ایشتدی بو سوزی چون رنگ، ریشه سی قاچدی
باشا ویرا ویرا گلدی ایاقلارین آچدی
.
دیدی باغشلا آقا کاش کور اولیدی گوزوم
تانیمادیم سنی شرمنده ایلدیم اوز اوزوم
.
غریق بحر بلا ای شه خراسانی
قتیل زهر جفا ای شه خراسانی
.
وار آرزوسی گله قبر پاکوه «ذاکر»
ایده فغان جگر چاک چاکوه «ذاکر»
.
.
#رضویه_ذاکر_اردبیلی
#رضویه_مدح
#دوشوبدی_یادیمه_بیر_ماجرای_غم_افزا
#ترکی
.
✍️ #زبدةالاشعار ✍️
.
🆔: @nohe_torki
نظر دهید