دولدوروب کرب و بلا دشتنی غوغا بو گیجه #شب_عاشورا_شهاب_تبریزی

شب عاشورا
.
#زبدةالاشعار
.
: @nohe_torki
.
#سبک_یارالی_جان_یارالی … 4 سبک
.
مرحوم شهاب تبریزی
.
دولدوروب کرب و بلا دشتنی غوغا بو گیجه
باش آچوب صبحه کیمی آغلوری زهرا بو گیجه
.
.
بو گیجه صبحه کیمی شیر خدا ناله چکر
بو گیجه حضرت زهرا یوزه گوز یاشی توکر
بو گیجه باشه یتوب اولمویا ای کاش سحر
بلکه آسوده یاتا زینب کبرا بو گیجه
.
.
بو گیجه اهل حرم جاری ایدر گوز یاشینی
بو گیجه هر باجی آغوشه چکوب قارداشینی
بو گیجه لیلی باسوب سینیه اکبر باشینی
غصّه دن وار یری مجنون اولا لیلا بو گیجه
.
.
گه باخور اوغلونون آغلار گوزیله گُل یوزینه
گه چکور سرمه او هاجر شیم اکبر گوزینه
ورد ایدوب بو سوزی گویا او خانم اوز اوزینه
من مظلومیه ایکاش اولا رؤیا بو گیجه
.
.
دولدوروب عترت طاها اورگین خوف و هراس
سوسوزوندان سارالوبدور بالالار چون گُل یاس
خیمه سین قاسم آناسی ایلیوب مجلس یاس
تازه داماده ایدوب تعزیه بر پا بو گیجه
.
.
کربلانی بورویوب بو گیجه آوازة کوس
گردش چرخدن ایتسم یری وار آه و فِسوس
اولا ویران بیله دورانی باتوب یاسه عروس
باترور کوکب بختین شب یلدا بو گیجه
.
.
آناسی اصغرینی بو گیجه آغوشه آلوب
باخوری رنگی گورور سوز عطشدن سارالوب
نه سودی وار نه سویی نیلسون آواره قالوب
سر به سر تشنه دیلر عترت طاها بو گیجه
.
.
سو دیوب خیمه لری اصغر آناسی دولانور
سو تاپانمور شرر نار مصیبتله یانور
باخور او غنچه گُلون حالینه جاندان اوسانور
گلوری شیونه چون بلبل شیدا بو گیجه
.
.
یاتمیوب صبحه کیمی بو گیجه نی میر حجاز
خیمه سینده ایلیور صبحه کیمی راز و نیاز
گاه قرآن اوخویور گاه اولی مشغول نماز
گوزی یاشلو ایلیور گاه مصلّا بو گیجه
.
.
بو گیجه حضرت عباسون اولوب دردی مزید
بونی فکرایلوریکه صبح آچلوب اولسا شهید
زینبون قوللارینی باغلیاجاق قوم عنید
بو مصیبتله گلوب درده او مولا بو گیجه
.
.
بیرده بو باره دن آرتوبدی او سرداره اَلَم
صبح آچلسا اولاجاق ظلمیله قوللاری قلم
اوخلانوب مشکی یانار جور و جفائیله علم
فکر پیچیده دی چاره ندور آیا بوگیجه
.
.
بسدی اَل ساخلاسوزه شرح داخی ویرمه «شهاب»
حافظی آغلیانون خالق اولور روز حساب
اجر مشتاقی سن آغلا بو گیجه ایلمه خواب
ایسته فیض آل اولا تا توشۀ عقبا بو گیجه
.
#شب_عاشورا_شهاب_تبریزی
#دولدوروب_کرب_و_بلا_دشتنی_غوغا_بو_گیجه
#ترکی
.
#زبدةالاشعار
.
: @nohe_torki