کوفه دن شامه روان اولدی قطار اسرا #راه_شام_انور_اردبیلی

راه شام
.
✍️ زبدة الاشعار ✍️
.
?: @nohe_torki
.
مرحوم انور اردبیلی
.
کوفه دن شامه روان اولدی قطار اسرا
نیزه لر اوسته آی اولدوز کیمی رأس شهدا
قولی باغلی چکلوب سلسلۀ آل عبا
زینبون مین غمی مین غصه سی واردور دلده
اوتوروب غملی رقیّیله سنق محملده
.
.
مرتضی قیزلارینی زجر آپارور شامه قوناق
یول چتین آل پیمبر یورولوب مقصد اوزاق
نجه عریان دوه اوسته اوتورار خردا اوشاق
داش اورکلر ایله مانعدی اورک داغلیانا
تازیانیله نوازش اولونور آغلیانا
.
.
سوردورور شمر لعین ناقه لری سرعتیله
بالالار دشت و بیابانه باخور وحشتیله
یول گیدولّر گیجه نی گوندوزی بو حالتیله
دام صیادیده بنزولّه پر افتاده قوشا
بیر بیریله اولارون فرصتی یوخدور دانشا
.
.
بوریوب یوزلرینی گوزلرینی گرد و غبار
یل اسن وقتیده گیسولرینه شانه وورار
نه غذا وقتی معیّن نه سرین سولَری وار
کاروان یولدا که هر منزل و مأوایه چاتار
یمک ایچمک یادا دوشمز بالالار فوری یاتار
.
.
بیر گیجه ایتدیله بیر قورخولی صحراده مکان
خیمه قوردی اوزینه زجر دنی شمر و سنان
سالدیلار سفره غذا میل ایدوب اشرار زمان
رختخواب آچدی او بی شرم صفتلر ئوزونه
کیم قویوب بالشه باشین یوخی گلدی گوزونه
.
.
بیر طرفده یاتیشوب لشگر خونخوار و ظلام
بیر طرفده اسرا عدّه سی اولدی آرام
قولّارین قویدی باشی آلتنا اولاد امام
پردۀ ظلمت شب یوزلرینه چکدی نقاب
اصغرون دردی اورکده یوخیا گئتدی رباب
.
.
بیر اوجا نیزه نون اوسته سر سلطان هدا
آیدان آرتوق او چولی روشن ایدوب نور خدا
او باشا واردی نگهبان نچه مأمور جفا
نیزه قالمیش آرادا نقطۀ پرگار کیمی
گل زهرانی سالوبلار وسطه خار کیمی
.
.
گوروم اولسون فلک کج روشون طاقتی طاق
او نگهبان نفراتون بیری سویلور بو سیاق
یاتدی یولداشلاریمون هامّوسی من قالدوم اویاق
ناظریدی اسرائیله کسوک باشه گوزوم
گیجه نون یاریسی بو منظره نی گوردوم اوزوم
.
.
حرکت وار اسرا ایچره یره سایه سالور
بیر قزی درک ایلدیم گاهی یاتور گاه اوجالور
دیدیم حتماً یاراسی وار یاتا بیلمور چوبالور
یاراسی اولماسا یول زحمتینی باشدان آتار
گیجه نون نصفی کچوبدور یوخوسی گلسه یاتار
.
.
من بو فکریله واریدیم اوغم و درده دچار
اولدی نیمخیز اسرادن ئوزینی چکدی کنار
قیلدی اطرافینه دقت او در کنز وقار
وحشتیله یولا دوشدی ایلدی کشف هدف
یریدی بارماقی اوستونده کسوک باشه طرف
.
.
پردۀ ظلمت هجرانی شکاف ایتدی او قز
پیچ و خم یولارینی عشقیله صاف ایتدی او قز
نیزه نی کعبه کیمی گلدی طواف ایتدی او قز
سینه سی اوسته صورا اللرینه ویردی مقام
روبروده دایانوب ایتدی کسوک باشه سلام
.
.
گلدی گفتاره دیدی اول منه دمساز بابا
یاره لی باشوه ایله منی همراز بابا
نگران اولما سنه ایلمرم ناز بابا
گیجه نون نصفی هامی خوابیده دور من اویاقام
گلمیشم درگهوه قلبی سنق بیر قوناقام
.
.
بو گیجه دوشدی او شبدن بابا عشقون باشما
دیمدیم سوزلریمی یاوریمه یولداشما
آچ او قانلی گوزی باخ گوزدن آخان گوز یاشما
آتا هر قدری قیزا لطف ایده اسراف دگل
بوینی چگنینده منی ساخلاما انصاف دگل
.
.
دیمورم صحبت ایدن وقته منه جان دیه سن
سیله سن گوز یاشیمی خاطریمی ایستیه سن
کرموندن چوخ اوزاقدور منی دیندیرمیه سن
قز یتیم اولسا مگر گویلونی آلمازلا بابا
دردمندی قاپودان بوش یولا سالمازلا بابا
.
.
گرچه غارت زده ام قلبیده چوخدور مُحنیم
یوزوون تُپراقینی سیلمگه وار پیرهنیم
سن اوجا نی ده سن آخر بویوم آلچاقدی منیم
ان جدادن بو یتیمه ایله همدم ئوزوی
دانیشاق بوسه لشاق منده سیلوم یوز گوزوی
.
.
نه ربابه گوره نه عترت طاهایه گوره
نه بیبیم زینبه خاطر نده لیلایه گوره
یوزوی قوی یوزومه حضرت زهرایه گوره
سنی ایتامه پرستار یاراتمیش یارادان
سیلی نون زحمتینی بلکه آپاردون آرادان
.
.
او قزون سوزلرینه دوزمدی سلطان هدا
نیزه دن اندی بالیلا گوروشه گلدی آتا
آری قرآن دیوری زنده دی ئولمز شهدا
ایسته دی یاخشی پذیرالیقی اولسون قوناقا
قانه باتمیش دوداقین قویدی سارالمیش دوداقا
.
.
دیدی ای مِحنت ایّامه گرفتار قزیم
گیجه نون وقتی قالوبسان نیه بیدار قزیم
سن منه سویگولوسن من سنه دلدار قزیم
نگران اولما بالام جانی خبیرم سوزوه
هر زمان دیدیمه گلسون قویارام یوز یوزوه
.
.
وارعلاقم سنیله صحبته آهسته دانش
دشمنیم مانع اولار الفته آهسته دانش
شمر دون گلسه سالار زحمته آهسته دانش
دگمه میش قمچی گوگرمیش قولوا پیکروه
من گیدوم ئوز یریمه سنده قییت ئوز یروه
.
.
گوردی گیتمور او بالا زینبینه ائتدی خطاب
بیخبرسن باجی گل داده بالام اولدی کباب
تز آیور بو قزی مندن ایله بیر امرثواب
گوزینون یاشینی سیل ناز ایلسه طاقت ایله
قوری تپراقلارون اوسته یئرینی راحت ایله
.
.
#راه_شام
#کوفه_دن_شامه_روان_اولدی_قطار_اسرا
#انور_اردبیلی
#پیام_عزا_انور
#ترکی
.
✍️ #زبدةالاشعار ✍️
.
?: @nohe_torki