اربعین
.
.
مصیبی تبریزی
.
.
چکدی ال صیاد ملعون صیدیدن
کاروان غم باش آچدی قیدیدن
.
خلقه گورستدی ئوزون نادم یزید
ائتدی آلُ اللٰهین اکرامین مزید
.
ایسته دی اولسون مبّرا کینه دن
بیلسون عالم ، پاک دور آئینه دن
.
عزّتین آرتوب امام ساجدین
سالدی حرمتله یولا غم قاصدین
.
آل عصمت آیریلوبدی شامیدن
حاجیان غم چیخوب احرامیدن
.
قالدی دللرده حسینین نسگیلی
یوللانوبدی یثربه غم محملی
.
بیر دو راهیده ائدوب قاصد ندا:
ای امیر کاروان ؛ سجّاد آقا!
.
بوردا بیر یول وار حریم ماتمه
خط سیری ختم اولور نهر علقمه
.
کربلا صحراسینه بوردان گئدر
عشقیوین مأواسینه بوردان گئدر
.
قیل معیّن کربلایه سیر ائداخ
یا کی یثرب شهرینه باهم گئداخ
.
ائتدی فرمایش امیر قافله:
ای بشیر! ای حَذلَم اوغلی صبرائله
.
ائتمیشم نی تک نوای نینوا
واردی باشیمده هوای نینوا
.
سیل ائدورتوپراقلارا قان یاش،گوزیم
قان دولان توپراقیلن وارچوخ سوزیم
.
سوق وئر دشت غمه محمللری
باغبانلار بیرده گورسون گوللری
.
آغلاسونلار بی هراس و هَروَله
یوخدی چون شمر وسَنان وحرمله
.
معجرین آلسون اله بیکس رباب
اوغلونا قان آغلاسون اول دلکباب
.
بیرده دونسون غملی صحرا محشره
عمه لر لای لای دئسونلر اصغره
.
آغلاسون بیکس سَریّه قاسیمه
زینبیم دوتسون عزا عبّاسیمه
.
کاروان یول چکدی چاتسون مقصده
غم دولان چوللرده پوزقون مرقده
.
آز قالوردی کربلا اولسون قرین
گوردیلر آغلار ، ربابین گوزلرین
.
آه و افغان ایلور اول ماه حرم
سینه سین هردم اوغور بانوی غم
.
چکدی آغوشه او دم زینب اونی
گوردی بس مغموم و جان برلب اونی
.
آه و افغان علتین آلدی خبر
سوز آهیلن دئدی اول خون جگر:
.
سینۀ زاریمده باخ افروزشه
رگده کی قانیم گلوبدور جوششه
.
غم توزی وئرمیش جلا آئینه مه
صود گینه گزدی بوقانلی سینه مه
.
اصغریم یاده دوشوب قینور قانیم
کربلایه چاتمیشوخ گویا خانم
.
تازه دن نار غم اولدی شعله ور
ووردیلار باشه بلالی عمه لر
.
آیریلوبدی برگ فرقت ساقه دن
سید سجاد یِندی ناقه دن
.
سینه سی اولموش اونون سینای عشق
گوئیا طوره گئدور موسای عشق
.
پابرهنه اولدی چوللرده روان
همهمه دوشدی پوزولدی کاروان
.
گلشن عصمتده کی پروانه لر
بحر حیرتدن ایچن پیمانه لر
.
رهسپار کعبۀ یار اولدیلار
قاره نی باشدان سویوب باش یولدیلار
.
قبرین اوسته گوردیلروارشوروشین
باغریقان جابردی زوّار حسین
.
سؤیلیوبلر جابره با اعتذار
دور کناره بیز یاناق پروانه وار
.
دور کناره وارث موکب گلور
شاه عشقین قبرینه زینب گلور
.
برج غمدن آخمیش اولدوزلارگلور
بزم ماتم قورماقا قیزلار گلور
.
جابرین اولدی عطیّه حائلی
بیر کناره گئتدی عشقین سائلی
.
واحسینا دوشدی سطح اغبره
سینه لر توش اولدی غملی مقبره
.
عمه لر قیزلار غمین و خون جگر
هرکس اولموش بیرطرفده نوحه گر
.
گوردی تا زینب حسینین قبرینی
ختم ائدوبدی جبره دونموش صبرینی
.
معجرین آچدی حیانین معدنی
محشره دوندردی قانلی کعبه نی
.
تازه لندیردی وفا میثاقینی
باشینه سپدی بلا توپراقینی
.
گوزلری ابر بهاری تک دولور
اشکینی دوتسان دولی بیرمشک اولور
.
سویله دی ای چلچراغ مشرقین
دور ایاقه وار قوناقون یاحسین
.
چوخ اوزاقدان خسته زوارون گلوب
قبرین اوسته غملی قیزلارون گلوب
.
قمچی دن جان قورتاران زینب گلوب
محمل اوسته باش یاران زینب گلوب
.
قتلگه ده قانینی قانه قاتان
خنجر شمره او یرده ال آتان
.
قلب اعدانی سیخان زینب گلوب
کاخ بیدادی ییخان زینب گلوب
.
قاره معجر باشدا قارداش گلمیشم
عطریوی تا آلمیشام دینجلمیشم
.
دور ایاقه بیر پوزولمیش حاله باخ
قمچی لر تاراج ائدن اجلاله باخ
.
ایندی هاردان من دیوم،باشسیز بدن؟
ظلم خولی دن دیوم یا کوفه دن؟
.
عصر غارتدن دیوم ، اخیامیدن؟
یا دیوم بزم یزید و شامیدن؟
.
سویلیوم من آتش حِرمانیدن؟
نیزه باشیندن و یا زندانیدن؟
.
ئوز کنیزیم نیلیوبدی، طرح ائدیم؟
یا خرابه ماجراسین شرح ائدیم؟
.
قرخ گئجه قالدی باجون حیران حسین
قورخولی چوللرده سرگردان حسین
.
من گئدنده پیکرون عریانیدی
کربلا قربانگه جانانیدی
.
قاره یللر چوللره اسمیشدیلر
من گئدنده اللرون کسمیشدیلر
.
من گئدنده قامتین شان شانیدی
یرده کی ظلمه فلک حیرانیدی
.
من گئدنده سینه لر یانمیشدیلار
خیمه لر غارتده اودلانمیشدیلار
.
کوینگیندن اخذ کام ائتدیم حسین
من گئدنده شمریلن گئتدیم حسین
.
گور روا دور بیشه دن ضیغم گئده ؟
شامه زینب شمریلن باهم گئده
.
گور روا دور کوکب ایمان آخا
داش دگنده باشیوه زینب باخا
.
وای اولا شام اهلینه،کولباشلارا
داش وروبلار نوک نی ده باشلارا
.
تا ائشیتدیم نیزه دن غرّا سسین
اَمْ حَسِبْتَ انَّ اَصحَابْ آیه سین
.
سسلدیم ای مرتضایه نور عین
سن دیئن اذکاره عشق اولسون حسین
.
چرخ گردون عاقبت گوردی ایشین
شامیده اولدوق حسین ویران نشین
.
عترت پیغمبری خوار ائتدیلر
بیر خرابه یئرده تیمار ائتدیلر
.
ایندی اما یتمیشم منظوره من
تاپشوران اطفالی گتدیم طوره من
.
شامیدن تنها رقیه ن گلمه دی
چوخ یورولموشدی حسین دینجلمه دی
.
گویده اولدوزلارکیمین باتدی قیزین
بیر خرابه بزمیده یاتدی قیزین
.
کِلک حسرتله غمین یازدیم ئوزوم
ئوز الیمله قبرینی قازدیم ئوزوم
.
خوردا قبریندن قرا پرچم اسر
عاقبت سررشته سین ظلمون کسر
.
تا قیامت شامیده ماتم قورار
خرمن آل یزیده اود وورار
.
ای «مُصَیب» قلبیوی مِنقاد ائله
شاه عشقی عشقیلن فریاد ائله
.
یاز بو درگاهین قوی بنیادی وار
تا بو دنیا وار حسینون آدی وار
.
#اربعین
#چکدی_ال_صیاد_ملعون_صیدیدن
#مصیبی_تبریزی
#ترکی
#زبدةالاشعار
نظر دهید