زبانحال امام مظلوم (ع) در صبح عاشورا
.
.
.
مرحوم حسینی سعدی زمان
.
.
راضیم عشقونده یا رب ، خانمانیم اولماسین
اصغریم اوخلانسون ، اکبر تک جوانیم اولماسین
.
.
قول وئرمیشدیم ازل گون سن کیمی جانانیمه
بو بلالی چولده لب تشنه باتام ئوز قانیمه
قویمارام بیر ذرّه نقصان یوز وئره ایمانیمه
عهدیمی باشه یتورّم باش و جانیم اولماسین
.
.
نشر اولان گون عالم ارواحه منشور بلا
بو بلالر جلوه لندی وئرمدی بیر کس بلا
هر بلایه من بلا وئردیم ، بو من بو کربلا
هر بلا گلسه خوشام ، دار الامانیم اولماسین
.
.
تک به تک قارداشلاریم اولسونلا زیب خون و خاک
مجتبانین یادگاری قاسم اولسون چاک چاک
اوغلوم عبداللهی ائتسون زهرلی پیکان هلاک
شدّت ائتدیقجا بلا ، داد و فغانیم اولماسین
.
.
قوللاری عباسیمین اولسون سو اوستونده قلم
سرو تک قدّی یخلسین سرنگون اولسون علم
سو دیوب یانسون سوسوزدان خیمه ده اهل حرم
گلشن عالمده سرو بوستانیم اولماسین
.
.
بو همان گوندور که سن ای خالق جن و بشر
انبیایه وئرموسن تک تک قضایاسین خبر
بو حسینوندن سِوا بو امتحانه کیم دوزَر
سویلمز عشّاق صادق ، امتحانیم اولماسین
.
.
سجده گاهیمدن وورولسا زخم پیکان راضییم
قلبیمه اوچ شعبه لی اوخ وورسا دونان راضییم
حنجریم نحر اولسون آخسون سو کیمی قان راضییم
آغزیما وورسونلار اوخ ، نطق و بیانیم اولماسین
.
.
هر نه اوخ گلسه خوشام ، بو جسمی آماج ایلرم
جدّیمین معراجینه معراجیمی تاج ایلرم
نیزه باشینده کسیک باشیله معراج ایلرم
نیزه دن اوزگه براق آسمانیم اولماسین
.
.
عترتیم اولسون اسیر ، اشراره خوشدور بو بلا
سوگلی قیزلاریما وورسونلا سیلی اشقیا
وورسون اعدا دسته گل تک جسمیمه سانسیز یارا
راضییم هرگز دیمم یاره وورانیم اولماسین
.
.
جسمیمی سویسون منا قربانی تک قوم عدو
نعشیم اوسته آت دولاندیرسون سپاه کینه جو
جلد سیز قرآن کیمی اوراق اولا عهدیمدی بو
زلف زینبدن سوا بیر سایبانیم اولماسین
.
.
سربلند ایلر باشیمدان گچماق ، آل هاشمی
باشمین قانی خوشام قان ایلسون گوز یاشیمی
عین عزّتدور عدو قویسون کول اوسته باشیمی
نیزه و مطبخدن آیری بیر مکانیم اولماسین
.
.
مجلس ماتم من ئوللم عالم لاهوت اولار
صبریمه قدّوسیان ، کرّوبیان مبهوت اولار
خاک و خون ، غسل و حنوطیم ، نیزه لر تابوت اولار
دلخوشام تشییع ایدن ، قبره قویانیم اولماسین
.
.
بیتیمه بیر بیت وار جنّتده ای مقتول کین
یوخدی تردیدیم بو مطلبده بو بیر سوزدور یقین
ایستوری اوغلون «حسینی» بوردا یوزمین دن بیرین
تا شماتتدن شها زخم زبانیم اولماسین
.
.
هر نه که خلق ایلیوب ذی روح خلّاق جهان
لامکان ، خالقدی ، وار خلق اولمیشا یکسر مکان
نه روادور طیر و وحش و دیو و دد با آشیان
من سیزه مدّاح اولوم بیر آشیانیم اولماسین
.
.
#حسینیه #سعدی_زمان
#حسینیه_شهادت
#راضیم_عشقونده_یا_رب_خانمانیم_اولماسین
#چهارده_معصوم_حسینی
#ترکی
#زبدةالاشعار
نظر دهید