شهادت حضرت موسی ابن جعفر (ع)
.
.
.
مرحوم شهاب تبریزی
.
مسموم اولوب زندانیده
سبط پیمبر جان ویروب
زنجیره باغلی حضرت
موسی بن جعفر جان ویروب
.
.
زهریله چون مسموم اولوب
گل عارضی گل تک سولوب
زندان فغانیله دولوب
اول زار و مضطر جان ویروب
.
.
یالقوز ویروب زنداندا جان
اولمادی زنجیرین آچان
نه باشی اوسته آغلیان
بی یار و یاور جان ویروب
.
.
اولموب یانیندا بیرکسی
اولسون اونون دادرسی
هانسی وطن آواره سی
بو شاهه بنزر جان ویروب
.
.
غربت ده اون یدی ایلی
زندان اولوبدی منزلی
دلده قالوب درد دلی
زار و مکدّر جان ویروب
.
.
مسموم اولوب اول شهریار
آخر ایدوب جان بذل یار
نعشی قالوب زندان دا خوار
خوار و محقّر جان ویروب
.
.
اولمادی اوچ گون بیر گلن
نعشین او شاهین دفن ایدن
غربت آرا بو نوعیلن
هانسی غریبلر جان ویروب
.
.
جدی حسینه ایلیوب
گویا او سرور اقتدا
زندانیده وا غربتا
سویلوب مکرر جان ویروب
.
.
جدی حسین ده شیعیان
ویردی قوری یرلرده جان
اولموب یانیندا باش آچان
یالقوز او سرور جان ویروب
.
.
زینب باشین دا اللری
حیران گزردی چوللری
گوردی که یار و یاوری
میداندا یکسر جان ویروب
.
.
بیر یرده تاپدی قارداشی
گوردی بدنده یوخ باشی
آخدی عذاره گوز یاشی
گورجک او بی سر جان ویروب
.
.
جویا اولوب تازه گلین
چون تاپدی قاسم پیکرین
گوردی ایدوبدی اللرین
قانیله احمر جان ویروب
.
.
اولموشدی لیلا هولیدن
مجنون تک افسرده بدن
ئولموب او بیچاره ندن
گوردی که اکبر جان ویروب
.
.
بولمم نه نوعیلن رباب
ائتدی خدایا صبر و تاب
گوردی اولوب زیب تراب
شهزاده اصغر جان ویروب
.
.
کلثوم و زینب خون جگر
وحشت چولون چوخ گزدیلر
هرادا دوشوب بولمور دولر
قولسوز برادر جان ویروب
.
.
ویردی قضا بیر یول نشان
ایکی باجی اولدی روان
نه گوردولر اول قمریان
بیر سرو پیکر جان ویروب
.
.
چوخ ظلم ایدوب اهل ظُلم
باش یوخ اولوب قوللار قلم
بیر یاندان دوشموش بیر علم
بیر یاندا اللر جان ویروب
.
.
آغلا شهاب هر آنیده
یاز نوحه بو عنوانیده
مسموم اولوب زندانیده
سبط پیمبر جان ویروب
اُول زارو مضطر جان ویروب
.
.
.
.
#کاظمیه_شهاب_تبریزی
#کاظمیه_شهادت
#مسموم_اولوب_زندانیده_سبط_پیمبر_جان_ویروب
#ترکی
.
.
نظر دهید