#میلاد_با_سعادت_حضرت_پیغمبر_اکرم
#گریز راز و نیاز امام حسین (ع) در #قتلگاه و شهادت حضرت رقیه (س)
.
✍️ #زبدةالاشعار ✍️
.
🆔: @nohe_torki
.
علومی تبریزی
.
ربیع الاولین اون یدی سنده وقت سحر
قدم بو عالم امکانه قویدی پیغمبر
.
دوتوبدی عالمی نورمحمدی مطلق
اودم گلوب یره گویدن ندای جاء الحق
.
گلوبدی لرزیه ایوان پادشاه عجم
شکست اولوب نچه یردن بساط اولوب برهم
.
حجازیدن گویه بیر نور آشکار اولدی
اوجالدی عرصۀ دنیایه انتشار اولدی
.
دوشوبدی خوف سراسر یهود و گبر و مجوس
اولوب طوایف باطل حیاتدن مأیوس
.
همان او صبحده شیطانیان زبون اولدی
واریدی لات هبل هاردا سرنگون اولدی
.
چکوب او وقتده ابلیس بی حیا فریاد
یغوبدی باشنا اولادینی او بد بنیاد
.
دیدی جهان متغیردی چرخ بر همدی
گیدون تفحّص ایدون بیر گورون نه عالمدی
.
گیدوب گزوبله گلوبلر تمامیسی مأیوس
ایدوبله دلدن علاوه او کافری مهروس
.
دیوب بو ایش اوز ایشیمدی گرک ایدم اظهار
گورم نه واقعه دور گردش فلکده نه وار
.
دولاندی عالمی اول دشمن زمین و زمان
بیر آنده هامو آفاقی ایلدی جولان
.
یتوب حرمده گوروب اوزگه ماجرا گورونور
مُقرّبان خداوند کبریا گورونور
.
گلور ملائکه لر دسته دسته گویلردن
اولوبدی کعبه یری نور حقّیله روشن
.
قدم قویاندا او بزم شریف جانانه
کسوب قباقنی مانع اولوبلا شیطانه
.
گلوب که داخل اولا بیته کوه حرّادن
گوروب که سس گلوری دورما گیت بو مادن
.
اولوب ورودینه مانع او دمده جبرائیل
دیوب قایت بو مكانه اولانماسان داخل
.
دیدی بو بیر سوزیمه بیر جواب ایله بیان
نه واردی بیله دگرگوندی عالم امکان
.
جواب ویردی محمّد گلوبدی دنیایه
تراب تیره ایدور غبطه عرش اعلایه
.
دیدی دی بیر گوروم ای حکم حقه آماده
منیم ده بهره واریمدی بو پاک والاده
.
جواب ویردی نه، عرض ایلدی ذلیلانه
بس امتینده نجه واردی قسمتیم یانه
.
دیدی بیر عده سینی گاه ایله سن اغفال
اولوب رضا قیدوب گتدی خرم و خوشحال
.
قویان زماندا قدم عالمه رسول امین
دوشوب دی سجدیه فوراً گویه دوتوب بیر الین
.
ایدوبدی حمد خدای وحید و بی همتا
که سنسن حیّ احد من سنه رسول خدا
.
بلی تمام ائمه گلنده دنیایه
قویوبلاسجدیه باش حمد ایدوبله یکتایه
.
حسین ئولند ده سجده قیلوبدی جانانه
نه سجده گتدی هامو کائناتی افغانه
.
#گریز به _شهادت_امام_مظلوم_کربلا
.
نه سجده عالم امكانه ولوله سالدى
آناسی حضرت زهرادن اختیار آلدى
.
نه سجده سجده گهنده واریدی داش یاراسی
توان و طاقتنی آلموشدی باش یاراسی
.
نه سجده قانه بویانمیشدی جسمی سر تا سر
نه بیر نفر بیله حالین نه بیر نفر یاور
.
همان او سجده ده یاده سالاردی جانانی
دیردی درد دلین آغلاداردی دنیانی
.
دیردی بار خدایا اگر چه عطشانم
هزار شکر که من دین یولوندا قربانم
.
سنون یولوندا ال اوزدوم جلال و جاهمدن
منای عشقدی قربان کوی جانانم
.
وفالی قارداشمی بیر به بیر جوانلاریمی
شهید ایدوبلر اوزیمده قتیل دونانم
.
دیدیم بو لشگره بیر شربه سو ویرون سوسوزام
یانور دلیم دوداقیم بیکسم پریشانم
.
سو ویرمدیله علاوه شمادت ایله دیلر
خیال اتمه دیلر بیر نفر مسلمانم
.
سو اوسته اللریم اوستونده اصغر اوخلاندی
اونون غمینده اورکدن ملول و گریانم
.
دایاندیم هر ستمه هر بلایه صبر ایتدیم
نه حکمون اولسا بیلورسن مطیع فرمانم
.
عزا توتانلاریمون سنده گچ گناهندن
که من حسینم و پورِ ولی یزدانم
.
منی ازلده ویروب جدّیم امته قربان
گرک بو چولده اولام تشنه قانمه غلطان
.
بلا نقدر گله سینمی نشان وئرّم
سوسوز یارالی بو کوی وفاده جان وئرّم
.
ایدنده راز نیاز اول غریب کرب و بلا
گلوبدی مصدر حقدن بو سس اونا گویا
.
حسینم ایلمه غم توكمه عارضه خوناب
گل انتظاریدی زهرا آنان اولوب بی تاب
.
سو ایستمه او گروه رذیل و کافردن
گلوب حبیب من ایچ سلسبیل و کوثردن
.
گلور تلاطمه کوثر دینده من سوسوزام
آلور سیزیلتی سسی قدسیانیدن آرام
.
اگر چه قانوی توکدی سنون سپاه ظلم
ولی سنه من اوزوم خونبهایم ایلمه غم
.
دایان قلم بو ملالین که یوخدی پایانی
دوباره وصف ایله میلاد شاه بطهانی
.
#ادامه_میلاد_با_سعادت_حضرت_پیغمبر_اکرم
.
مزیّن اولدی سراسر بو طارم افلاک
گلنده عالم ایجاده سیّد لولاک
.
سود اولمادی آناسندا او شاه والایه
اولوب حلیمۀ سعدیه اول شهه دایه
.
اونون قضیه سنی راویان خوش گفتار
کتاب منتهى الآمالده بو نوعی بازار
.
حلیمه دندی روایت او بانوی خوش نام
دیر بلایه گرفتاریدوخ همان ایام
.
دیار مکّیه گلدوخ بر عدۀ نسوان
که دایه اولماقا اطفال مكّیه او زمان
.
منیله بر شتر ماده بیر خرِ کم راه
علاوه اولموشدی طفل سود امر همراه
.
یوخودی اول شتر ماده ده سود آثاری
که قوت اولا بیزه یولّاردا بیر زمان باری
.
اوزیمده ده او قدر طفل زاره سود یوخدی
بو باره دن بالامون اضطرابی چوخ چوخدی
.
دیار مکّیه یتدوخ تمام فوج زنان
هره سی بیر اوشاقه دایه اولدی شادکنان
.
یتیمدی آتادان چون رسول عالمیان
اونی قبول ایلین اولمادی گچوب نسوان
.
منه نصیبدی من خلق آرا عزیز اولدوم
قوجاقیمه آلوب اول سروره کنیز اولدوم
.
همینکه سینمه سالدوم او ماه رخساری
مثال چشمۀ زمزم اولوب سودیم جاری
.
همین شتر که گورنمزدی بیرجه قطره لبن
دولوبدی دوشلرینه سود گوزوم اولوب روشن
.
دراز گوشه سوار ایلدیم اولوب خوشحال
ویروبدی سیرینه تغییر سسلنوب فی الحال
.
هزار شکر بوگون دردیمه دوا تاپدیم
مریضدیم مرضیم قورتولوب شفا تاپدیم
.
آچوبدی یول بیزه نعمت ایدوبدی مستغنی
او نازنین بالا خوشنود ایدردی هر گورنی
.
خلاف قاعده اوندان گورونمدی ابدا
اولاردی همدمی گه بیر جوان خوش سیما
.
همیشه ال ایاقی پاکدی مطهریدی
جمالی شام و سحر گون کیمی منوّریدی
.
بش ایل بونوعیله اولدوم او سروره دایه
اوجالدی عزت و شأنیم سپهر اعلایه
.
ولی او سرور اعظم اولاندا شش ساله
آنا غمینده گلوب شوره ایلدی ناله
.
یتیم دی آتادان چون ازل او درّ یتیم
آنادا گئتدى الیندن دوباره اولدی یتیم
.
اگرچه خویش ائلی هر ایشنده ناضریدی
باباسی هم عموسی خدمتینده حاضریدی
.
ولی آتا یری وئرمز عمو بابا هرگز
یتیمون حرمتنی حق ایدوب اودور جایز
.
ایدوبدی واجب حرمت یتیمی پیغمبر
ک ام حقّدی فام الیتیم لاتقهر
.
یتیم آدی دله گلدی گل ایگوزوم داده
خرابه شامده که بیر یتیمی سال یاده
.
#گریز به #خرابه_شام
#حضرت_رقیه_شهادت
.
آدی رقیه دی سنّی صغیره دور او بالا
حسین قیزی اوزی اما مصیبتی کبرا
.
خرابه نین قاپوسوندا دوراردی افسرده
توکردی اشکنی آهسته عارض زرده
.
کچن اوشاقلارا بیربیر باخاردی اول گل یاس
گورردی اگنینه قزلار گیوبله تازه لباس
.
دیردی آه منیم زیب و زیوریم واریدی
مدینه ده نچه زر دوز معجریم واریدی
.
هزار حیف او گونلر دولاندی خوار اولدوم
خزان یتیشدی بیزیم باغه گل کیمی سولدوم
.
دینده عمه مه نولدی آتام که دوشدوخ اوزاق
دیر سفر ایلیوب صبر ایله قزیم گله جاق
.
دینده من عموم عباس هانی که یوخ اثری
دیور عموندا آتاوین اولوبدی هم سفری
.
خیال ایدور اوشاقام بیر خبر یوخومدی منیم
ولی اوزوم بیلورم اولموشام جهاندا یتیم
.
بو دللریله او قز صبح وشام آغلاردی
باخاردی عمه لری سینه سینی داغلاردی
.
او قدر آغلادی قلبی ملالیله دولدی
بابا بابا دیدی آخرده غصه مرگ اولدی
.
رقیه محنتی الدن قراریمی آلدى
یازانمادیم سوزومی اصل مطلبیم قالدى
.
#17ربیع_علومی_تبریزی
#پیامبراسلام
#ربیع_الاولین_اون_یدی_سنده_وقت_سحر
#ترکی
.
✍️ #زبدةالاشعار ✍️
.
🆔: @nohe_torki
نظر دهید