رضانی ئولدوره نین نسل نحسی اُمّ الفضل #جوادیه_عینی_فرد

شهادت حضرت امام جواد علیه السلام
#گریز به #قتلگاه
.
زبدة الاشعار

?: @nohe_torki
.
حاج غلامرضا عینی فرد زنجانی
.
رضانی ئولدوره نین نسل نحسی اُمّ الفضل
امامی ایلدی مسموم آلوبدی طاقتینی
.
قالوبدی اوچ گون اگرچه جنازه سی یرده
بو قصدیلن گوره مردم بدن عفونتنی
.
ولیک گوردوله بغداد اولوبدی عطر آگین
جماعتین بیله خوش بو چوخاتدی حیرتنی
.
او عطری ایتدیله تعقیب اهالی بغداد
بو عطریلن آقا شهرین یغوبدی ملّتنی
.
گوروبلر عطر امام جواد بیتیندن
چخور سمایه یقین ایلیوبله رحلتنی
.
فنا جهاندا قالوب یرمی بش ایل حجت حق
شهید اولوبدی گوروب جایگاه رفعتنی
.
غریب خاک خراسان بالاسین امّ الفضل
ویروبدی شیعه لره قورتاروب اذیّتنی
.
یانقلی سینه لرین عرشه قوزانوب آهی
جهانیانه بلندیردیلر مصیبتنی
.
امام هادی قاباقجا دالیجا شیعه لری
مُشایعت ایلیوبلر چکوبله منّتنی
.
خراب اولیدی الهی بو چرخ حیله گری
که بیلمدی بولارین خلق قدر و قیمتنی
.
او گنج معرفتی تپراق آلدی آغوشه
ایدوبله سورمه گوزه اهل دین تُربتنی
.
جوار حضرت کاظمده دفن اولوبدی جواد
مزاری اوسته توکوب خلق اشک حسرتنی
.
توکوبله گل رضوی گل قالوب گل آلتندا
او قبریدن کسه بیلموردی خلق اُلفتنی
.
اگرچه زهر ستم دوغرادی جگرلرینی
گوروبدی اوج جوانیده ظلم کَثرتینی
.
نه باشی اولدی بدندن کنار او مظلومین
نه گوردیلر بدننده قلج جَراحتنی
.
نه اللری کسلیوب نه سویولدی پیرهنی
نه بارماقیندا گوروب تیغ و تیر ضربتنی
.
نه باشی نیزه ده گزدی نه گوردی کُنج تنور
نه گوردی خیمه اجلالی دست غارتنی
.
نه آت چاپوبدولا شه سینه سینده بی پروا
نه باغلیوبلا طناب جفایه عترتنی
.
نه خیزران دوداقیندان ویریلدی طشت ایچره
که معتصم بیله گوسترمیوب جسارتنی
.
بولارکه عرض ایدورم تک حسینه قسمت اولوب
بله مقدّریمش گور اسفلی قسمتنی
.
اودور دیوبدیله لایوم کیومک ای شه
که مجتبا بله سویلوب حسین مصیبتنی
.
او ظلم لر که حسینه ایدوبدی قوم یزید
هنوز هضم ایده بیلموب بشر مرارتنی
.
او دم که زینب کبری تاپوب چوخور یرده
یارالی باشسیز حسینی پوزوبدی حالتنی
.
باسوبدی باغرینا عرض ایلسم دگل ممکن
ئوزونی سالدی او نعش اوسته تاپدی جرأتنی
.
اوپوبدی اوخ داغیدان سینه سین چکوب ناله
پوزولدی گوردی سماواتیان او حالتنی
.
دئدی الهی بو قربانلقی قبول ایله
بو چولده آل علیدن چوخاتدی رقّتنی
.
حسین قیامی قالوب قرنلردی «عینی فرد»
فنا جهاندا یازوبلار مُسلّم علّتنی
.
وگرنه کشته و کشتار چوخ گوروب دنیا
سالوبدی وادی نسیانه ذکر و صحبتنی
.
بقای دینه گوره مال و جانیدن گچدی
اودور همیشه خدا ساخلیوبدی نهضتنی

.
#جوادیه_شهادت
#رضانی_ئولدوره_نین_نسل_نحسی_ام_الفضل
#عینی_فرد
#ترکی
.
#زبدةالاشعار

?: @nohe_torki