ورود به مدینه
.
✍️ زبدة الاشعار ✍️
.
🆔: @nohe_torki
.
محمد باقر دائمی اردبیلی
.
زینبه دلده غملری
وئردی تکان مدینه ده
قارداشینون ملالینه
آغلادی قان مدینه ده
.
.
رشته ی نظمه چک قلم محنت بی نهایتین
قانه باتاندا ائللری گوردی خانم قیامتین
بار مصیبت و بلا خم ائلیوبدی قامتین
فاش ائلیه آناسینا کرب و بلا مصیبتین
قبر بتول اطهره گئتدی نهان مدینه ده
.
.
قویدی اوزون مزارینه سسلدی باغریقان ننه
درگهی ظلمین یانان ننه قدّی اولان کمان ننه
سینه یارالی نصف شب قبره گئدن جوان ننه
قبری کیمین خلایقه دردی اولان نهان ننه
ای قره زلفی ظلمیلن تئز آغاران مدینه ده
.
.
ایندی بلالی زینبون درد و محندی یولداشی
ظلمیله قانه غرق اولوب اوغلی وفالی قارداشی
قلبینه صدمه لر ویروب آینه مثلی غم داشی
زمزمه ائتدی وا حسین زمزمه دوندی گوز یاشی
گوز یاشینی عذارینه ائتدی روان مدینه ده
.
.
کوفه لیلر بو غمکشون ئولدوره تشنه قارداشین
قلبینه ویردیلار بیر اوخ جسمینه مین ستم داشین
دوشدی یارالی مقتله کسدیله ظلمیلن باشین
نصب اولولاندا نیزیه قان بوروموشدی گوز قاشین
مندن ائدور بو شرح غم سلب توان مدینه ده
.
.
سونمیه جک وجودیمون آتش غم گدازه سی
چوخدی بیان اولا اگر درد و ملال تازه سی
دفن او شاهه اولمادی زینبوین اجازه سی
گونلر ائوینده بی کفن قالدی حسین جنازه سی
فاش اولا امّته گرک بو جریان مدینه ده
.
.
چاتدی کی اوّلین فدا قانلی مناده لیلیه
محشر عیان اولوب آنا کرب و بلاده لیلیه
اکبرینون جنازه سی گلدی عباده لیلیه
اوندا تسلی وئرمیشم خیمه سراده لیلیه
ایندیده هم نواسیم خسته روان مدینه ده
.
.
واردی سریّه نون آنا دردیله غم خزانه سی
آغلاماقا الینده وار ایندی بویوک بهانه سی
طوی گونی قانیلن حنا یاخدی حسن نشانه سی
فاش اولونلاندا قاسمون محنت بیکرانه سی
آغلادی درد قاسمه پیر و جوان مدینه ده
.
.
گورنه یامان گونه سالوب غملر عروسوی آنا
دلده کی طاقتین آلوب محنت شام و کربلا
صودامر اوغلی اوخلانوب دردینه تاپمادوق دوا
جانی چیخنجا حقلیدور غملی رباب بینوا
گون قاباقیندا اگلشوب آغلاسا قان مدینه ده
.
.
هجری حسینمون آنا قویمادی جان رقیّمه
تنگ ائلمیشدی عالمی شمر و سنان رقیّمه
دیل یاراسی ویریلدی چوخ قلبی یانان رقیّمه
ئولدی خرابه گوشه سی اولدی مکان رقیّمه
دردینه چوخدی من کیمین قلبی یانان مدینه ده
.
.
ظلمیله سرو قامتین غملر ائدن کمان خانم
محسنی قانه غرق اولان قبره گئدن نهان خانم
صدقیله روز و شب #صبا دلدن ائدور بیان خانم
ایسته سون ئوز جواروه سن منی هر زمان خانم
دردوه آغلارام سنون منده همان مدینه ده
.
.
.
#سبک_ای_حرمینه_ناز_ائدن … 3 سبک
.
.
#ورود_مدینه
#زینبه_دلده_غملری_وئردی_تکان_مدینه_ده
#محمدباقر_دائمی
#ترکی
.
✍️ #زبدةالاشعار ✍️
.
🆔: @nohe_torki
نظر دهید