سلام بر زینب کبری (س)
گریز به #مجلس_یزید
..
..
..
..
مرحوم کریمی مراغه ای
..
..
..
..
زینب ای صدّیقۀ صغرا سلام اولسون سنه
افتخار مکتب زهرا سلام اولسون سنه
..
..
..
..
سن او عاشق سن طریق عشقده جان قویمسان
سن او صابرسن که یوز ایوبی حیران قویمسان
سن غمونده گوزلری بیر عمر گریان قویمسان
نایب انسیّة الحورا سلام اولسون سنه
..
..
..
..
سن ولی الله اعظمدن دُر یکدانه سن
فاطمه ریحانۀ پیغمبره ریحانه سن
سن شبستان محبّت شمعینه پروانه سن
لفظ عشقی ایلین معنا سلام اولسون سنه
..
..
..
..
سن او گوندن که قدم قویدون بو دار فانیه
غصه و غمدن فراغت گورمدون بیر ثانیه
عشق اودوندا یانماقی اورگتمیسن پروانیه
عشق وادی سینده ره پیما سلام اولسون سنه
..
..
..
..
ای گوزل آدی اولان دربار حقدن منتخب
افتخار جدّ و جدّه فخر امّ و زین اب
مریم و سارا شیم زیبا لقب علیا نسب
شاخ و برگ نخلۀ طوبی سلام اولسون سنه
..
..
..
..
زای زینب زهرۀ زهرالرین معیاریدی
یا یدالله فوق ایدیهم لرین انواریدی
نون نجابت با همان قالو بلی اسراریدی
دختر من عَلَّمَ الاَسماء سلام اولسون سنه
..
..
..
..
سن علینون مکتبیندن درس آلان فرزانه سن
خانقاه معرفتده مرشد جمخانه سن
سن حسین میخانه سیندن جام آلان مستانه سن
نوش ایدن هر لحظه قان صهبا سلام اولسون سنه
..
..
..
..
ای اولان آماج تیر غم دل صد پاره سی
ای سالان عمرینده باشه یدّی قارداش قاره سی
گلمیشوخ مهمان سنه ای چاره سیزلر چاره سی
ناامید ایتمه سنی زهرا سلام اولسون سنه
..
..
..
..
سندن عاشورا گونی باش ویردی بیر صبر و ثبات
عشقیوه ایمانیوه حیرتده قالدی کاینات
بیر سنه اولدی پناهنده بنات طاهرات
تاپمیوبلار ملجأ و مأوا سلام اولسون سنه
..
..
..
..
گه قاچاردون قتلگاهه شیون و افغانیله
گه گلردون خیمه گاهه دیدۀ گریانیله
یاره لندون اللرون زلفون بویاندی قانیله
ایلینده شمریله دعوا سلام اولسون سنه
..
..
..
..
سن او خاتونسان که یوزدن آچمادون اصلا نقاب
آلدیلار معجر باشوندان ایتمدون کشف حجاب
گون جماله توزلی زلفون حایل ایتدون چون سحاب
تا جمالون گورمه سین اعدا سلام اولسون سنه
..
..
..
..
عصر عاشورا ئولن ئولدی داغیلدی عزّ و جاه
سن کنار نهریده نصب ایلدون بیر خیمه گاه
بیر بلوک یاسلی عزالی عترته اولدون پناه
مجلس غم ایلدون برپا سلام اولسون سنه
..
..
..
..
کوفه ده گوردون یارالی نیزه ده قارداشیوی
داش یاراسین گورجگین توکدون یوزه گوز یاشیوی
وای حسینیم وای دیدون یاردون جداده باشیوی
اولدی زلفون قانیله حمرا سلام اولسون سنه
..
..
..
..
ابن مرجانه سنی بزمینده گوردی ناتوان
ناسزایه دل آچوب ووردی سنه زخم زبان
نیزه ده یومدی گوزون عباس ایدوب اشکین روان
ذکرون اولدی آه واویلا سلام اولسون سنه
..
..
..
..
آه او ساعتدن سنه اولدی جسارت شامده
آل بوسفیان سنه ایتدی شماتت شامده
قلبوى قان ایلدی طعن و اهانت شامده
تنگه گلدون ایتمدون شکوا سلام اولسون سنه
..
..
..
..
سن جلال و عزّتین گوزدن آتان مخدومه سن
گوزده گوز یاشین اورک قانین قاتان مظلومه سن
شامده اوچ گونلریله آج یاتان معصومه سن
عفّت و عصمتده بی همتا سلام اولسون سنه
..
..
..
..
سن یزیدین مجلسینده ایلدون بیر انقلاب
ننگلی لاطایلاته منطقی ویردون جواب
اضطرابیندن الینده تیتره دی جام شراب
پور سفیانی ایدن رسوا سلام اولسون سنه
..
..
..
..
سن حسینون باشینی طشت ایچره گوردون بالعیان
گوئیا یحیی هریدوسه گلوبدور میهمان
بویلانوب باخدون دگنده لبلریندن خیزران
سسلدون اى وارث یحیی سلام اولسون سنه
..
..
..
..
میزبانونده ادب یوخ عزّتونده فکر ایده
بولموری کیمسن وجودوندن خدایه شکر ایده
عرضه سی یوخ بیر سلامیله خوش آمد ذکر ایده
من دیوم قوی ای شه بطحا سلام اولسون سنه
..
..
..
..
ای مدال سینۀ زهرا حسین خوش گلموسن
نور چشم حضرت طاها حسین خوش گلموسن
مجلس و شرب و قماره یاحسین خوش گلموسن
دایه سی جبریل یا لعیا سلام اولسون سنه
..
..
..
..
سن هارا قارداش حسین بو مجلس عشرت هارا
عترت طاها هارا بو قوم بدفطرت هارا
عزّت و شوکت هارا بو خواری و ذلت هارا
بو حقیقتدور و یا رؤیا سلام اولسون سنه
..
..
..
..
بولمدیم اخطار ایدردیم گلماقون اطفالیوه
اهلبیتونله چیخاردوخ باهم استقبالیوه
من رشادتده باجون وار مرحبا اقبالیوه
قویمارام قانون گیده بیجا سلام اولسون سنه
..
..
..
..
بیر دوداقلار که اولاردان مرده جسمه جان گلور
ذکر تسبیح و دعا و نغمه قرآن گلور
ایلیوبلر پاره پاره قطره قطره قان گلور
سیندیروب یاقوتیمی ترسا سلام اولسون سنه
..
..
..
..
بیر دوداقلار که ننم زهرا اؤپردی صبح و شام
خیزرانیله او لبلردن وورور سلطان شام
باخ منه بیر طشت ایچیندن گور نه حاله قالمیشام
جاه و اجلالیم اولوب یغما سلام اولسون سنه
..
..
..
..
من کریمی زینبا یوز قویمیشام درباریوه
چوخدان ایستردی گوگل همراه اولام زوّاریوه
بیر یوزی قاره غلامم گلمیشم دیداریوه
سائلم ایله خانم اعطا سلام اولسون سنه
..
..
..
..
#زینبیه #کریمی_مراغه_ای #زینبیه_مدح #ترکی #زبدةالاشعار
نظر دهید