شجاعت حضرت اباالفضل(ع) در جنگ صفّین
.
✍️ #زبدةالاشعار✍️
.
🆔: @nohe_torki
.
حاج علیرضا امانی مجد اردبیلی
.
.
چون خلافتده علی باشلادی اصلاح امور
طبق احکام نبی ایله دی اَمریّه صدور
.
.
ایکی دوران خلافتده ، معاویه مدام
والیِ شامیدی، عثمان اونا وئرمیشدی مقام
منصبیندن اونی بیر حکمیله عَزل ائتدی امام
میندی رهوارینی قاصد، سحری دوشدی یولا
تا دمشقه یتیشوب ، اَمرِ امیر الاُمرا
.
.
امر واضحدی کی ظلمت ائلمز نوری قبول
گؤردی بو حکمی معاویه ولی ائتدی عدول
اموی نسلینه منطق اولا بیلمز معمول
سالدیلار تفرقه زور و زریلن ، مابینه
چکدیلر واقعه نی ، غائله ی صفّینه
.
.
سیر نظمیله زمان گئچدی اولوب وقتِ حَرَب
ساز و برگیله گلوب جنگه ایکی قوم عرب
بیر طرف حقّی گزور آیری طرف عیش و طرب
سالدیلار بیر بیرینین قدرتینی معیاره
بیر آچیق منطقه ، تعیین اولونوب پیکاره
.
.
چالدیلار طبلِ جدل چاتدی غرض آخره صبر
صحنه ی رزمگهه ، گلدیله شیران هِژَبر
هاموسی پنجه قوی، اَننی کورَک، سینه ستبر
دوردولار یوز یوزه پیکار اولوب آغاز عَمَلَن
بیلدیگین ائتدی ائدن،اولدی اولان،ئولدی ئولن
.
.
وقت او وقت اولدی گلوب صحنیه بیرکهنه حریف
بی ادب بیر بَدَوی ، دیلدن اوزون غیرِ شریف
بیر بیابانی عرب،سیرت و صورتده کثیف
لاشه خور،عرصه ی سیمرغیده جرأت ائله دی
جنگه سلطان ایکی عالمی دعوت ائلدی
.
.
جلب اولوب لشگرینه بیر به بیر حیدر نظری
انتخاب ایلیه تا جنگه، مناسب نفری
بو یوبانماق ائدوب اول بی ادبی بسکی جَری
لفظ هذیانیله اؤز فتحینی تضمین ائلیوب
اولدی گستاخ او قَدَر، حیدره توهین ائلیوب
.
.
هله مشغولیدی ئوز نقشه سینه چرخ فلک
بیر نفر گوردوله میدانه گئدور صاعقه تک
حیرته دوشدی علی،سسله دی اللهُ مَعَک
گلدی میدانه شجاعتله چکوب صِیحه سینی
آت ایاق اوسته قاتوب صِیحیه اؤز شیهه سینی
.
.
بیر سواریدی اوجا قدّ و جمالینده نقاب
وئروب آلموشدی غضب تاب و تبینن تب و تاب
باخدی خشمیله او ملعونه بئله ائتدی خطاب
هاردا زاغ و زغنه همدم اولار باغیده گول
سنی لال ائتمگ علی شأنینه شایسته دگول
.
.
سیف مسلوله ائدوب دشمن ناپاکی هدف
وئرمدی فرصت او بیچاره دییه یا لَلْاَسَف
ائله بیل داس اجل باغدا بیچور هرزه علف
سرنگون ائتدی آتیننان او سگ بی ادبی
اقتداریله ئوزی ائتدی مبارز طلبی
.
.
درک ائدوب مرکز لشگرده معاویّه خطر
شعشعا اوغلونا ترفندیله بیر سالدی نظر
گئتدی بیر فکره سیاستله او کانون شَرَر
دئدی واجبدی ویرام دامنِ بو افسره چنگ
یوخسا بو نحویله آخرده دوشر مشکله جنگ
.
.
اضطرابیله محافظلرینه ائتدی بیان
بو جوان تیغه مسلّطدی، ولی خام و جوان
شعشعا اوغلی کیمین، کیم ویرا شمشیر عیان
ساکت ایلر بونی ردّ ایلمز ئوز فرصتینی
سفره ی دولتیمیزدن، آپارار قسمتینی
.
.
گلدی پاسخ ، نیه آیا بئله گفتار ائدوسن
کیمی،سن،گؤر کیمه بو جنگیده معیار ائدوسن
منی بو شخصه حریف ائتسون اگر خوار ائدوسن
گرچه بو شَرزه جوان صاحب جرأتدی ولی
منه شایسته دگیل جنگیده جز شخص علی
.
.
آلوب اطرافیمی بو مَعرکه ده یدّی اوغول
منتظردی هاموسی جنگه ائدم امر نزول
ارشد اوغلوم اونا بسدی،سؤزومی ایله قبول
رأیی چون منطقی اولدی هامونی راضی ائدوب
اولین وحله ده میدانه بویوک طوله گئدوب
.
.
ای عجب گؤر کیم ائدور معرکه ده قصد قتال
پنجه ی شیره مقابل دایانوب طوله شُغال
بو شغالی ولی فوراً او جوان ایله دی لال
سیف مسلولی مهندس کیمی وردی هدفه
پیکر نحسینی صحراده آتوب بیر طرفه
.
.
بیر به بیر یدّی اوغول، راهی اولوب کشمکشه
ایکی دوندی اوچه،اوچ دورده،صورا دوردده بِشه
قویمادی آلتینی سالم قالا یدّی یتیشه
شعشعا اوغلی گؤروب صحنه ی قان دوتدی گوزون
انتقام آلماقا فوراً ، ائدیب آماده اؤزون
.
.
چکدی بیر نعره کی چوخ ائتدی علینی نگران
حِلّه ی رزمی گیوب ، قویدی باشا خودِ گران
تیغ مصری الینه آلدی ، اولوب جنگه روان
گؤردی میداندا نقاب آلتدان ایشیق تابش اولار
بیر جواندور که حدودیله یاشی اون بش اولار
.
.
آچدی نحس آغزینی اُول یاوه سرا باشلادی لاف
ائتدی اظهار منیّت ، دیوب الفاظِ گزاف
دئدی خشمیله جوان: اولسون اگر مردِ مصاف
چوخ دانیشما،دانیشیق عورته زیبنده اولار
شیعه تا واردی علینین آدی پاینده اولار
.
.
ناگه آغاز هجوم اُول سگ مُرتد ائله دی
اوّلین ضربه نی قدرتله جوان ردّ ائله دی
ضربه ی دوّمی سرعتله سپر سدّ ائله دی
نا برابر جدلین، آخری گلدی نظره
پیکری لنگ ائدوب، دوشدی جوان دردسره
.
.
ناگهان عرصه ده بیر فنّ قوی اولدی عیان
سرنگون اولدی آتیندان یخیلان تک،او جوان
یاپیشوب زینی، اگیب قامتین اُول سَرو روان
تکیه گاه ائتدی ولی دیزلرینی مرکبینه
یاعلی سسلدی زین اوسته سوار اولدی گینه
.
.
قامتین لنگرینی توأم ائدیب سرعتینه
قاتدی بو لنگری بازولرینین قوّتینه
قوشولوب گویده آغیر تیغی آغیر ضربتینه
خندق اوسته دئدیلر ساق یداللهه باخون
قبض روح ایستور ائده قابض الارواحه باخون
.
.
شعشعا اوغلی بو هنگامیه ایلوردی نظر
صول طرفدن ئوزونه ایله دی احساس خطر
او طرفدن یوزونه قاعدتاً دوتدی سپر
او جوان سرعتیلن وردی ولی ضربه صاقا
دوشدی دشمن یره، باش قویدی ادبلن ایاقا
.
.
ضربه ی کاری غرض تپراقا گَتدی کوره گین
سورونوب خفّتیلن دوتدی جوانین اتگین
آخرین ضربه ولی کسدی اونون شاه رگین
لشگر حقّیده بیر شخصه خطاب ائتدی امیر
دئ قَییتسین بوجوان شیره، واریم امرِ خطیر
.
.
واقف اولدی او جوان چونکی علی سؤزلرینه
فوراً ال سینه ده گلدی او شهون محضرینه
مرتضی ، باخدی اَوَل ، دقتیلن پیکرینه
گؤردی طغیان غضبدن گؤزی قانیله دولوب
بیلدی سالمدی اوزون قوللاری،آسوده اولوب
.
.
سرزنش ایله دی سربازین اَوَل، شیر حجاز
دئدی:آیا گئدوسن جنگه ندن غیر مجاز؟
یوللیاردیم سنی پیکاره ئوزوم وقت نیاز
کیم سنه وئردی اجازه ائده سن جنگ و جدال؟
ئوز باشوننان گئده سن عرصیه،پوشیده جمال
.
.
تیتره دی پیکر خوش قامت اُول شیر جوان
اَل آتوب یوزدن آچوب بندِ نقابی نگران
ناگهان اولدی رخ ماهِ بنی هاشم عیان
غیضیدن یومدی گوزون آتدی تراب اوسته نقاب
آغلیوب وئردی بو نوعیله شهنشاهه جواب
.
.
ئولموشم من مگر آخر ائله بی شرم دنی
بیزه توهین ائلیوب ایستیه پیکاره سنی؟
سرزنش ائتمه بابا غیرتیم ئولدوردی منی
آل سفیانه گرکدور اولا بو سؤز عملی
لایق مرگیدی هر کیم دئسه حضرت سیز،علی
.
.
مرتضی قلبینه بو سؤز او قَدَر ائتدی اثر
گؤزیاشیلان ائدوب آیینه ی وجه اللهی تر
قول بویون اولدولار اُول دشتیده فرزند و پدر
دئدی نوکر بیل ئوزون فاطمه نین سؤگولونه
ساخلا بو غیرتیوی کرب و بلانین چؤلونه
.
.
سنه لازیمدی سلامت قالا بو قوللار اوغول
اونداکی عترته اعدا سو یولون باغلار اوغول
گوره جکسن نقدر کؤرپه دخیلون وار اوغول
چاره سیزلر اولاجاق اوندا پناهنده سنه
اوردا محتاج اولاجاقسان بو قولا بو بدنه
.
.
شاعرین نیّتی پاک اولسا یازار شعر نفیس
دئمز اشعاریده انصافی اولان یاخچیا، پیس
اولا بیلمز ولی هر شعری یازان نوحه نویس
بو حقیقتدی « #امانی» نیه آیا دئمیک
تپراقون اوسته گرک قطریه دریا دئمیک
.
.
.
#جنگ_صفین #حیدریه_مدح #حیدریه_شجاعت #عباسیه_شجاعت
#چون_خلافتده_علی_باشلادی_اصلاح_امور
#ترکی
.
✍️ #زبدةالاشعار✍️
.
🆔: @nohe_torki
نظر دهید