شاه بانوی حجاز و حرم شیر خدا #فاطمیه_انور_اردبیلی

شرح مختصر از رفتن حضرت صدیقۀ کبری حضرت زهرا (س) به مجلس عروسی
و تاریخچۀ #ام_حبیبه
#گریز به حالات #کوفه
..
..
..
مرحوم انور اردبیلی
..
..
شاه بانوی حجاز و حرم شیر خدا
پارۀ قلب نبی سیده و خیر نسا
مام سبطین و عزیزه نفر اهل کسا
حضرت فاطمه صدیقۀ کبرای بشر
ایلین چوخ گیجه سین قبلۀ طاعتده سحر
..
..
سورۀ کوثر ائدن شأنینی اثبات و عیان
یوزی خورشید حیا قامتی طوبای جنان
امتون دادرسی جدۀ سادات جهان
تازه پیراهنینی سائله احسان ائلین
شوقیله لیل زفافینده ئوزی کهنه گین
..
..
آختاران عشقیله ارضای خدای فلقی
قدری حیرتده قویان آسیه نی ما سبقی
دفتر معرفتون عزتی زرین ورقی
کیمیا دیدۀ حورایه اولان خاک رهی
درگه اقدسی ئوز محسنینون قتلگهی
..
..
نقل ائدوب بو سوزی ارباب احادیث خبر
یوخدی اشکالی موافقدی هامی اهل نظر
فیضه نائل اولاسان یاخشی قولاق وئرسون اگر
شرطیوار گیزلین اولان مرقدینی یاده سالاق
آغلیوب فاطمیه حاجتی زینبدن آلاق
..
..
خبرون دورۀ پیغمبره نسبت واریدی
مکه ده نقل ائلیوبلر بیله شهرت واریدی
بیر یهودیه قزا جشن و ضیافت واریدی
جلسه ائتدی او مجلسده ستمگر نسوان
نقشه طرح ایلدی بیر عده یهودیه زنان
..
..
یاخشی فرصتدی گلون فاطمه نی خوار ایلیک
مجلسه دعوت ائدوب روحینه آزار ایلیک
سندیراق محنت و آلامه گرفتار ایلیک
گورسون اجلاسمیزی رنج و ریاضت چکسون
گوزی دوشسون بیزه بو حالدا خجالت چکسون
..
..
گیمیشوق بیز هامومز رخت حریر و عالی
هامونون خوشدی بو مجلسده بوگون احوالی
واریدی زینت و دستبند و قزل خلخالی
سهلیدور فاطمه نون زیبی بو اندازه دگل
کهنه کوینگ گینور معجری ده تازه دگل
..
..
بیر کنیز ائتدیله زهرا ایوینه فوری روان
یتیشوب محضرینه عرض ایلدی فاطمه جان
قدمون رنجه بویور لطف ائله ای فخر زنان
مجلس جشن عروسیده یرون بوشدی خانم
طویون اهلی سنی گوزلور سنه دلخوشدی خانم
..
..
مطلبی درک ائلیوب بیلدی ندر کیف و کمی
او کنیزی یولا سالدی خانمون آرتدی غمی
آغلادی گلدی دیله وحی ایوینون محترمی
ای کریم ازلی واقف اسرار خفا
آتاما تاج رسالت ائلین لطف و عطا
..
..
گوشه گیرم بیلوسن بیر کسه یوخ دردسریم
واردی بو زندگی سادیه حسن نظریم
کچور عزتله بو کاشانه ده شا و سحریم
دعوت ائتمیش منی طوی بزمینه مغروره زنان
وئره لر زیب و زرین بزمیده زهرایه نشان
..
..
او یهودیه زنانیکه چکوب نقش جفا
بودی منظورلری فاطمه مجلسده سنا
چوخی سابقده کنیزیدی خدیجه آناما
آنامون ثروتی ترویج دیانتده گیدوب
کهنه پوش اولماقا اسلام منی تابع ائدوب
..
..
منزله قویدی او اثناده قدم ختم رسول
گوردی چوخ غصه لیدی حال پریشاندی بتول
یوز دوتوب فاطمیه اولما دیدی ذره ملول
سن بو گون فلسفۀ عزتی درک ائتملی سن
ذات حق امر ائلیوبدور او طویا گئتملی سن
..
..
درک ائدوب فاطمه فرمایش خیرالبشری
بوشلادی دلده اولان غصه نی رنج و کدری
حق رضاسی دیدی وار نیلیورم زیب و زری
گیدوب الساعه فراموش ائدرم موکبیمی
سالارام باشیمه من وصله لی چادر شبیمی
..
..
ایستدی خارج اولا اودن او مرضیه مقام
جبرئیل اندی رسول حقه عرض ائتدی سلام
وئردی بیر بوقچا اونا رخت بهشتیدی تمام
ذات حق دوزمدی زهرانی خجالتده قویا
گیینوب فاطمه گئتسون بو لباسیله طویا
..
..
جنتون رختینی زهرا گیینوبدور بدنه
نعمتون عشقینه شکر ایلدی نعمت وئرنه
شاد اولوب احمد مختار دیل آچدی سخنه
کیم دولانسا دئدی عالمده رضای حقیله
گیینور البسۀ سندس و استبرقیله
..
..
مجلس جشنه طرف اولدی او صدیقه روان
دوره سین آلمیشیدی باطناً حوران جنان
ایشیدوردی اولارون زمزمه سین گوش زنان
گلمیشوق خادمه لیک رمزینی اثبات ایلیک
قدمون قوی گوزوموز اوسته مباهات ایلیک
..
..
خانما منتظریدی او یهودیه زنان
ناگهان عطر بهشتی اولارا وئردی تکان
مجلسون اهلی باخوب صحن سرایه نگران
گوردیلر حضرت خاتون قیامتدی گلور
گل خوشبوی گلستان رسالتدی گلور
..
..
جلوۀ رخت بتولی آلوب هر کیم نظره
غش ائدوبدور یخلوبدی یوزی اوستونده یره
نوعروسون پوزولوب حالتی دوشدی خطره
مقدم فاطمیه آتدی آناسی لچگین
ایکی اللی یاپشوب دوتدی کرامت اتگین
..
..
آند وئرم آتاوون خاطرینه ایله دعا
دیدیگوز حقدن ایسته بالاما فوری شفا
دیرم سیز دینی دورسا قزیم گر ایاقا
نوعروسین آناسین گوردی ایدور سوز و گداز
فاطمه قمچی دگن قولاری قالخزدی بیر آز
..
..
ساحت ذات خداونده دئدی حاجتینی
آرتوران ای کرمی فاطمه نون عزتینی
منه خاطر بو قزون لطف ائله وئر صحتینی
فخر مریمدن ایلیکه یتشوب ختمه دعا
نفسه گلدی او قز دوردی یریندن ایاقا
..
..
دولانوب فاطمه نون باشینه چون پروانه
آناسی کلمۀ تکبیر دئدی مستانه
آشنا اولدی او مجلسده اولان بیگانه
یوز دوتوب تازه گلین عرض ائدوب ای ماه حجیز
منی اللهه گوره سن آپاروب ساخلا کنیز
..
..
خادمه اولدی بتوله او برازنده خصال
بعد زهرا قزی زینبدن ائدوب کسب کمال
دورۀ شیرخدا دورۀ سرخیل رجال
ترک ائدوب یثربی خوش نیت و خوش مطلبیله
کوفیه گلمیشیدی قافلۀ زنبیله
..
..
کوفه ده گرچه اونون ایستینی چوخ چوخودی
محضر زینبی ترک ائتمگه میلی یوخودی
مجتبا آخر اونون حارثه عقدین اوخودی
گون او کون اولدی یتوب محنت امام حسنه
کوفه نی ترک ائلیوب ایستدی گلسون وطنه
..
..
حارثه ام حبییه بو سوزی ائتدی عیان
ایلیور یثربه زهرا قزی تغییر مکان
خانموم زینب اولان یردی منه باغ جنان
وئرمرم عالم امکانه اونون محضرینی
بو بسیمدور منیم هر گون ئوپورم اللرینی
..
..
منی زینبدن آیرسون وروسان قلبیمه اوخ
گوگلومون محنت هجرانینه هیچ طاقتی یوخ
آناسی فاطمه نون عمری آز اولدی غمی چوخ
قوی گیدوم عزت و اجلالیله یثربده قالوم
زینبه خدمت ائدوم فاطمه نون عطرین آلوم
..
..
جریانی یتوروب خارث امام حسنه
قالمیور ام حبیبه آقا ایش قالدی سنه
مجتبا شخصاً اونی ایستدی گلدی سخنه
تاب ائله فرقته آخر ئوره گون دینجله جک
کوفه ده قال نگران اولما باجیمدا گله جک
..
..
نچه ایل ام حبیبه یاشادی فرقت ده
قولاقی سسده گوزی یولدا ئوزی حسرتده
اون اوچ ماه عزا شصت و یک هجرت ده
کربلا لشکرینون کوفیه چاتدی قاباقی
خولینون نیزه ده قران اوخیوردی قوناقی
..
..
آه زینب یاخنیدی ائده اول شهری فنا
بخت کلثوم کیمی گیمیشیدی قاره هوا
مرد و زن کوچه ده دولموشدی مسیر اسرا
یولون اوستین داش آتانلار کسوب ائتمیشیدی مقام
کول توکنلر یوخاری یرده دایانمیشدی تمام
..
..
غرفه دن شهره باخور ام حبیبه نگران
حالیدن حاله دوشور قلبی ورور چوخ ضربان
خبر آلدیلا نه وار فاش ائله ای پاک روان
ائدوسن واهمه صاق و صولا تزتز باخوسان
عجلون واردی کانّه یولا تزتز باخوسان
..
..
بیلموسن لشکر اسلامه یتوب فتح و ظفر
سن گرک شاد اولاسان ایندی نه لازمدی کدر
شکر ائله اهل مسلماندان اولوب رفع خطر
یری وار فکریمیزی جشنه مهیا ایلسوک
خارجی باشلارینا خوشدی تماشا ایلسوک
..
..
دئدی قلبیمده امام حسنون بیر سوزی وار
غفلتاً یادیمه دوشدی منه سلب اولدی قرار
قزیشوب قلبیم اودور که بیله قوش تک چوبالار
بیلمورم هیچ نیه قلبیم قوری یاپراق تک اسور
نیه بو قافله نی گورمگه گوگلوم تله سور
..
..
وحشتیم وار اوتوروب گه دورورام تز ایاقا
ایستورم قافله گورسنسه گیدم تز قاباقا
بیلموسوزم مدت اولور منتظرم بیر قوناقا
او گرامی قوناقون شوری دولوبدور باشیما
وای دئسم اوندا بیلورسن کول اولوبدور باشیما
..
..
ناگهان چهرۀ شهری بورودی گرد و غبار
پرچم نصرتیله رد اولوب افواج سوار
نیزه بانلار گوزه گورسندی گلور مثل قطار
قانلی بیر یاره لی باش نیزیه وورمیش هره سی
دردناک اولدی تماشاچیلارون منظره سی
..
..
کسیلن باشلارا دقت ائلین یومدی گوزون
کاکل اکبری رویت ائلین یومدی گوزون
طرۀ قاسمی قیمت ائلین یومدی گوزون
گچدی باشلار اسرا طایفه سی اولدی عیان
گلدی عریان دوه لر اوسته سراسیمه زنان
..
..
غرفه دن ام حبیبه اولارا باخدی بیر آز
اشاقا دوشدی اوزون بیلمدی تاخیره مجاز
ئوز ئوزیله بیله فکر ایلدی اول محرم راز
سارالان گل کیمی افسرده اولوبدی بالالار
نان و خرما آپاروم من ایله بیل آجدی بولار
..
..
حق تصدق ورن اشخاصه وئرر یاخشی جزا
کاروان اسرایه یتیشوب الده غذا
نان و خرماسینی تکلیف ایدوب هر خردا قیزا
ددیلر غرفه نون اوستن اورگون یاندی بیزه
بیز تصدق یمروخ نقص یتر شأنیمیزه
..
..
سرپرستوز دئدی کیمدی کیم آچار مشگلوزی
او خانمدور دئدیلر ایلیور ارشاد بیزی
هی با خور نیزده دالدان کسیلن باشه گوزی
بیر سینیق محمل ایچینده اوتوروب باش یارالی
شامه سر گشته گئدوللر باجی قارداش یارالی
..
..
محمل زینبی قصد ایلدی قاچدی قاباقا
گورجاقین زینب اونی باشینی سالدی اشاقا
گه گچوب ام حبیبه صولا گه گچدی ساقا
گلمیشم نچه سوالیم ددی وار سندن اسیر
بس نیه گزلدوسن صورتوی مندن اسیر
..
..
سنی تاری دئ گوروم هانسی یرون ملتی سوز
آدوزی خارجی دیلر هارا جمعیتی سوز
سولموسوز گل کیمی یا اینکه غذا حسرتی سوز
قلبیزون دردینی بیر کیمسیه روشن دمیسوز
کوفه نون اهلی تصدق گتورور سیز یمیسوز
..
..
نسبتوز واردی کیمه کیمدی سیزون جد و ابوز
اولما گمنامسوز اعرابیده یوخدور لقبوز
یا کی الچاقدی سیزون سلسلوز اصل و نسبوز
طعنه لی سوز خانمین قان ائلدی گوز یاشینی
دیزی اوستن یوخاری قوزادی فوراً باشینی
..
..
هر مؤذن دئدیکی مأذنده وئرسه اذان
بابامون آدینی بش وقت ائلیور گونده بیان
باخما سن ایندی کیچیلدوبدی بیزی دور زمان
آتامین پنجه سی دوتموش منیم اسلامه سپر
آنامین شوقیله درگاهینی حورالر ئوپر
..
..
کیمدی بیزدن یاخنی درگه اعلای حقه
اوزوگون وئردی نماز اوسته آتام مستحقه
هل اتا اهلینه عالمده یاراشماز صدقه
ذکر ائدوب بیرده تصدق سوزون اینجیتمه بیزی
دردیمیز چوخدی بیزیم قوی چکک اوز دردیمیزی
..
..
گورورم چوخدی دئدی قلبیده درد و محنون
هیجان گتدی منیم قلبیمه رمز سخنون
او اوزوک بذل ائلین شخص آتان اولسا سنون
عشقیمون پایه سینی عالمه من بیلدیرم
سنه زینب دئسه لر من ئوزومی ئولدورم
..
..
ولی من سهو ایئدورم کوفه هارا زینب هارا
وار کیمین قدرتی آیا اونی شامه آپارا
آلتی قارداشی اولاندا دولانار باشدا قرا
من دیین زینبون اجلالینه نقصان یتمز
او علینون قزیدور تخت روانسیز گتمز
..
..
من دئین زینب هارا گئتسه هواداری اولار
علی اکبر کیمی یولاردا پرستاری اولار
من دیین زینبون عباس جلوداری اولار
او خانم گلسه اگر محملینه گل سپولر
باملردن نه سنون تک باشنا کول سپولر
..
..
من دیین زینب ایدوب کوفه ده بش ایل سکنا
اورگدوب کوفه نون عورتلرینه درس حیا
اونی زهرا بجروب مثلینی گورمز دنیا
قد رعناسی قرا زلفی گوزل صورتی وار
نه سنون تک آغاران ساچلاری خم قامتی وار
..
..
بسدی ای ام حبیبه دئدی قان اولدی اورک
سن دین زینبم اما ایویمی یخدی فلک
کوفه ده سفرۀ جودیمده یین نان و نمک
ال چالور بام لر اوستونده توکور کول باشیما
داش آتور نیزده قرآن اوخیان قارداشیما
..
..
یادیمه سالما جلالتله کئچن گونلریمی
سندروبلار خبرون یوخ نجه بال و پریمی
صاق صولومدا گزن عباس و علی اکبریمی
ایسته سه گوگلون اگر نیزه لرون باشینه باخ
صورا کلثومیله لیلا گوزونون باشینه باخ
..
..
واژگون اولدی سلیمان زمانون تختی
یدّی قارداش باجیسی گییدی اسارت رختی
قاره بخت ایلدی دنیا نجه گور خوشبختی
حاجتی یوخ دیمگه مسئله روشندی سنه
بیله قالماق گئنه واللهی شجاعتدی منه
..
..
او اوجا نی ده کی باش که گوروسن نورانی
یوز گوزی کولدی محاسندن آخور القانی
او حسینیمدی منیم فاطمه نون ریحانی
باجیسی ئولسون اونون خولی سالوب گور نه حالا
زینبون حقیدی بونداندا گرک تز قوجالا
..
..
..
#فاطمیه_مدح
#فاطمیه_شهادت
#شاه_بانوی_حجاز_و_حرم_شیر_خدا
#غرفه_دن_ام_حبیبه_اولارا_باخدی_بیر_آز
#انور_اردبیلی
#یادگار_انور
#ترکی
#زبدةالاشعار