استغاثه از محضر امام عصر (عج)
..
..
محمدرضا صادقی (شیدا)
..
..
سالوبدی قلبیمه هجرون شراره یا مهدی
دوزنمورم داخی بو انتظاره یا مهدی
..
یورولموشام منی گل قویما منتظر مولا
گلوبدی تنگه اورک ایله چاره یا مهدی
..
منیم سوزیمده اثر یوخ اوزون دعا ائیله
سنی قسم وئرورم کردگاره یا مهدی
..
کوسوبسن اولمیا مندن گناهیمه خاطر
آقالیق ایله باریش باخ بو زاره یا مهدی
..
نمک ییوب سرسفرنده ناسپاس اولدوم
اگر چه لطف ایلدون سن دوباره یا مهدی
..
حلال ایله ، ولی گوزله سنی آنان زهرا
شکایت ایلمه پروردگاره یا مهدی
..
گوزوندن آتسان اگر سن منی ائویم یخلار
دوشر جهیمیده جسمیم فشاره یا مهدی
..
هایانداسان آقا باشسیز قالوبدی شیعه لرون
فراقون ایلیوب هر قلبی یاره یا مهدی
..
اگر چه شیعه لرون قلبیوی سالوب درده
تیکوبله گوز ولی سن تک نگاره یا مهدی
..
دولانما چوللری آغلار گوزون فداسی اولوم
بو قدری گوزیاشی توکمه عذاره یا مهدی
..
قابار ایاقلاریوا بو ذلیل جانیم قربان
هاچان یولون دوشه جاق بو دیاره یا مهدی
..
دوتوبدی ابر ستم آسمان دنیانی
باتوبدی یر یوزی گرد و غباره یا مهدی
..
بیر عده شیعه لرون گل کیمی سولور سارالور
اسور خزان یلی عمر بهاره یا مهدی
..
بیر عده ال چالوری شیعیه بیر عده گولور
ورور اورکلره هر آن شراره یا مهدی
..
نه اینکه ظلم الی عرشه چاتوبدی ، جانیلر
سالوبلا شیعه نی حال فکاره یا مهدی
..
خدادن ایسته ظهورینده ایلسون تعجیل
اجازه آل آپار اَل ذوالفقاره یا مهدی
..
فسادی ریشه کن ائت ظلمی مضمحل ایله
عدالتین علمین وور بو داره یا مهدی
..
بو یرده سندن آقا ایلورم ایکی خواهش
جسارت ایلورم اُول شهریاره یا مهدی
..
بیری بودور که بوخیر ایشده چوخ شتاب ایله
نه اینکه خیر ایشه یوخ استخاره یا مهدی
..
ایکمجی اوز باشینا بوشلاما بو “شیدا “نی
قاپوندا نوکریوه قیل نظاره یا مهدی
..
#مهدیه #محمدرضاصادقی #ترکی #زبدةالاشعار
چوخ عالی الله اجرورسین