زبانحال حضرت قمر بنی هاشم (ع) به آب فرات
.
.
مرحوم انور اردبیلی
.
.
سرینسن گرچه ای سو سندن اصلا ایچمرم یانّام
آقام لب تشنه دور اولماز گوارا ایچمرم یانّام
.
.
نقدری موج ورسون وور فرات ایچرہ سوزوم یوخدور
ایله فکر ایلمه قلبیم یأنور منده دوزوم یوخدور
اگر آب حیات اولسون گنه سنده گوزوم یوخدور
اوتاندیرام بو چولده خضری اصلا ایچمرم یانّام
.
.
طریق عشقده ال چکمیشم من جانیدن تندن
چتیندور نفسیم آلسون امتیاز عشقیمی مندن
فقط بیر نفعی وار ای سو اگر نوش ایلسم سندن
وار اما ایچممکده چوخ مزایا ایچمرم یانّام
.
.
بقا دلگرمیم ملک فنایه لیک دلسردم
ابوالفضلم علینون مکتبینده بیر کیچیک فردم
آنام مرد اورگدوب هم شیر مردم هم جوانمردم
جوان مرد ایلمز آیری مدارا ایچمرم یانّام
.
.
کف دستیم سنه جام اولدی نفسین سرعتین گوردوم
بفوری نفسیمی رام ائتدی عشقون قدرتین گوردوم
علیّ اصغرین شکلین ربابون محنتین گوردوم
یانور هر تک تکی یوخدور توانا ایچمرم یانّام
.
.
گلایه ایلیور سولموش چمنده گوللریم سندن
دگل راضی بو چولده عترت پیغمبریم سندن
نه قاسم نوش جان ائتدی نه ایچدی اکبریم سندن
من ایچسم شکوه ایلر امّ لیلا ایچمرم یانّام
.
.
او شخصون اوغلیام یوخدور اونا عالمده هم پایه
طلاق اوچ پول وئروبدور زندگیده دار دنیایه
جهانه پشت پا وورّام قوشوللام اهل معنایه
دیله گلسون اگر ائتسون تمنّا ایچمرم یانّام
.
.
یولومی گوزلیور نازلی رقیّه اگلشوب بی تاب
یتورسم مشکیمی شخصاً اونی من ایلرم سیراب
بدنده اللریم قالسا سو جامین ایلرم پر آب
ایچر لب تشنه لر قیلّام تماشا ایچمرم یانّام
.
.
اوشاقلیقدان وار عشقیم سو وئرم لب تشنه انسانه
هوسله مشکیمی دولدورموشام قلبیم یانا یانه
نه خوشدور خدمتیم خیمه سراده یتسه پایانه
اگر لغو اولسا واللهی بو سودا ایچمرم یانّام
.
.
شجاعت پیشه ام یوخدور هراسیم نیزه دن اوخدان
وارین معشوقه عاشق بذل أیدوب عذر ایستیر یوخدان
واریم بیر جفت اوزون قولدور اونی نذر ائتمیشم چوخدان
قبول اولسا بسیمدور بو هدایا ایچمرم یانّام
.
.
وداع ائتدوم خیمده بیر بلوک یورقون هزاریله
بالا قزلار منه دردین دئدی رمز و اشاریله
سوسوزلوق چوخ چتیندور ربطی یوخدی شیرخواریله
فرات اولسون گرک عالمده رسوا ایچمرم یانّام
.
.
زبانحال عباس «انورا» هر چند چوخ چوخدی
او سوزلر که یازوبلار بیتی الحق قلبه بیر اوخدی
سنون شع ون ردیفون تازه دورهمتاسی هیچ یوخدی
برای اوّلین بار ائتدون انشاء ایچمرم یانّام
.
.
.
#عباسیه #انور_اردبیلی #فرات_انور_اردبیلی #فرات #عباسیه_شهادت #ترکی #زبدةالاشعار
نظر دهید