عیادت زنان مدینه از حضرت زهرا سلام الله علیها
.
.
علی نوروزی نوین
.
.
سس دوشدی یثرب ایچره که زهرا مریض دور
اول غملی دیلده غملری چاتمیش نهایته
.
یثرب خانملاری ییغیشوبدور که بیر گونی
گیتسونله دودمان عشق و صفا و محبته
.
لازم بولوبدولر ایده لر درک محضرین
چوخ شوقیله گلوبلر او باب ولایته
.
آهسته دویدولر یاری یانمیش او درگهی
بولمم قالوبدی زینب او دمده نه حالته
.
دیل آچدی عرض قیلدی الهی ترحم ایت
کاش اولمیه او کس که گلوبدور اذیته
.
سالدی خیاله زینب دلخون او لحظه نی
عاجزدی دل که شرح ویره اول حکایته
.
بیر وضع حالیلن او جوهره یه عفت و حیا
آماج اولوبدی قلبی تیر بلا و مصیبته
.
آچدی ولایتین قاپوسین چوخ شکسته دل
بیر عده عورتی گوروبدی گلوبلر عیادته
.
زینب دوتوبدی یوز بویوروب چوخ یوبانمسوز
آیا خبر واروزدی اولدی نلر آل عصمته
.
اول وقته گلمسوز که آنام دلشکسته دی
امت جفاسی سالدی اونی چوخ ریاضته
.
بیجا بهانه ایلدیلر الده بیعتی
جرأت تاپوبدی ثانی گلوبدور اهانته
.
بیر عده نی یغوبدی او ملعون کینه جو
وار ایندیده هله یانورام من او ساعته
.
ظلمیله باب وحیی او ظالم چکوب اودا
یاندیردیلار بو درگهی نار عداوته
.
پیغمبرین عزیز قیزین ائتدی زخمدار
هم یاره وئردی هم دیل آچوبدور شماتته
.
طول اولدی مطلبیم هله قالسون بو یرده سوز
مخلص گلوبدولر ائوه عرض ارادته
.
بولمم نه سوز دانشدیلا یا گوردولر نلر
غرق اولدولار و لیک هاموسی بحر محنته
.
زهرانی گوردولر سارالوب گل کیمین سولوب
چوخ غم یتوبدی دختر ختم رسالته
.
بولمم نه حالیدیدی پیمبر نشانه سی
دیل اولمیوبدی کیمسده گلسونله صحبته
.
دیدار ایدوبله فاطمه نی دوردولار اولار
گتسونله تا که خاتمه ویرسونله زحمته
.
زینبده دوردی تا اولاری رهسپار ایده
بیر تازه غم دوباره یوز ویروب اول ماه طلعته
.
صحنه چیخاندا گوردی خانملار یواش یواش
بیر سوز دئیوله سالدی اونی حال رقته
.
گوردی دیوله فاطمه قالماز یقین گیدر
بو سوز سالوبدی زینبی بیر آیری محنته
.
القصه گیتدولر ولی زینب دوشوب غمه
دیلدن یاناردی زینب نالان بو صحبته
.
رجعت ایدوب ائوه اگلشدی دل غمین
آغلاردی چوخ یانقلی ئورکدن بو حسرته
.
بیر قدری آغلادی او بالا ایتدی آه و زار
گوز کاسه سیندن اشگی آخوب غملی صورته
.
گلدی ائوه بوحالیده مولای بیکسان
مشمول ایدوبدی زینبی چوخ مهر و رأفته
.
علت ندور بالا چوخ غملی سن بوگون
ترجیح ویرموسن غمی سن صبر و طاقته
.
بسدور بو قدر آغلاما یاندیرما قلبیمی
تاپشور قیزیم ئورکده کی دردون مشیته
.
دیندیردی هر نه قدر اوبالا گوردی آغلوری
غم لشگری هجوم ایلیوب قلب حضرته
.
او حالیده گلوبدی حسن گوردی زینبی
آغلوردی حسرتیله گلوب دردی شدته
.
آلدی کناره اوز باجیسین سویلیوب باجی
بیر بیله آغلوسان دی گوروم هانسی علته
.
بیر بیله آغلاما منه اظهار قیل سوزون
صبر ایت که صبریلن یتر انسان فضیلته
.
گوردی جواب اولمادی هر قدر دیندیروب
بیر آیری حال یوز ویرور اول بحر عفته
.
تشریف گتدی او دم شاه کربلا
یعنی حسین که فخردی قرآن و عترته
.
زینب حسینی گورماق همین آچدی قولارین
قارداشی پیشواز ایلیوب باخ مودّته
.
قارداشیلا اولوبدی او دم قول بویون باجی
دیل اود دوتوبدی یاندی بو نسگل عبارته
.
سویلوب حسین ، زینبه ای مهربان باجی
دیلده بو آغلاماق سبب اولموش جراحته
.
عرض ایتدی قارداشا آنامیز چوخ مریضدور
گلدن لطیف جسمی دوشوبدور صعوبته
.
قالمور او قدری عمری فنا روزگاریده
آز قالدی یتسون عمری جفادن نهایته
.
یعنی فنا جهاندان آنام ایستیور گیده
اولوخ یتیم سنله حسین باخ مذلته
.
علت او دور که گوزدن آخور اشگ حسرتیم
کیم تاب ایدر که منده دوزم درد فرقته
.
بسدور بوغملر عالمی یاندیردی ای (نوین)
مشمول ایدوبدی طبعیوی زهرا عنایته
.
بو سوزلره اولوبدی (صدیقینده) شرکتی (1)
لطف ایتسه گرخانیم یتشاق بیزده عزته
.
یعنی که بیر برات ویره لطفلن بیزه
زوار اولاق بقیعه چاتاق بو سعادته
.
آغلار گوزیله سسلیاق ای بضعه النبی
جانلار فدا الونده اولان لطف و رحمته
.
یاز دفترونده بیزلری که نوکریمدولر
بو منصبیله بیزده یتاق شأن و شوکته
ـــــــــــــــــــــــــــــــــ
( 1 ) :: مداح و شاعر اهلبیت کربلائی حسن سیاه آذر ( صدیق )
.
.
.
.
#فاطمیه #نوروزی_نوین #فاطمیه_شهادت #ترکی #زبدةالاشعار
نظر دهید